Luke 14;1-35
14 Ndien ini kiet nte enye odụkde ufọk andikara mme Pharisee kiet ke sabbath ndidia udia,+ mmọ ẹtịn̄ enyịn ẹkpeme enye.+
2 Ndien, sese! owo kiet emi ọdọn̄ọde mfụri odu enye ke iso.
3 Ntre Jesus obụp mmọ emi ẹfiọkde Ibet ye mme Pharisee, ete: “Nte ibet enyịme ẹkọk udọn̄ọ ke sabbath m̀mê inyịmeke?”+
4 Edi mmọ ẹdodop. Mmọdo enye anyan ubọk omụm owo oro, anam udọn̄ọ okụre enye onyụn̄ ọnọ enye ọnyọn̄.
5 Ndien enye obụp mmọ ete: “Anie ke otu mbufo ke eyen esie m̀mê enan̄ esie ọkpọduọ odụk obube mmọn̄,+ ndien idụrike enye isio kpa idaha oro ke usen sabbath?”+
6 Ndien mmọ ikemeke ndibọrọ enye n̄kpọ emi.+
7 Ekem enye ọnọ mbon oro ẹkekotde uwụtn̄kpọ kiet, ke ini enye okụtde nte mmọ ẹmekde ata ikpọ itie ẹnọ idemmọ, onyụn̄ ọdọhọ mmọ ete:+
8 “Ke ini owo okotde fi usọrọ ndọ, kûsụhọde utie ke ata akamba itie.+ Mbak ndusụk enye ama okot owo emi okponde akan fi,
9 ndien owo oro okokotde fi ye enye eyedi edidọhọ fi ete, ‘Yak owo enye emi etie mi.’ Ndien adan̄aoro afo ayadaha ye bụt eketie ke ata usụhọde itie.+
10 Edi ke ini ẹkotde fi, ka ketie ke ata usụhọde itie,+ man ke ini owo emi okokotde fi edide enye ọkpọdọhọ fi ete, ‘Ufan, dọk di.’ Adan̄aoro afo eyenyene ukpono ke iso kpukpru isenowo emi ẹtiede ye afo.+
11 Koro owo ekededi eke emenerede idemesie ke enyọn̄ ẹyesụhọde enye ẹnịm, ndien owo eke osụhọrede idemesie ẹyemenede enye.”+
12 Ekem enye ọdọhọ owo emi okokotde enye udia ete: “Ke ini afo anamde udia uwemeyo m̀mê udia mbubreyo, kûkot mme ufan fo m̀mê nditọete fo m̀mê iman fo m̀mê mme mbọhọidụn̄ emi ẹdide mme enyene-n̄kpọ owo. Mbak ndusụk mmọ ẹdikot fi n̄ko ndien emi ediwọrọ ke ẹnọ fi usiene.
13 Edi ke ini afo anamde usọrọ, kot mme ubuene, mmọ eke ẹbiomode ndo ke ukot, mbụn̄ọ, nnan;+
14 ndien afo oyokop inemesịt, koro mmọ mînyeneke se ẹdidade ẹnọ fi ke usiene. Koro ẹyenọ fi usiene ke ini ediset+ ndinen owo.”
15 Ke ini owo kiet ke otu isenowo emi etiede ye enye okopde mme ikọ emi, ọdọhọ enye ete: “Owo emi atade uyo ke obio ubọn̄ Abasi, okop inemesịt.”+
16 Jesus ọdọhọ enye ete: “Owo kiet akanam akamba udia mbubreyo, onyụn̄ okot ediwak owo.+
17 Ndien ke ekemde ini udia mbubreyo enye ọdọn̄ ofụn esie ọkọdọhọ mmọ emi ẹkekotde ete, ‘Ẹdi,+ koro ẹma ẹnam n̄kpọ ẹma.’
18 Edi kpukpru mmọ ye esịt kiet ẹtọn̄ọ ndiyom ikọ ndibọrọ.+ Akpa owo ọdọhọ enye ete, ‘Mma ndep in̄wan̄ ndien nnyene ndika n̄kese; mbọk, ndikemeke ndidi.’+
19 Owo efen onyụn̄ ọdọhọ ete, ‘Mmedep enan̄ duop ndien nyom ndika n̄kese nte mmọ ẹtiede; mbọk, ndikemeke ndidi.’+
20 Owo efen nde ọdọhọ ete, ‘Ami ndisụk ndọ+ n̄wan edi oro ndien ke ntak emi n̄kemeke ndidi.’
21 Ntre ofụn oro edi editịn̄ mme n̄kpọ emi ọnọ eteufọk esie. Ekem enyeneufọk ayat esịt onyụn̄ ọdọhọ ofụn esie ete, ‘Wara wọrọ ka ikpọ efak ye n̄kpri efak obio, nyụn̄ kada mme ubuene ye mmọ eke ẹbiomode ndo ke ukot ye mbụn̄ọ dụk di.’+
22 Ekem ofụn oro edidọhọ ete, ‘Eteufọk, ẹnam nte ọkọdọhọde, edi ufan̄ ke ososụhọ.’
23 Ndien eteufọk oro ọdọhọ ofụn esie ete, ‘Wọrọ ka mme usụn̄+ ye mme mben ọkọ, nyụn̄ kekpek mmọ ẹdụk ẹdi, man ufọk mi ọyọhọ.+
24 Koro ndọhọ mbufo nte, Baba owo kiet ke otu mmọ emi ẹkekotde iditabike udia mbubreyo mi.’”+
25 Ekem akwa otuowo ẹsan̄a ye enye, ndien enye ọwọn̄ọde ese mmọ onyụn̄ ọdọhọ mmọ ete:
26 “Edieke owo ekededi etienede mi ndien mîsuaha ete esie ye eka esie ye n̄wan esie ye nditọ esie ye nditọeka esie iren ye nditọeka esie iban, ih, mînyụn̄ isuaha ukpọn̄+ esiemmọ, enye ikemeke ndidi mbet mi.+
27 Owo ekededi eke mîbiomke eto ndutụhọ esie itiene mi ikemeke ndidi mbet mi.+
28 Ke uwụtn̄kpọ, anie ke otu mbufo emi oyomde ndibọp tọwa mîdibemke iso isụhọde itie ibat se iditakde,+ man okụt m̀mê enye enyene okụk emi ekemde ndida mbọp mma?
29 Mîdịghe ntre, enye eyesịn itiat idakisọn̄ edi ikemeke ndibọp mma, ndien kpukpru mme andida nse ẹyetọn̄ọ ndisak enye,
30 ẹte, ‘Owo emi ọkọtọn̄ọ ndibọp ufọk edi ikemeke ndibọp mma.’
31 N̄ko, ewe edidem, emi akade ekọn̄ ye edidem en̄wen, mîdibemke iso isụhọde itie ikere m̀mê enye eyekeme ndida mbonekọn̄ tọsịn duop n̄n̄wana ye enye emi asan̄ade ye mbonekọn̄ tọsịn edịp edi ndin̄wana ye enye?+
32 Ke akpanikọ, edieke enye mîdikemeke ndinam ntre, ke adan̄aemi enye eken osụk odude kan̄a anyan usụn̄ enye ọdọn̄ otu isụn̄utom ete ẹkekpe emem.+
33 Ntem, ke akpanikọ, owo mbufo ekededi eke mîsanake kpukpru se enye enyenede+ iyak ikemeke ndidi mbet mi.
34 “Ke akpanikọ, inụn̄ ọfọn. Edi edieke inụn̄ adabade, ẹdida nso ẹnam enye enem?+
35 Enye inamke ufọn ke isọn̄ inyụn̄ ifọnke ke ifụm. Mme owo ẹtop enye ẹduọk ke an̄wa. Yak owo eke enyenede utọn̄ ndikop okop.”+
