John 12;1-50
12 Usen itiokiet mbemiso passover, Jesus edisịm Bethany,+ ebiet emi Lazarus,+ emi Jesus akanamde eset ke n̄kpa, okodude.
2 Ntem mmọ ẹnam udia mbubreyo ẹnọ enye do, Martha+ onyụn̄ asan̄a utom,+ edi Lazarus ekedi kiet ke otu mbon emi ẹketiede ye enye ke okpokoro.+
3 Ntem Mary emen edifuọn̄ aran, ata nard,+ emi odobide pound kiet, emi ọsọn̄de urua etieti, ọfiọn̄ọ Jesus ke ukot onyụn̄ ada idet esie ọkwọhọde ukot esie asat.+ Ufọk oro akabade ọyọhọ ye ufuọn̄ aran oro.
4 Edi Judas Iscariot,+ kiet ke otu mbet esie, emi okoyomde ndida enye nnọ, ọdọhọ ete:
5 “Ntak emi owo mîkanyamke edifuọn̄ aran+ emi ke denarius ikie ita inyụn̄ ida inọ mme ubuene?”+
6 Edi enye itịn̄ke emi koro enye ekerede aban̄a mme ubuene, edi koro enye edide inọ+ onyụn̄ akamade ekebe okụk+ ndien esision̄o okụk oro ẹsịnde ke esịt.
7 Ntem Jesus ọdọhọ ete: “Kpọn̄ enye, yak enye anam edinam emi eben̄e usen eke ẹdibụkde mi.+
8 Koro mme ubuene+ ẹdodu ye mbufo kpukpru ini, edi ami ndidụhe ye mbufo kpukpru ini.”
9 Ntre akwa otu mme Jew ẹdifiọk ẹte enye odu do, mmọ ẹnyụn̄ ẹdi, idịghe ke ntak Jesus kpọt, edi n̄ko man ẹdikụt Lazarus, emi enye akanamde eset ke n̄kpa.+
10 Edi mbọn̄ oku ẹdiomi ndiwot Lazarus n̄ko,+
11 koro ke ntak esie ke ediwak mme Jew ẹkeka do ẹkenyụn̄ ẹbuọt idem ye Jesus.+
12 Ke ndan̄nsiere ke adan̄aemi akwa otuowo emi ẹkedide usọrọ ẹkopde ẹte Jesus ke edi Jerusalem,
13 mmọ ẹmen ndakeyop+ ẹwọrọ ẹka ndisobo ye enye. Mmọ ẹnyụn̄ ẹtọn̄ọ ndifiori ẹte:+ “Mbọk, nyan̄a enye!+ Itoro enyene enye emi edide ke enyịn̄ Jehovah,+ kpa edidem+ Israel!”
14 Edi ke ini Jesus okụtde abak ass,+ enye ọdọk odoro enye ke edem, kpa nte ẹkewetde ẹte:
15 “Kûfehe ndịk, eyenan̄wan Zion. Sese! Edidem fo ke edi,+ odoro ke abak ass.”+
16 Mme mbet esie ikọfiọkke mme n̄kpọ emi ke akpa,+ edi ke ini ẹma ẹkenọ Jesus ubọn̄,+ adan̄aoro mmọ ẹti ẹte ke ẹma ẹwet mme n̄kpọ emi ẹban̄a enye ye nte ke mmimọ ima inam mme n̄kpọ emi inọ enye.+
17 Edi otuowo emi ẹkedude ye enye ke ini enye okokotde Lazarus+ osio ke udi onyụn̄ anamde enye eset ke n̄kpa ẹka iso ẹtịn̄ se mmọ ẹkekụtde.+
18 Ke ntak emi otuowo ẹka ẹkesobo ye enye, sia mmọ ẹkopde ẹte enye akanam idiọn̄ọ emi.+
19 Mmọdo mme Pharisee+ ẹdọhọ ke otu idemmọ ẹte: “Mbufo ẹse do ẹte mbufo ikemeke ndinam n̄kpọ ndomokiet. Sese! Ofụri ererimbot ẹmewọrọ ẹtiene enye.”+
20 Ndien ndusụk mme Greek+ ẹma ẹdu ke otu mmọ emi ẹkedide ndituak ibuot ke usọrọ oro.
21 Ntre, mmọ emi ẹka ẹkesobo ye Philip+ emi okotode Bethsaida ke Galilee, ẹnyụn̄ ẹben̄e enye, ẹte: “Ete, nnyịn iyom ndikụt Jesus.”+
22 Philip edi editịn̄ ọnọ Andrew. Andrew ye Philip ẹdi ẹditịn̄ ẹnọ Jesus.
23 Edi Jesus ọbọrọ mmọ, ete: “Ini ekem ndinọ Eyen owo ubọn̄.+
24 Ke ata akpanikọ ke ndọhọ mbufo, Ke n̄kpasịp wheat mîduọhọ ke isọn̄ inyụn̄ ikpa, enye osụk edi n̄kpasịp kiet; edi edieke enye akpade,+ enye oyon̄wụm mfri.
25 Owo eke amade ukpọn̄ esie osobo enye, edi owo eke asuade ukpọn̄ esie+ ke ererimbot emi eyekpeme enye enịm ọnọ nsinsi uwem.+
26 Edieke owo ekededi edisan̄ade utom ọnọ mi, yak enye etiene mi, ndien ebiet eke ami ndude, do ke asan̄autom mi edidu n̄ko.+ Edieke owo ekededi edisan̄ade utom ọnọ mi, Ete oyokpono enye.+
27 Ukpọn̄ mi etịmede+ ke emi, ndien nso ke ndidọhọ? Ete, nyan̄a mi sio ke hour emi.+ Nte ededi, ntak edi oro nsịmde hour emi.
28 Ete, nọ enyịn̄ fo ubọn̄.” Ntre uyo+ oto ke heaven ọwọrọ ete: “Mma nnọ enye ubọn̄, nyonyụn̄ ntọn̄ọ ntak nnọ enye ubọn̄.”+
29 Ntem otuowo emi ẹkedade ẹkpere ẹnyụn̄ ẹkopde ẹdọhọ ẹte obuma asiaha. Mmọ eken ẹte: “Angel etịn̄ ikọ ọnọ enye.”
30 Jesus ọbọrọ ete: “Uyo emi ikọwọrọke ke ntak mi, edi ọkọwọrọ ke ntak mbufo.+
31 Idahaemi ke ẹkpe ikpe ererimbot emi; ke emi ẹmọn̄ ẹsio andikara ererimbot+ emi ẹduọk.+
32 Ndien, edieke ẹmenerede+ mi ẹkpọn̄ isọn̄, nyodụri kpukpru orụk owo nnọ idemmi.”+
33 Enye eketịn̄ emi akpan akpan ndiwụt orụk n̄kpa eke enye edikpade.+
34 Mmọdo otuowo ẹbọrọ enye ẹte: “Nnyịn ikokop ẹdọhọde ke Ibet ẹte ke Christ ododu ke nsinsi;+ didie ndien ke afo ọdọhọ ke ẹnyene ndimenede Eyen owo ke enyọn̄?+ Anie edi Eyen owo emi?”+
35 Ntem Jesus ọbọrọ mmọ ete: “Un̄wana oyodu ke otu mbufo ke esisịt ini. Ẹsan̄a ke adan̄aemi mbufo ẹnyenede un̄wana, mbak ekịm+ edifụk mbufo; ndien owo eke asan̄ade ke ekịm ifiọkke ebiet emi enye akade.+
36 Ke adan̄aemi mbufo ẹnyenede un̄wana, ẹbuọt idem ke un̄wana oro, man ẹkabade ẹdi nditọ un̄wana.”+
Jesus etịn̄ mme n̄kpọ emi ndien adaha ọkpọn̄ mmọ ekedịbe.
37 Edi okposụkedi enye ama akanam ediwak idiọn̄ọ ke iso mmọ, mmọ ibuọtke idem ye enye,
38 man ikọ prọfet Isaiah osu emi enye ọkọdọhọde ete: “Jehovah, anie ọkọbuọt idem ke mme n̄kpọ oro nnyịn ikokopde?+ Ndien amaedi ubọk Jehovah, ẹkeyarade enye ẹnọ mmanie?”+
39 Isaiah ọtọn̄ọ ntak etịn̄ ntak emi mmọ mîkekemeke ndinịm ke akpanikọ, ete:
40 “Enye esịri mmọ enyịn onyụn̄ anam esịt mmọ ọsọn̄,+ mbak mmọ ẹdida enyịn mmọ ẹkụt n̄kpọ ẹnyụn̄ ẹda esịt mmọ ẹfiọk n̄kpọ ẹnyụn̄ ẹfiak edem ndien ami n̄kọk mmọ.”+
41 Isaiah eketịn̄ mme n̄kpọ emi koro enye ama okụt ubọn̄ esie,+ onyụn̄ etịn̄ aban̄a enye.
42 Edi, ediwak ke otu mme andikara ẹma ẹbuọt idem ye enye,+ edi iyarakede iwụt ke ntak mme Pharisee, mbak ẹdibịn mmọ ẹsion̄o ke synagogue;+
43 koro mmọ ẹkam ẹmade ubọn̄ eke otode owo ẹkan ubọn̄ eke otode Abasi.+
44 Edi, Jesus ofiori ete: “Owo emi ọbuọtde idem ye ami ibuọtke idem ye ami kpọt, edi ọbuọt ye enye emi ọkọdọn̄de mi;+
45 ndien owo emi okụtde mi okụt enye emi ọkọdọn̄de mi n̄ko.+
46 Mmedi nte un̄wana ke ererimbot,+ man kpukpru owo eke ẹbuọtde idem ye ami ẹkûka iso ẹdu ke ekịm.+
47 Edi edieke owo ekededi okopde ikọ mi edi mînamke mmọ, n̄kpehe ikpe nnọ enye; koro n̄kedịghe ndikpe ikpe nnọ ererimbot,+ edi n̄kedi ndinyan̄a ererimbot.+
48 Owo eke ofụmide mi mînyụn̄ ibọhọ mme ikọ mi enyene se idibierede ikpe inọ enye. Ikọ+ emi ntịn̄de edibiere ikpe ọnọ enye ke akpatre usen;
49 koro ntịn̄ke n̄kpọ emi ke ekikere idemmi, edi Ete emi ọkọdọn̄de mi ọnọ mi ewụhọ aban̄a se ndọhọde ye se ntịn̄de.+
50 N̄ko, mmọfiọk nte ewụhọ esie ọwọrọ nsinsi uwem.+ Mmọdo mme n̄kpọ eke ami ntịn̄de, kpa nte Ete akasiande mi, kpa ntre ke ami ntịn̄ mmọ.”+
