Ntak Mme Owo Mîkponoke Kiet Eken ke Ubon?
NTAK ỌFỌNDE ẸKPONO KIET EKEN KE UBON
Kpukpru owo ke ubon ẹma ẹkpono kiet eken, emem esidu ke utọ ufọk oro.
-
N̄wed emi ẹkotde The Seven Principles for Making Marriage Work ọdọhọ ke edieke ebe ye n̄wan ẹkponode kiet eken, ke mmọ ẹsitetịn̄ ẹnyụn̄ ẹnanam ẹwụt nte mmọ ẹmade kiet eken “idịghe ke ikpọ ikpọ n̄kpọ kpọt, edi ke ata n̄kpri n̄kpri n̄kpọ kpukpru usen.”
-
Ndụn̄ọde kiet owụt ke nditọ emi ẹkpepde mmọ ndikpono owo ẹsikop idem inem, ẹkpere ete ye eka mmọ idem, isinyụn̄ iwakke ndinyene editịmede esịt m̀mê udọn̄ọ ibuot.
SE ẸKEMEDE NDINAM
Ẹtie ntre nte ubon ẹbiere se ẹdinamde. Akpa, kụt ete ke kpukpru owo ke ubon ẹdiọn̄ọ se “ndikpono” kiet eken ọwọrọde. Ọyọhọ iba, wewet mme n̄kpọ mme n̄kpọ oro anade kpukpru owo ke ubon ẹnam man ẹkpono kiet eken ye mme n̄kpọ oro owo mîkpanamke. Ọyọhọ ita, ẹtie ntre nte ubon ẹneme se ẹkebierede oro man mbufo ye nditọ mbufo ẹdiọn̄ọ se ẹkpenamde man ẹsikpono kiet eken.
Ẹnanam ẹwụt. Ndi emesima ndikọn̄ nyire ke se mbonubon fo mînamke ọfọn, esuene mmọ ke ini mmọ ẹtịn̄de se mmọ ẹkerede, esịbe mmọ ikọ esịn ke idịbi mîdịghe amia utọn̄ osio ke ini mmọ ẹtịn̄de ikọ ẹnọ fi? Kûfre ke ana ada iso ke ndikpono kiet eken.
Nam emi ise: Domo ndida ke ndikpono ebe m̀mê n̄wan fo ye nditọ fo edi isọn emi akamade mmọ, ekpededi mmọ ẹdot ukpono oro mîdotke.
Ẹsikpono kiet eken ekpededi mbufo inyeneke ukem ekikere. Ke ini oyomde nditịn̄ nte etiede fi ke idem, kûsuma ndidọhọ “esisụk” mîdịghe “akananam afo.” Ndisitịn̄ utọ ikọ oro esibiak owo odụk ọkpọ onyụn̄ anam ekpri ikọ emi okodude etie nte edi akamba n̄kpọ.
SE NNYỊN INAMDE
Nnyịn Mme Ntiense Jehovah imesin̄wam mme owo ẹkpono kiet eken ke ubon, imesiwak ndineme mban̄a emi ke nsio nsio ibuotikọ nnyịn, mme n̄wed nnyịn, mme n̄kpri ndiye n̄wed nnyịn, ye mme vidio oro ision̄ode. Mme n̄kpọ emi ẹdi ke mfọn.
EBE YE N̄WAN: Nsio nsio ibuotikọ oro idọn̄de ke ikpehe Se Idin̄wamde Ubon ke ikpehe Intanet nnyịn ẹkeme ndin̄wam ebe ye n̄wan . . .
-
ẹsikpan̄ utọn̄ ẹnọ kiet eken
-
ẹkûsudop kiet eken uyo
-
ẹtre mfan̄a ye utọk
(Taip “Se Idin̄wamde Ubon” ke ebiet emi okụtde “Yom” ke jw.org)
MME ETE YE EKA: Nsio nsio ibuotikọ oro idọn̄de ke ikpehe Se Idin̄wamde Ubon ke ikpehe Intanet nnyịn ẹkeme ndin̄wam mme ete ye eka ẹsikpep nditọ mmọ . . .
-
ẹsikop item
-
ẹsin̄wam ẹnam n̄kpọ ke ufọk
-
ẹsidọhọ “mbọk” ye “sọsọn̄ọ”
(Taip “Raising Children” ye “Raising Teenagers” ke ebiet emi okụtde “Yom” ke jw.org)
Se n̄ko appendix emi “Mme Mbụme Oro Mme Ete ye Eka Ẹbụpde” ke n̄wed Mme Mbụme Oro N̄kparawa Owo Ẹbụpde—Mme Ibọrọ Oro Ẹnyenede Ufọn, Eboho 1. (Taip “Mme Mbụme Oro Mme Ete ye Eka Ẹbụpde” ke ebiet emi okụtde “Yom” ke jw.org)
MME UYEN: Ke ikpehe emi Mme Uyen ye N̄kparawa ke jw.org, imọdọn̄ mme ibuotikọ, mme vidio, ye n̄wed emi mme uyen ẹkpewetde se mmọ ẹkerede. Mme n̄kpọ emi ẹkeme ndin̄wam mme uyen . . .
-
ẹtie ke emem ye ete ye eka ye nditọeka mmọ
-
ẹsitịn̄ ikọ ukpono ukpono ye ete ye eka mmọ ẹban̄a mme ibet oro mmọ ẹnịmde ke ufọk
-
ẹdu uwem emi anamde mme ete ye eka mmọ ẹnyene mbuọtidem ke idem mmọ
(Taip “Mme Uyen ye N̄kparawa” ke ebiet emi okụtde “Yom” ke jw.org)
Ikpehe Intanet nnyịn emi jw.org edi ke mfọn. Owo isikpehe okụk, owo inyụn̄ ibiereke okụk oro anade owo ekpe kwa ọfiọn̄ mbemiso odụkde, idịghe ededi owo Ntiense Jehovah afo odụk, owo idinyụn̄ ibụpke fi n̄kpọ iban̄a idemfo mbemiso ẹyakde odụk.
