Ntak Mme Owo Ẹsikerede ke Mmimọ Iwọrọke N̄kpọ?
NTAK NNYỊN MÎKPESIKEREKE KE NNYỊN IWỌRỌKE N̄KPỌ
Mbon emi mîsikereke ke mmimọ iwọrọke n̄kpọ ẹsisọn̄ọ ẹda ẹyọ se iwọrọde mmọ. Mmọ isisọpke iyak se iwọrọde mmọ anam idem emem mmọ.
-
Ndụn̄ọde kiet owụt ke mbon oro ẹsikerede ke mmimọ iwọrọke n̄kpọ ẹsiwak nditịmede esịt, ndinen̄ede mfụhọ, isinyụn̄ imaha ndidia udia. Ndien mmọ ẹsisọp ẹn̄wọn̄ mmịn ẹbe ubok m̀mê ẹda n̄kpọsọn̄ ibọk.
-
Mbon oro mîsikereke ke mmimọ iwọrọke n̄kpọ isidomoke idem ye mbon en̄wen, ndien oro esinam emem mmọ utom ndikpere mbon en̄wen idem nnyụn̄ nnyene nti ufan. Edi mbon oro ẹsikerede ke mmimọ iwọrọke n̄kpọ ẹsiwak ndikụt ndudue nnọ mbon en̄wen, ndien utọ ido oro esiwak ndidian̄ade mme ufan.
-
Mbon oro mîsikereke ke mmimọ iwọrọke n̄kpọ ẹsisọn̄ọ ẹda ẹyọ se iwọrọde mmọ; mmọ isiyakke se iwọrọde mmọ anam mmọ ẹtre ndinam se mmọ ẹkebierede ndinam. Edi mbon emi ẹkerede ke mmimọ iwọrọke n̄kpọ ẹsiwak ndida ekpri mfịna emi esịmde mmọ nte ata akamba n̄kpọ, ndien oro esisọp anam idem emem mmọ.
SE EKEMEDE NDINAM
Nam ufan ye mbon emi ẹdin̄wamde fi. Nam ufan ye mbon emi ẹsikponode owo, emi ẹnen̄erede ẹyom n̄kpọ ọfọn fi, emi ẹdinyụn̄ in̄wamde fi.
Sin̄wam mbon en̄wen. Edieke esifọnde ido onyụn̄ anamde n̄kpọ ọnọ mme owo—esịnede mbon oro mîdikemeke ndinọ fi usiene—oyokop ata inemesịt oro mbon oro ẹsinamde n̄kpọ ẹnọ owo ẹsikopde. Ekpededi mbon en̄wen ikwe se anamde oro, esịt edisụk inenem fi.
N̄wam nditọ fo ẹkûsukere ke mmimọ iwọrọke n̄kpọ. Usụn̄ kiet oro ekemede ndinam oro edi ndiyak nditọ fo ẹsikọk mfịna mmọ nte mmọ ẹkemede. Emi esin̄wam nditọwọn̄ ẹkpep ndiyọ se iwọrọde mmọ ẹnyụn̄ ẹkpep ndikọk ndusụk mfịna mmọ ke idemmọ. Mmọ ndikpep ndinam emi idiyakke mmọ ẹkere ke mmimọ iwọrọke n̄kpọ nte mmọ ẹsụk ẹkponde.
SE NNYỊN INAMDE
Mme mbono esop nnyịn ye se nnyịn isidade Bible ikpep mme owo an̄wam mme owo ẹkpụhọde uwem mmọ. Se mmọ ẹkpepde emi isiyakke mmọ ẹkere ke mmimọ iwọrọke n̄kpọ.
MME MBONO ESOP NNYỊN
Ke mme mbono esop oro isinịmde kpukpru urua, ẹsida Bible ẹneme ndinem Ikọ Abasi. Mme n̄kpọ ẹsinemede ke Bible mi ẹsịne mme n̄kpọ mme n̄kpọ oro ikpanamde man ikûsukere ke nnyịn iwọrọke n̄kpọ. Mme mbono esop nnyịn ẹdi ke mfọn, owo ekededi ekeme ndidụk. Ke uwụtn̄kpọ, ke mme mbono esop nnyịn . . .
-
eyekpep se inamde Abasi ada fi ke n̄kpọ
-
se akpadade uwem fo anam
-
nte ekemede ndika iso nnyene nti ufan
Oyokụt n̄ko nti ufan emi ‘ẹkerede ẹban̄a kiet eken.’—1 Corinth 12:25, 26.
Edieke oyomde ndidiọn̄ọ mme n̄kpọ en̄wen mban̄a mme mbono esop nnyịn, ka jw.org koyom ekpri vidio emi Nso ke Ẹsinam ke Ufọkmbono Obio Ubọn̄?
IMESIKPEP MME OWO BIBLE
Imesida n̄wed Du Ata Uwem ke Nsinsi! ineme ikọ Abasi ye mme owo ke mfọn. N̄wed emi ọdọn̄ọ ediwak itie Bible, se ẹnemede onyụn̄ an̄wan̄a owo. Nti mbụme emi an̄wamde owo ekere n̄kpọ, mme vidio emi otụkde owo, ye ndiye ndise mmọdo n̄ko ke n̄wed emi. Se isidade Bible ikpep mme owo esin̄wam mmọ ẹkpụhọde nte mmọ ẹdude uwem ndien emi isiyakke mmọ ẹkere ke mmimọ iwọrọke n̄kpọ.
Edieke oyomde ndidiọn̄ọ nte ndikpep Bible ye Mme Ntiense Jehovah ekemede ndin̄wam fi, ka jw.org koyom ekpri vidio emi Ntak Emi Ekpekpepde Bible?
Ekeme Ndidi Ayama Mmọ Emi N̄ko
ẸDEMEDE!
Nte Ẹkpekponode Kiet Eken
Ana n̄wan ye ebe ẹkpono kiet eken kpukpru ini. Ntre, nso ke akpanam man owụt n̄wan m̀mê ebe fo ke imokpono enye?
ABAN̄A NNYỊN
Dọhọ Mmọ Ẹdi Ufọk
Se nte Bible ekemede ndibọrọ mbụme fo, mîdịghe kpep n̄kpọ ban̄a Mme Ntiense Jehovah.
