Utom 16;1-40
16 Ntre enye edisịm Derbe ye Lystra.+ Ndien, sese! mbet kiet odu do emi ekerede Timothy,+ eyen emi eka edide Jew emi enịmde ke akpanikọ, edi ete esie edi Greek,
2 ndien nditọete ke Lystra ye Iconium ẹtịn̄ nti ikọ ẹban̄a enye.
3 Paul ama ọdọhọ ke ikpama owo emi asan̄a ye imọ, ndien emen enye ekenịm mbobi+ ke ntak mme Jew emi ẹdude ke mme ebiet oro, koro kpukpru owo ẹfiọkde ke ete esie edi Greek.
4 Edi nte mmọ ẹsan̄ade ẹbe ke mme obio, mmọ ẹyak mme ewụhọ oro mme apostle ye mbiowo emi ẹdude ke Jerusalem ẹkewụkde ẹnọ mmọ oro ẹdude do.+
5 Ntre mme esop ẹka iso ndisọn̄ọ nda ke mbuọtidem+ nnyụn̄ ntọt ke ibat ke usen ke usen.
6 Akan oro, mmọ ẹsan̄a ẹbe ke Phrygia ye idụt Galatia,+ koro edisana spirit akpande mmọ ndikwọrọ ikọ ke Asia.*
7 N̄ko-n̄ko, ke ini mmọ ẹsịmde Mysia mmọ ẹdomo ndidụk Bithynia,+ edi spirit Jesus iyakke mmọ ẹdụk.
8 Ntre mmọ ẹsan̄a ẹbe Mysia ẹnyụn̄ ẹsụhọde ẹdi Troas.+
9 Ndien Paul okụt n̄kukụt+ ke okoneyo: owo Macedonia kiet ada ekpe enye ubọk ete: “Be di Macedonia din̄wam nnyịn.”
10 Ke ndondo oro enye okụtde n̄kukụt emi, nnyịn ima iyom ndika Macedonia,+ isịmde ubiere ite ke Abasi okot nnyịn ete ikatan̄a eti mbụk inọ mmọ.
11 Ntre nnyịn isio ke Troas iwat nnennen ibe ika Samothrace, edi ke ndan̄nsiere nnyịn isịm Neapolis,
12 inyụn̄ ito do ikesịm Philippi,+ obio emi odude ke idak ukara en̄wen, onyụn̄ edide ata akpan obio ke Macedonia.+ Nnyịn ika iso idu ke obio emi ke ndusụk usen.
13 Ndien ke usen sabbath nnyịn iwọrọ ke inuaotop ika mbeninyan̄, kpa ebiet emi nnyịn ikekerede ite itie akam odu; nnyịn inyụn̄ isụhọde itetie ikwọrọ ikọ inọ iban emi ẹkesopde idem.
14 Ndien n̄wan kiet emi ekerede Lydia, anyam-ọfọn̄ uduot mmọn̄ibọn̄, emi otode obio Thyatira+ onyụn̄ edide andituak ibuot nnọ Abasi, akpan̄ utọn̄, Jehovah onyụn̄ eberede enye esịt+ anam ọnọ ntịn̄enyịn ke mme n̄kpọ emi Paul etịn̄de.
15 Edi ke ini enye ye mbonufọk esie ẹma ẹkena baptism,+ enye ekpe ubọk ete: “Edieke mbufo ẹbatde ẹte ndi anam-akpanikọ nnọ Jehovah, ẹdụk ẹdidu ke ufọk mi.”+ Ndien enye ekpek nnyịn idi.+
16 Ndien edikem nte nnyịn ikade itie akam, ofụn an̄wan kiet emi enyenede spirit,+ kpa demon idiọn̄,+ osobo ye nnyịn. Enye esikọ uwak udori+ ọnọ mme eteufọk esie ke ndinam utom utịn̄ ini iso.
17 Eyenan̄wan emi aka iso etiene Paul ye nnyịn onyụn̄ ofiori+ ete: “Mmọ emi ẹdi ifịn Ata Edikon̄ Abasi, emi ẹkwọrọde usụn̄ edinyan̄a ẹnọ mbufo.”
18 Enye anam emi ediwak usen. Ke akpatre Paul ikemeke aba ndiyọ+ onyụn̄ ọwọn̄ọde ọdọhọ spirit oro ete: “Mmowụk fi ke enyịn̄ Jesus Christ nte ọwọrọ enye ke idem.”+ Ndien enye ọwọrọ kpa ke hour oro.+
19 Edi, ke ini mme eteufọk esie ẹkụtde ẹte idotenyịn udori mmimọ idụhe aba,+ mmọ ẹmụm Paul ye Silas ẹnyụn̄ ẹdụri mmọ ẹwọrọ ẹka an̄waurua* ke iso mme andikara,+
20 ndien ke ini ẹdade mmọ ẹdọk ẹkesịm iso mme ekpeikpe obio emi, mmọ ẹdọhọ ẹte: “Mme Jew emi ẹtịmede+ obio nnyịn etieti,
21 mmọ ẹnyụn̄ ẹkwọrọ ido+ oro ibet mînyịmeke nnyịn inịm m̀mê inam, sia nnyịn idide mbon Rome.”
22 Ndien otuowo ẹdaha ke enyọn̄ ọtọkiet ẹtịn̄ n̄kpọ ẹdian mmọ; ndien ke mme ekpeikpe obio ẹma ẹkewai mmọ ewụra ke idem ẹfep, ẹnọ uyo ẹte ẹda ikpa ẹmia mmọ.+
23 Ke ẹma ẹkemia mmọ ediwak ubọkikpa,+ ẹtop mmọ ẹdọn̄ ke ufọk-n̄kpọkọbi, ẹnyụn̄ ẹwụk ekpeme ufọk-n̄kpọkọbi ẹte etịm ekpeme mmọ.+
24 Sia enye ọkọbọde utọ ewụhọ oro, enye otop mmọ ọdọn̄ ke ata esịt esịt ufọk-n̄kpọkọbi+ onyụn̄ afat mmọ ukot ke ebuka.+
25 Edi ke ekperede ufọt okoneyo+ Paul ye Silas ẹbọn̄ akam ẹnyụn̄ ẹtoro Abasi ke ikwọ;+ ih, mbon n̄kpọkọbi ẹnyụn̄ ẹkop.
26 Kpa idaha oro akwa unyekisọn̄ etịbe, tutu itiat idakisọn̄ ufọk-n̄kpọkọbi enyek. Kpa idaha oro kpukpru usụn̄ ufọk-n̄kpọkọbi ẹberede, n̄kpọkọbi ẹnyụn̄ ẹkpọhọde kpukpru owo.+
27 Ke ini ekpeme ufọk-n̄kpọkọbi edemerede ke idap onyụn̄ okụtde nte mme usụn̄ ufọk-n̄kpọkọbi ẹbererede ẹna in̄wan̄, enye odụri akan̄kan̄ esie osio oyom ndiwot idem,+ ekerede ete mbon n̄kpọkọbi ẹma ẹbọhọ ẹfen̄e.+
28 Edi Paul ofiori ke ọkpọsọn̄ uyo, ete: “Kûnọ idemfo unan,+ koro kpukpru nnyịn mmọ mi!”
29 Ntre enye eben̄e ete ẹda utuenikan̄ ẹdi onyụn̄ obụmede odụk ufọk, idem onyụn̄ enyek enye, enye ọduọ+ ke iso Paul ye Silas.
30 Ndien enye ada mmọ ọwọrọ an̄wa okobụp ete: “Mme ete, nso ke nnyene ndinam+ man ẹnyan̄a mi?”
31 Mmọ ẹbọrọ ẹte: “Buọt idem ye Ọbọn̄ Jesus ndien ẹyenyan̄a+ fi, afo ye mbonufọk+ fo.”
32 Ndien mmọ ẹtịn̄ ikọ Jehovah ẹnọ enye ọkọrọ ye kpukpru mbon emi ẹdude ke ufọk esie.+
33 Ndien kpa ke hour oro ke okoneyo enye ada mmọ aka ekeyet nde unan mmọ; ndien, kpukpru mmọ, enye ye ufọk esie ẹna baptism+ ye unana ubiatini.
34 Ndien enye ada mmọ odụk ufọk esie onyụn̄ odori udia ke okpokoro ọnọ mmọ, enye ye ofụri ufọk esie ẹnyụn̄ ẹdara etieti ke emi enye ọbuọtde idem ye Abasi.
35 Ke ini eyo esierede, mme ekpeikpe obio+ ẹsio mme andikpeme ẹdọn̄ ẹkedọhọ ẹte: “Ẹsana iren oro ẹyak ẹnyọn̄ọ.”
36 Ntre ekpeme ufọk-n̄kpọkọbi emen ikọ mmọ eketịn̄ ọnọ Paul, ete: “Mme ekpeikpe obio ẹsio mme owo ẹdọn̄ ẹte ẹsana mbufo mbiba ẹyak ẹnyọn̄ọ. Ntem, ẹwọn̄ọ ẹnyọn̄ọ ke emem.”
37 Edi Paul ọdọhọ mmọ ete: “Mmọ ẹkemia nnyịn an̄wan̄wa ke ini ikpe mîbiomke nnyịn, nnyịn emi idide mbon Rome,+ ẹnyụn̄ ẹtop nnyịn ẹdọn̄ ke ufọk-n̄kpọkọbi; ndien nte mmọ ke emi ẹyom ndision̄o nnyịn ke ndịbe? Baba-o! edi yak mmọ ẹdi ke idemmọ ẹdision̄o nnyịn.”
38 Ntre mme andikpeme ẹmen ikọ emi ẹketịn̄ ẹnọ mme ekpeikpe obio. Ndịk anam mmọ ke ini mmọ ẹkopde ẹte mmọ oro ẹdi mbon Rome.+
39 Mmọdo mmọ ẹdi ẹdikpe mmọ ubọk, ndien ke ẹma ẹkesion̄o mmọ, mmọ ẹben̄e ẹte mmọ ẹkpọn̄ obio.
40 Edi mmọ ẹwọn̄ọ ke ufọk-n̄kpọkọbi ẹnyụn̄ ẹka ufọk Lydia, ndien ke ini mmọ ẹkụtde nditọete, mmọ ẹsịn udọn̄+ ẹnọ mmọ ndien ẹdaha ẹnyọn̄ọ.
