John 7;1-53
7 Ndien ke mme n̄kpọ emi ẹma ẹkebe, Jesus asan̄a ke Galilee, koro enye mîkoyomke ndisan̄a ke Judea, sia mme Jew ẹkeyomde ndiwot+ enye.
2 Nte ededi, usọrọ mme Jew, kpa usọrọ mme ataya,+ ama asan̄a ekpere.
3 Ntre nditọeka+ esie ẹdọhọ enye ẹte: “Daha ke ebiet emi ka Judea, man mme mbet fo ẹkpekụt mme utom emi afo anamde.
4 Koro baba owo kiet inamke n̄kpọ ekededi ke ndịbe ke adan̄aemi enye oyomde ẹdiọn̄ọ imọ an̄wan̄wa. Edieke afo anamde mme n̄kpọ emi, yarade idemfo wụt ererimbot.”
5 Ke akpanikọ, nditọeka+ esie ikọbuọtke idem ye enye.+
6 Ke ntre Jesus ọdọhọ mmọ ete: “Ini mi ikemke kan̄a,+ edi ini mbufo ekekem kpukpru ini.
7 Ererimbot inyeneke ntak ndomokiet ndisua mbufo, edi enye asua mi, koro ntiede ntiense mban̄a enye nte ke mme utom esie ẹdiọk.+
8 Mbufo ẹdọk ẹka usọrọ; ami ndidọkke kan̄a n̄ka usọrọ emi, koro ini mi+ ikemke kan̄a ima.”+
9 Ntre ke enye ama eketịn̄ mme n̄kpọ emi ọnọ mmọ ama, enye aka iso odu ke Galilee.
10 Edi ke ini nditọeka esie iren ẹma ẹkedọk ẹka usọrọ, ekem enye n̄ko ke idemesie edidọk aka, idịghe an̄wan̄wa edi ke ndịbe.+
11 Mmọdo mme Jew ẹtọn̄ọ ndiyom+ enye ke usọrọ oro ẹnyụn̄ ẹbụp ẹte: “Enye owo oro?”
12 Ndien ẹtịn̄ ediwak ikọ nsụkuyo ẹban̄a enye ke otuowo.+ Ndusụk owo ẹdọhọ ẹte: “Enye edi eti owo.” Mmọ eken ẹte: “Idịghe, edi enye otụn otuowo usụn̄.”
13 Edi, baba owo kiet itịn̄ke ikọ iban̄a enye an̄wan̄wa ke ntak ẹkopde ndịk ẹban̄a mme Jew.+
14 Ke ini usọrọ oro ama ekesịm ufọt, Jesus ọdọk aka temple onyụn̄ ọtọn̄ọ ndikpep mme owo n̄kpọ.+
15 Ntem, idem akpa mme Jew, mmọ ẹnyụn̄ ẹbụp ẹte: “Owo emi asan̄a didie ọfiọk ndikot n̄wed,+ ke ini enye mîkọbọhọ ukpep ke ufọkn̄wed?”+
16 Ekem, Jesus ọbọrọ mmọ ete: “Se ami n̄kpepde idịghe okịm, edi enyene enye emi ọkọdọn̄de mi.+
17 Edieke owo ekededi oyomde ndinam uduak Esie, enye ọyọfiọk aban̄a ukpepn̄kpọ emi m̀mê oto Abasi,+ m̀mê ntịn̄ ke ifiọk idemmi.
18 Owo eke etịn̄de ikọ ke ifiọk idemesie oyom ubọn̄ idemesie; edi owo eke oyomde ubọn̄+ enye emi ọkọdọn̄de enye, owo oro edi akpanikọ, ukwan̄ido inyụn̄ idụhe enye ke esịt.
19 Nte Moses ikọnọhọ mbufo Ibet?+ Edi baba owo kiet ke otu mbufo inịmke Ibet oro. Nso idi ntak emi mbufo ẹyomde ndiwot mi?”+
20 Otuowo ẹbọrọ ẹte: “Afo emenyene demon.+ Anie oyom ndiwot fi?”
21 Jesus ọbọrọ mmọ ete: “N̄kpọ kiet ke nnam,+ ndien idem akpa mbufo.
22 Ntak emi akanam Moses ọnọ mbufo ewụhọ mbobi+—idịghe nte ke enye okoto Moses, edi okoto mme ete ete+—ndien mbufo ẹnịm owo mbobi ke sabbath.
23 Edieke owo anade mbobi ke sabbath man okûbiat ibet Moses, ndi mbufo ẹnen̄ede ẹyat esịt ye ami koro nnamde owo okop ọyọhọ nsọn̄idem ke sabbath?+
24 Ẹtre ndikpe ikpe nte ẹkụtde ke enyịn, edi ẹkpe edinen ikpe.”+
25 Mmọdo ndusụk mme andidụn̄ Jerusalem ẹbụp ẹte: “Nte idịghe owo emi ke mmọ ẹyom ndiwot?+
26 Ndien kamse! enye ke etịn̄ ikọ an̄wan̄wa,+ mmọ inyụn̄ itịn̄ke baba ikọ kiet ye enye. Nte mme andikara itịmke ifiọk ite emi edi Christ?+
27 Edi, nnyịn imọfiọk ebiet emi owo emi otode;+ edi ke ini Christ edidide, baba owo kiet idifiọkke ebiet emi enye otode.”+
28 Ntem Jesus emenede uyo esie ọdọhọ nte enye ekpepde n̄kpọ ke temple ete: “Mbufo ẹmefiọk mi ye ebiet eke ami ntode.+ N̄ko, ami ndịghe ke odudu idemmi,+ edi enye emi ọkọdọn̄de mi enen̄ede odu,+ mbufo inyụn̄ ifiọkke enye.+
29 Ami mmọfiọk enye,+ koro ndide andida ke ibuot esie, ndien Enye okonyụn̄ osio mi ọdọn̄.”+
30 Ntem mmọ ẹyom ndimụm enye,+ edi baba owo kiet itụkke enye, koro ini+ esie mîkemke kan̄a.
31 Edi, ediwak owo ke otu oro ẹbuọt idem ye enye;+ mmọ ẹnyụn̄ ẹdọhọ ẹte: “Ke ini Christ edidide, nte enye ayanam mme idiọn̄ọ+ akan se owo emi anamde?”
32 Mme Pharisee ẹkop nte otuowo ẹtịn̄de mme n̄kpọ emi ke nsụhọde uyo ẹban̄a enye, ndien mbọn̄ oku ye mme Pharisee ẹsio mme asan̄autom ẹdọn̄ ẹte ẹka ẹkemụm enye.+
33 Edi Jesus ọdọhọ ete: “Nyaka iso ndu ye mbufo ke esisịt ini mbemiso nnyọn̄de mbịne enye emi ọkọdọn̄de mi.+
34 Mbufo ẹyeyom mi,+ edi mbufo idikwe mi, ndien ebiet emi ami ndude mbufo ikemeke ndidi.”+
35 Ntem mme Jew ẹdọhọ ke otu idemmọ ẹte: “M̀mọ̀n̄ ke owo emi aduak ndika emi nnyịn mîdikwe enye? Nte enye aduak ndika mbịne mme Jew emi ẹsuanade ẹdụn̄ọ+ ke otu mme Greek nnyụn̄ n̄kekpep mme Greek n̄kpọ?
36 Nso ke ikọ emi ọwọrọ, emi enye ọdọhọde ete, ‘Mbufo ẹyeyom mi, edi mbufo idikwe mi, ndien ebiet emi ami ndude mbufo idikemeke ndidi’?”
37 Ndien ke akpatre usen, kpa akwa usen usọrọ,+ Jesus adaha ada emenede uyo ọdọhọ ete: “Edieke owo ekededi okopde nsatitọn̄,+ yak enye edi ebịne mi edin̄wọn̄ mmọn̄.
38 Owo eke ọbuọtde idem ye ami,+ kpa nte N̄wed Abasi ọdọhọde, ‘Idịm mmọn̄ uwem oyoto enye ke ata esịtidem ewet ọwọrọ.’”+
39 Edi, enye etịn̄ emi aban̄a spirit oro mbon emi ẹbuọtde idem ye enye ẹdibọde; koro spirit mîkodụhe kan̄a,+ sia Jesus mîkọbọhọ kan̄a ubọn̄.+
40 Ke ntre ndusụk owo ke otu oro emi ẹkekopde mme ikọ emi ẹdọhọ ẹte: “Ke akpanikọ, owo emi edi Prọfet oro.”+
41 Mmọ en̄wen ẹdọhọ ẹte: “Emi edi Christ.”+ Edi ndusụk owo ẹdọhọ ẹte: “Nte Christ+ ke akpanikọ ediwọrọ oto Galilee?+
42 Nte N̄wed Abasi idọhọke ite ke Christ ediwọrọ oto eyen David,+ onyụn̄ oto ke Bethlehem+ kpa obio-in̄wan̄ emi David ekesidude?”+
43 Ntem ubahade etịbe ke otuowo aban̄a enye.+
44 Okposụkedi ndusụk mmọ ẹkeyomde ndimụm enye, baba owo kiet itụkke enye.
45 Mmọdo mme asan̄autom oro ẹfiak ẹbịne mbọn̄ oku ye mme Pharisee, ndien mmọ ẹbụp mme asan̄autom emi ẹte: “Nso idi ntak emi mbufo mîdaha enye idi?”
46 Mme asan̄autom oro ẹbọrọ ẹte: “Akananam owo ndomokiet itịn̄ke ikọ ntem.”+
47 Ndien mme Pharisee ẹbọrọ ẹte: “Nte ẹtụn mbufo usụn̄ n̄ko?
48 Ndi ndomo owo kiet ke otu mme andikara m̀mê mme Pharisee ọbuọt idem ye enye?+
49 Edi otuowo emi mîfiọkke Ibet mi ẹdi mbon oro ẹma ẹkesụn̄i.”+
50 Nicodemus, emi ama ẹkebebem iso edi ebịne enye, emi okonyụn̄ edide owo kiet ke otu mmọ, obụp mmọ ete:
51 “Ndi Ibet nnyịn obiom owo ikpe ke owo mîbemke iso ikop ikọ+ ito enye inyụn̄ ifiọk se enye anamde?”
52 Mmọ ẹbọrọ enye ẹte: “Ndi afo n̄ko oto Galilee? Dụn̄ọde ke oyokụt ete prọfet+ ndomokiet iwọrọke ito Galilee.”
N̄kani uwetn̄kpọ Codex Sinaiticus, Codex Vaticanus, ye Sinaitic Syriac isịnke ufan̄ikọ 53 esịm ibuot 8, ufan̄ikọ 11, emi okotde ntem (ye ndusụk ukpụhọde ke nsio nsio uwetn̄kpọ ye mme edikabade eke usem Greek), ete:
53 Ntre mmọ kiet kiet ẹnyọn̄ọ ufọk mmọ.
