Mme Hebrew 1;1-14
1 Abasi, emi ke anyan ini ko akadade mme prọfet+ etịn̄ ikọ ke ediwak idaha+ ye ke ediwak usụn̄ ọnọ mme ete ete nnyịn,
2 ke utịt eyo emi+ ama etịn̄ ikọ ọnọ nnyịn ebe ke Eyen,+ emi enye ekemekde ete edi andida kpukpru n̄kpọ nnyene,+ okonyụn̄ adade enye anam+ editịm n̄kpọ emi.
3 Enye edi mbiet ubọn̄ esie+ ye ata mbiet idemesie,+ onyụn̄ ada ikọ odudu esie omụm kpukpru n̄kpọ akama;+ ndien ke enye ama akanam nnyịn isana ke idiọkn̄kpọ nnyịn+ enye osụhọde etetie ke ubọk nnasia+ Andinyene Ubọn̄ ke mme edikon̄ ebiet.+
4 Ntem enye amakabade okpon akan mme angel,+ tutu ekesịm udomo emi enye enyenede enyịn̄+ oro enen̄erede ọfọn akan eke mmọ.
5 Ke uwụtn̄kpọ, Abasi akanam ọdọhọ ewe angel ete: “Afo edi eyen mi; mfịn emi, ami mmakabade ndi ete fo”?+ N̄ko: “Ami nyedi ete esie, enye oyonyụn̄ edi eyen mi”?+
6 Edi ke ini enye afiakde ada Akpan esie+ edi isọn̄, enye ọdọhọ ete: “Yak kpukpru mme angel Abasi+ ẹnụhọ ẹnọ enye.”+
7 N̄ko, enye etịn̄ aban̄a mme angel ete: “Enye anam mme angel esie ẹdi spirit, onyụn̄ anam mme asan̄autom esie ẹdi edemeikan̄.”+
8 Edi ẹtịn̄ ẹban̄a Eyen ẹte: “Abasi edi ebekpo fo ke nsinsi+ nsinsi, ndien esan̄ ubọn̄ fo+ edi esan̄ ubọn̄ edinen ido.+
9 Afo amama edinen ido, onyụn̄ asua ubiatibet. Ntak edi oro Abasi, kpa Abasi fo, adade aran idatesịt eyet fi+ akan mme nsan̄a fo.”+
10 N̄ko: “Afo, O Ọbọn̄, ama esịn itiat idakisọn̄ ọnọ isọn̄ ke editọn̄ọ, mme heaven ẹnyụn̄ ẹdi utom ubọk fo.+
11 Mmọ ẹyetak, edi afo oyodu ke nsinsi; mmọ ẹyenyụn̄ ẹtaha nte ewụra,+
12 afo oyonyụn̄ ofụt mmọ nte akwa ọfọn̄idem,+ nte ewụra; ndien ẹyekpụhọde mmọ, edi afo ukpụhọkede, isua fo idinyụn̄ ikụreke.”+
13 Edi akanam enye ọdọhọ ewe angel ete: “Tie mi ke ubọk nnasia, tutu nda mme asua fo nnịm nte udoriukot fo”?+
14 Nte kpukpru mmọ idịghe mme spirit+ emi ẹnamde utom ẹnọ mme owo,+ emi ẹsion̄ode ẹdọn̄ ndisan̄a utom nnọ mmọ eke ẹdidade+ edinyan̄a ẹnyene?
