John 6;1-71
6 Ke mme n̄kpọ emi ẹma ẹkebe, Jesus ebe aka edem inyan̄ Galilee, m̀mê Tiberias.+
2 Edi akwa otuowo ẹka iso nditiene enye, koro mmọ ẹkekụtde mme idiọn̄ọ emi enye akanamde ke idem mmọ emi ẹkedọn̄ọde.+
3 Ntre Jesus ọdọk aka obot,+ okosụhọde etie do ye mme mbet esie.
4 Ndien passover,+ kpa usọrọ mme Jew, asan̄a ekpere.
5 Ndien ke ini Jesus emenerede enyịn esie okụt nte akwa otuowo ẹdide ẹbịne enye, enye obụp Philip ete: “M̀mọ̀n̄ ke nnyịn ididep uyo inọ mmọ emi ẹta?”+
6 Edi, enye eketịn̄ emi ndidomo enye nse, koro enye ke idemesie ama ọfiọk se enye oyomde ndinam.
7 Philip ọbọrọ enye ete: “Uyo denarius ikie iba ikemke mmọ ndita nsịtnsịt.”+
8 Owo kiet ke otu mbet esie, kpa Andrew eyeneka Simon Peter, ọdọhọ enye ete:
9 “Ekpri eyeneren kiet mmọmi emi enyenede uyo barley+ ition ye n̄kpri iyak iba. Edi oro ekem adan̄a ediwak owo emi nso?”+
10 Jesus ọdọhọ ete: “Ẹnam mme owo ẹsụhọde ẹtetie nte akam esidide ke ini udia.”+ Ndien ediwak mbiet ẹma ẹdu ke itie oro. Ntre mme owo oro ẹsụhọde ẹtetie, n̄kpọ nte owo tọsịn ition ke ibat.+
11 Ntre Jesus emen uyo oro, ndien ke ama ọkọnọ ekọm, enye edeme mmọ ọnọ mmọ emi ẹtiede-tie, kpasụk ntre n̄ko ke anam ye n̄kpri iyak oro nte mmọ ẹyomde.+
12 Edi ke ini mmọ ẹma ẹkedia ẹyụhọ+ enye ọdọhọ mme mbet esie ete: “Ẹtan̄ mben̄e emi ẹsụhọde ẹbon ọtọkiet, man n̄kpọ ndomokiet okûtak.”
13 Ntre mmọ ẹtan̄ mben̄e ẹbon ọtọkiet, mmọ ẹnyụn̄ ẹdọn̄ mben̄e uyo barley ition oro, emi mbon oro ẹketade ẹsụhọ, ẹyọhọ akpasa duopeba.+
14 Ntem ke ini mme owo ẹkụtde idiọn̄ọ oro enye akanamde, mmọ ẹdọhọ ẹte: “Emi ke akpanikọ edi prọfet+ oro ekenyenede ndidi ke ererimbot.”
15 Ntre ke Jesus ọfiọkde ete mmọ ẹyom ndimụm imọ nnịm ke edidem, enye afiak+ ọnyọn̄ obot sụk enye ikpọn̄.
16 Ke ini esịmde mbubreyo, mme mbet esie ẹsụhọde ẹka inyan̄,+
17 ndien mmọ ẹdiere ke ubom, ẹwat ẹbe inyan̄ ẹka Capernaum. Ndien, etisịm idahaemi eyo okụt, Jesus inyụn̄ isịmke mmọ kan̄a.
18 Ndien inyan̄ ọtọn̄ọ nditịmede ke ntak ọkpọsọn̄ ofụm emi efịmede.+
19 Edi, ke ini mmọ ẹma ẹkewat ke n̄kpọ nte itiat ita m̀mê inan̄, mmọ ẹkụt Jesus nte asan̄ade ke enyọn̄ inyan̄ ekpere ubom; ndien ndịk anam mmọ.+
20 Edi enye ọdọhọ mmọ ete: “Ami ke edi; ẹkûfehe ndịk!”+
21 Ntre mmọ ẹnyịme ndida enye nsịn ke ubom, ndien kpa idaha oro ubom oro ekebehe ke ebiet emi mmọ ẹkedomode ndiwat n̄ka.+
22 Ke ndan̄nsiere otuowo emi ẹkedade ke edem inyan̄ oko ẹkụt ke baba ubom kiet idụhe do ke mîbọhọke ekpri ubom kiet, ye nte ke Jesus iketieneke mme mbet esie idụk ubom oro, edi nte ke mme mbet esie ikpọn̄ ẹkedaha;
23 edi mme ubom ẹtode Tiberias ẹma ẹdibehe ẹkpere ebiet oro mmọ ẹketade uyo ke Ọbọn̄ ama ọkọnọ ekọm.
24 Ntre ke ini otuowo ẹkụtde ke Jesus ye mme mbet esie ikodụhe do, mmọ ẹdụk n̄kpri ubom mmọ ẹdi Capernaum ndiyom+ Jesus.
25 Ntre ke ini mmọ ẹkụtde enye ke edem inyan̄ oko mmọ ẹbụp enye ẹte: “Rabbi,+ ini ewe ke afo ekedisịm mi?”
26 Jesus ọbọrọ mmọ ete: “Ke ata akpanikọ ke ndọhọ mbufo nte, Mbufo iyomke mi koro mbufo ẹkekụtde mme idiọn̄ọ, edi koro mbufo ẹketade uyo ẹyụhọ.+
27 Ẹkûnam utom ẹyom udia eke edibiarade,+ edi ẹnam ẹyom udia eke edikade iso odu onyụn̄ osụn̄ọ ke uwem nsinsi,+ emi Eyen owo edinọde mbufo; koro enye emi ke Ete, kpa Abasi, ekefịk idiọn̄ọ esie ndiwụt ke imenyịme enye.”+
28 Ntre mmọ ẹbụp enye ẹte: “Nso ke nnyịn idinam man inam mme utom Abasi?”
29 Jesus ọbọrọ mmọ ete: “Utom Abasi edi emi, ete mbufo ẹbuọt idem+ ke owo emi Enye okosiode ọdọn̄.”+
30 Ntem mmọ ẹbụp enye ẹte: “Nso, ndien, ke afo ananam nte idiọn̄ọ,+ man nnyịn ikụt inyụn̄ inịm fi ke akpanikọ? Nso utom ke afo ananam?
31 Mme ete ete nnyịn ẹkedia manna+ ke wilderness, kpa nte ẹwetde ẹte, ‘Enye ama ọnọ mmọ uyo eke otode heaven ete ẹta.’”+
32 Ntem Jesus ọbọrọ mmọ ete: “Ke ata akpanikọ ke ndọhọ mbufo nte, Moses ikọnọhọ mbufo uyo eke otode heaven, edi Ete mi ọnọ mbufo ata uyo emi otode heaven.+
33 Koro uyo emi Abasi ọnọde edi enye emi otode ke heaven osụhọde edi edinọ ererimbot uwem.”
34 Ntre mmọ ẹdọhọ enye ẹte: “Ọbọn̄, nọ nnyịn uyo emi kpukpru ini.”+
35 Jesus ọdọhọ mmọ ete: “Ami ndi uyo uwem. Owo eke edide ebịne mi idikopke biọn̄ tutu amama, ndien owo eke ọbuọtde idem ye ami idikopke nsatitọn̄ tutu amama.+
36 Edi ndọhọ mbufo nte, mbufo ẹmekụt mi edi inịmke mi ke akpanikọ.+
37 Kpukpru n̄kpọ eke Ete ọnọde mi ẹyetiene mi, ndien ndibịnke owo eke etienede mi nduọk tutu amama;+
38 koro n̄koto heaven nsụhọde ndi,+ idịghe man ndinam uduak idemmi, edi man ndinam uduak enye emi ọkọdọn̄de mi.+
39 Emi edi uduak enye emi ọkọdọn̄de mi, ete n̄kûyak baba kiet ke otu kpukpru mmọ eke enye ọkọnọde mi ọbọhọ osop, edi nnam kpukpru mmọ ẹset+ ke akpatre usen.
40 Koro uduak Ete mi edi emi, ete kpukpru owo eke ẹkụtde Eyen ẹnyụn̄ ẹbuọtde idem ye enye ẹnyene nsinsi uwem,+ ndien ami nyanam mmọ ẹset ke akpatre usen.”+
41 Ke ntre mme Jew ẹtọn̄ọ ndisụk enye uyo koro enye ọkọdọhọde ete: “Ami ndi uyo emi okotode heaven osụhọde edi”;+
42 ndien mmọ ẹbụp ẹte:+ “Nte emi idịghe Jesus eyen Joseph,+ emi nnyịn idiọn̄ọde ete ye eka esie? Enye asan̄a didie ndien ọdọhọ ete, ‘Ami n̄koto heaven nsụhọde ndi’?”
43 Jesus ọbọrọ mmọ ete: “Ẹtre ndikụni ke otu idem mbufo.
44 Baba owo kiet ikemeke nditiene mi ibọhọke Ete, emi ọkọdọn̄de mi, odụri enye edi;+ ndien ami nyanam enye eset ke akpatre usen.+
45 Ẹwet ke uwetn̄kpọ mme Prọfet ẹte, ‘Jehovah oyonyụn̄ ọnọ kpukpru mmọ ukpep.’+ Kpukpru owo eke ẹkopde uyo Ete ẹnyụn̄ ẹbọde ukpep ẹdi ẹtiene mi.+
46 Baba owo kiet ikwe Ete,+ ibọhọke enye emi otode Abasi; enye emi okụt Ete.+
47 Ke ata akpanikọ ke ndọhọ mbufo, Owo eke enịmde ke akpanikọ enyene nsinsi uwem.+
48 “Ami ndi uyo+ uwem.
49 Mme ete ete mbufo ẹma ẹdia manna+ ke wilderness ẹnyụn̄ ẹkpan̄a.
50 Emi edi uyo eke otode heaven osụhọde edi, man owo ekededi akpata ndien okûkpa.
51 Ami ndi odu-uwem uyo emi okotode heaven osụhọde edi; edieke owo ekededi atade uyo emi enye oyodu uwem ke nsinsi; ke akpanikọ, uyo eke ndinọde edi obụkidem+ mi man ererimbot odu uwem.”+
52 Ndien mme Jew ẹtọn̄ọ ndineni ye kiet eken, ẹte: “Didie ke owo emi ekeme ndinọ nnyịn obụkidem esie ita?”
53 Ntem Jesus ọdọhọ mmọ ete: “Ke ata akpanikọ ke ndọhọ mbufo, Ibọhọke mbufo ẹta obụkidem+ Eyen owo ẹnyụn̄ ẹn̄wọn̄ iyịp esie,+ mbufo inyeneke uwem+ ke esịt mbufo.
54 Owo eke atade obụkidem mi onyụn̄ ọn̄wọn̄de iyịp mi enyene nsinsi uwem, ndien nyanam enye eset+ ke akpatre usen;
55 koro obụkidem mi edi ata udia, iyịp mi onyụn̄ edi ata edin̄wọn̄ n̄kpọ.
56 Owo eke atade obụkidem mi onyụn̄ ọn̄wọn̄de iyịp mi abuana n̄kpọ ye ami, ami mmonyụn̄ mbuana n̄kpọ ye enye.+
57 Kpa nte Ete emi odude uwem+ okosiode mi ọdọn̄ ami nnyụn̄ ndude uwem oto ke Ete, owo emi n̄ko atade obụkidem mi oyodu uwem oto mi.+
58 Emi edi uyo oro okotode heaven osụhọde edi. Itiehe nte se mme ete ete mbufo ẹketade ekem ẹkpan̄a. Owo eke atade uyo emi oyodu uwem ke nsinsi.”+
59 Enye eketịn̄ mme n̄kpọ emi ke adan̄aemi enye ekpepde n̄kpọ ke esop mbio obio ke Capernaum.
60 Ntre ke ini ediwak mbet esie ẹkopde emi, mmọ ẹdọhọ ẹte: “Ikọ emi odoro owo ndidien; anie ekeme ndikpan̄ utọn̄?”+
61 Edi ke ini Jesus ọfiọkde ete ke mbet imọ ke ẹkụni ẹban̄a emi, enye obụp mmọ ete: “Nte emi anam mbufo ẹtuak ukot ẹduọn̄ọ?+
62 Nso, ndien, edieke mbufo ẹkpekụtde nte Eyen owo ọdọkde aka ebiet emi enye ekebemde iso odu?+
63 Edi spirit ọnọ uwem;+ obụkidem inyeneke ufọn ndomokiet. Mme ikọ emi ntịn̄de nnọ mbufo ẹdi spirit+ ẹnyụn̄ ẹdi uwem.+
64 Edi odu ndusụk ke otu mbufo emi mînịmke ke akpanikọ.” Koro toto ke editọn̄ọ Jesus ama ọfiọk mbon emi mînịmke ke akpanikọ ye owo emi edidade enye ọnọ.+
65 Ntre enye aka iso ọdọhọ ete: “Ntak edi emi ndọhọde mbufo nte, Baba owo kiet ikemeke nditiene mi ibọhọke Ete enyịme enye.”+
66 Ke ntak emi ediwak mbet esie ẹfiak ẹbịne mme n̄kpọ emi mmọ ẹkekpọn̄de ke edem+ inyụn̄ isan̄ake aba ye enye.+
67 Mmọdo Jesus obụp mbet duopeba ete: “Nte mbufo n̄ko ẹmeyom nditiene nnyọn̄?”
68 Simon Peter+ ọbọrọ enye ete: “Ọbọn̄, nnyịn idinyọn̄ ibịne anie?+ Afo enyene ikọ nsinsi uwem;+
69 ndien nnyịn imenịm ke akpanikọ, imonyụn̄ idi idifiọk ite ke afo edi Edisana Owo Abasi.”+
70 Jesus ọbọrọ mmọ ete: “Nte ami n̄kemekke mbufo owo duopeba?+ Edi owo kiet ke otu mbufo edi owo edidọk.”+
71 Ke akpanikọ, enye eketịn̄ aban̄a Judas eyen Simon Iscariot; koro owo emi edida enye ọnọ,+ okposụkedi edide kiet ke otu mbet duopeba.
