Leviticus 1;1-17
1 Ndien Jehovah etie ke tent usopidem+ okot Moses onyụn̄ ọdọhọ enye ete:
2 “Dọhọ nditọ Israel+ ete, ‘Edieke owo mbufo ekededi oyomde ndisio unam ke otu ufene n̄wa nnọ Jehovah, mbufo ẹnyene ndisio uwa mbufo ke otu enan̄ ye erọn̄.
3 “‘Edieke uwa esie edide edifọp uwa+ emi ẹsiode ke otu enan̄, enye enyene ndidi ayara emi eyede idem.+ Enye enyene ndinọ enye ke unyịmesịt ke enyịnusụn̄ tent usopidem ke iso Jehovah.+
4 Ndien enye enyene ndidori ubọk esie ke ibuot unam edifọp uwa oro, ndien nyenem esịt ndibọ+ uwa emi man ẹsio isop ibuot esie.+
5 “‘Ndien ẹnyene ndiwot abak ayara enan̄ oro ke iso Jehovah; ndien nditọiren Aaron, mme oku,+ ẹnyene ndida iyịp unam emi ndi nnyụn̄ nsịme iyịp emi n̄kanade itieuwa+ emi odude ke enyịnusụn̄ tent usopidem.
6 Ndien ẹnyene ndiyan̄ade ikpa unam edifọp uwa oro nnyụn̄ mbak enye ke mbak ke mbak.+
7 Ndien nditọiren Aaron, mme oku, ẹnyene ndibara ikan̄ ke itieuwa+ nnyụn̄ ntịm ifia ndọn̄ ke ikan̄.+
8 Ndien nditọiren Aaron, mme oku, ẹnyene nditịm mbak+ unam oro ye ibuot ye ikpọn̄ esie ndori ke ifia emi odude ke ikan̄ itieuwa.
9 Ndien ẹnyene ndida mmọn̄ nyet nsia+ esie ye ukot esie; oku onyụn̄ enyene ndifọp kpukpru mmọ ke itieuwa nte edifọp uwa, kpa uwa emi ẹfọpde ke ikan̄ man osio edinem utebe ọnọ Jehovah.+
10 “‘Ndien edieke uwa esie edide edifọp uwa emi otode ke otu ufene,+ edide abak okukịm erọn̄ m̀mê ebot, enyene ndidi ayara+ emi eyede idem.+
11 Ndien ẹnyene ndiwot unam emi ke iso Jehovah ke n̄kan̄ itieuwa emi esede edem edere, ndien nditọiren Aaron, mme oku, ẹnyene ndisịme iyịp esie n̄kanade itieuwa.+
12 Enye onyụn̄ enyene ndibak unam oro ke mbak ke mbak nnyụn̄ nsịbe ibuot esie nnyụn̄ nsion̄o ikpọn̄ esie, ndien oku enyene nditịm mmọ ndori ke ifia emi odude ke ikan̄ itieuwa.+
13 Ndien enye enyene ndida mmọn̄ nyet nsia+ ye ukot;+ oku onyụn̄ enyene ndiwa ofụri unam oro nnyụn̄ mfọp+ enye ke itieuwa. Enye edi edifọp uwa, kpa uwa emi ẹfọpde ke ikan̄ man osio edinem utebe ọnọ Jehovah.+
14 “‘Edi edieke uwa esie edide edifọp uwa eke enye ọnọde Jehovah, emi otode ke otu inuen, enye enyene ndinọ mbomon̄kuku+ m̀mê nditọ ibiom.+
15 Ndien oku enyene ndida enye ndi ke itieuwa nnyụn̄ nyịp+ enye itọn̄ nsịbe nnyụn̄ mfọp enye ke itieuwa, edi ẹnyene ndiduọk iyịp esie ke n̄kan̄ itieuwa.
16 Ndien enye enyene ndisio en̄wek esie nnyụn̄ mfịp enye ntan̄ nduọn̄ọ ke n̄kan̄ itieuwa emi esede edem usiahautịn ke ebiet emi ẹsiduọkde ntọn̄ ikpọn̄ uwa.+
17 Enye onyụn̄ enyene ndisiak enye ke mba esie. Edi inyeneke ndibahade enye iba.+ Ekem oku enyene ndidori enye ke ifia emi odude ke ikan̄ mfọp ke itieuwa. Enye edi edifọp uwa,+ kpa uwa emi ẹfọpde ke ikan̄ man osio edinem utebe ọnọ Jehovah.+
