Utom 18;1-28
18 Ke mme n̄kpọ emi ẹma ẹkebe, enye ọkpọn̄ Athens edi Corinth.
2 Ndien enye okụt eyen Jew kiet emi ekerede Aquila,+ amanaisọn̄ eyen Pontus, ye Priscilla n̄wan esie, emi ẹketode Italy+ ẹdi ke ndondo oro ke ntak emi Claudius+ okowụkde ete kpukpru mme Jew ẹkpọn̄ Rome. Ntre enye aka ebịne mmọ
3 ndien sia enye anamde orụk ubọkutom kiet ye mmọ, enye odụn̄ ke ufọk mmọ, onyụn̄ anam utom+ ye mmọ, koro mmọ ẹkedide mme anam ufọkọfọn̄.
4 Edi, enye ọnọ utịn̄ikọ ke synagogue+ kpukpru sabbath onyụn̄ ekpek mme Jew ye mme Greek ẹnịm ke akpanikọ.
5 Edi, ke ini Silas+ ye Timothy+ ẹtode Macedonia ẹsụhọde ẹdi, Paul ọtọn̄ọ ndisịn idem ọkpọsọn̄ ọkpọsọn̄ ke ukwọrọikọ, ọnọ mme Jew ikọ ntiense ndiwụt nte ke Jesus edi Christ.+
6 Edi ke mmọ ẹdiọn̄de-diọn̄ ẹbiọn̄ọ ẹnyụn̄ ẹtịn̄de ikọ isụn̄i,+ enye eken̄ ọfọn̄idem+ esie onyụn̄ ọdọhọ mmọ ete: “Iyịp+ mbufo osụk ọkọbọ mbufo. Mmasana.+ Ọtọn̄ọde ke emi nyaka mbịne mbon idụt.”+
7 Mmọdo enye ọkpọn̄ do okodụk ufọk owo kiet emi ekerede Titius Justus, emi edide andituak ibuot nnọ Abasi, emi ufọk esie okonyụn̄ adade adiana synagogue.
8 Edi Crispus+ akwa owo emi etiede ibuot ke synagogue akabade edi andinịm Ọbọn̄ ke akpanikọ, kpasụk ntre ye ofụri ufọk esie. Ndien ediwak mbon Corinth emi ẹkekopde ẹtọn̄ọ ndinịm ke akpanikọ ẹnyụn̄ ẹna baptism.
9 Akan oro, Ọbọn̄ ọdọhọ Paul+ ke n̄kukụt ke okoneyo ete: “Kûfehe ndịk, edi ka iso nditịn̄ ikọ kûnyụn̄ udop uyo,
10 koro ami ndude ye afo+ ndien baba owo kiet idibụmekede in̄wana ye afo ndinam fi idiọk; koro mmenyene ediwak owo ke obio emi.”
11 Ntre ke enye odụn̄ do isua kiet ye ọfiọn̄ itiokiet, ekpep mmọ ikọ Abasi.
12 Ekem ke adan̄aemi Gallio edide andikara+ Achaia, mme Jew ẹdaha ye esịt kiet ẹnam ikọ ye Paul ẹnyụn̄ ẹda enye ẹka itie ikpe,+
13 ẹkedọhọ ẹte: “Owo emi ekpek+ mme owo ndituak ibuot nnọ Abasi ke usụn̄ en̄wen nte mîkemke ye ibet.”
14 Edi nte Paul oyomde nditat inua ntịn̄ ikọ, Gallio ọdọhọ mme Jew ete: “Ke akpanikọ, edieke ikọ emi akpaban̄ade ndudue m̀mê oburobụt edinam, O mme Jew, ami n̄kpenyene ntak ndinyene ime n̄kop se mbufo ẹtịn̄de.
15 Edi edieke edide eneni eke ẹnenide ẹban̄a ikọ ye enyịn̄+ ye ibet+ ke otu mbufo, mbufo ẹnyene ndise mban̄a oro. Nyomke ndidi ebiereikpe ke mme n̄kpọ emi.”
16 Ntre enye ebịn mmọ ke itie ikpe efep.
17 Ntre kpukpru mmọ ẹmụm Sosthenes+ akwa owo emi etiede ibuot ke synagogue ẹnyụn̄ ẹmia enye ke iso itie ikpe. Edi Gallio idọn̄ke enyịn ke mme n̄kpọ emi.
18 Nte ededi, ke Paul ama okodu do ediwak usen, enye ọkọm nditọete unyọn̄ onyụn̄ osio aka Syria, ndien Priscilla ye Aquila ẹsan̄a ye enye, sia enye ama akafat+ idet ibuot esie ke Cenchreae,+ koro enye akakan̄ade akan̄a.
19 Ntre mmọ ẹdisịm Ephesus, ndien enye ọkpọn̄ mmọ do; edi enye ke idemesie odụk synagogue+ onyụn̄ ọkọk ibuot ye mme Jew.
20 Okposụkedi mmọ ẹdiọn̄de-diọn̄ ẹben̄e enye ẹte amana etie ebịghi, enye inyịmeke
21 edi ọkọm mmọ unyọn̄+ onyụn̄ ọdọhọ mmọ ete: “Nyafiak ndise mbufo, ke Jehovah enyịmede.”+ Ndien enye osio ọkpọn̄ Ephesus
22 onyụn̄ osụhọde edi Caesarea. Ndien enye ọdọk ọkọkọm esop, onyụn̄ osụhọde aka Antioch.
23 Ndien ke enye ama okodu do ndusụk ini enye adaha akasan̄a ke ebiet ke ebiet ke idụt Galatia+ ye Phrygia,+ ọsọn̄ọ+ kpukpru mbet idem.
24 Edikem eyen Jew kiet emi ekerede Apollos,+ amanaisọn̄ eyen Alexandria, emi edide owo udọnikọ, edi Ephesus; enye ama onyụn̄ etịm ọfiọk N̄wed Abasi.+
25 Ẹma ẹteme owo emi usụn̄ Jehovah, ndien sia enye enyenede ifiopesịt ke spirit,+ enye etịn̄ onyụn̄ ekpep n̄kpọ aban̄ade Jesus nte enende, edi enye ekemehe ye baptism+ John kpọt.
26 Ndien owo emi ọtọn̄ọ nditịn̄ ikọ uko uko ke synagogue. Ke ini Priscilla ye Aquila+ ẹkopde ikọ esie, mmọ ẹda enye ẹdian idem ẹnyụn̄ ẹnam usụn̄ Abasi an̄wan̄a enye ata nnennen nnennen.
27 N̄ko n̄ko, sia enye okoyomde ndibe n̄ka Achaia, nditọete ẹwet n̄wed ẹnọ ẹsọk mme mbet, ẹteme mmọ ẹte ẹdara enye edifọn edifọn. Ntre ke ini enye esịmde do, enye enen̄ede an̄wam+ mbon oro ẹkenịmde ke akpanikọ oto ke mfọnido Abasi oro owo mîdotke;+
28 koro enye enen̄erede owụt an̄wan̄wa ete mme Jew ẹdue, ke adan̄aemi enye adade N̄wed Abasi+ owụt ete Jesus edi Christ.+
