SE BIBLE ETỊN̄DE: “Akananam baba owo kiet isuaha obụkidem esie; edi ọbọbọk onyụn̄ ama enye.”—Ephesus 5:29.

NSO KE EMI ỌWỌRỌ? Itien̄wed emi owụt ke akpana inam se ikemede man ise iban̄a idem nnyịn. Ndụn̄ọde kiet oro ẹkenamde owụt ke nte mme owo ẹsidude uwem esinam mmọ ẹdọn̄ọ ndusụk udọn̄ọ. Ntre, enyene se akpanamde man udûsọp udọn̄ọ.

SE AKPANAMDE:

• Udia. Kụt ete ke emesidia nti udia onyụn̄ ọn̄wọn̄ ediwak mmọn̄.

• Sịn̄ede Idem. Ndisịn̄ede idem isiyakke owo ọsọp ọdọn̄ọ, edide eyenọwọn̄, akwa owo, m̀mê owo emi obiomode ndo. Ndisịn̄ede idem ekeme n̄ko ndinam idem afiak efere owo emi ọdọn̄ọde. Mme ufan fo, mbonubon fo, ye mme dọkta ẹkeme nditịn̄ nte ẹkpesisịn̄erede idem, edi mmọ idisịn̄ekede idem inọ fi!

• De Idap Ọfọn. Ediwak owo ẹsida ini emi mmọ ẹkpedede idap ẹnam n̄kpọ en̄wen. Mbon emi ẹsiwakde nditaba idap ẹkeme ndidọn̄ọ ata idiọk udọn̄ọ nte ini akade. Edi edieke esidede idap ọfọn, udûsọpke udọn̄ọ.

SE BIBLE ETỊN̄DE: “Ẹyak nnyịn iyet kpukpru se isabarede obụkidem ye spirit ifep ke idem nnyịn.”—2 Corinth 7:1.

NSO KE EMI ỌWỌRỌ? Sika, un̄wọn̄, ye mme n̄kpọ ntre esinam ediwak owo ẹdọn̄ọ mîdịghe owowot  ndusụk owo. Edieke mûdaha mme n̄kpọ emi usabade idem fo, udûdọn̄ọke ndusụk udọn̄ọ.

SE AKPANAMDE: Wet usenọfiọn̄ emi editrede mme n̄kpọ emi mîfọnke owo ke idem. Mbemiso usen oro esierede, duọn̄ọ kpukpru sika, un̄wọn̄, iko-un̄wọn̄, udaikan̄, ye mme n̄kpọ eken oro esidade anam mme n̄kpọ emi. Kûka itie emi mme owo ẹsinamde mme n̄kpọ emi. Dọhọ mme ufan fo ye mbonubon fo ke omoyom nditre mme n̄kpọ emi man mmọ ẹn̄wam fi.

KÛNAM N̄KPỌ EMI EKEMEDE NDINỌ OWO UNAN.

“Edieke ọbọpde obufa ufọk, afo enyene ndibọp ibio ibibene ke ọkọm ufọk fo, mbak ududa ubiomikpe iyịp udori ufọk fo koro owo ekeme ndidian̄ade nduọ.”—DEUTERONOMY 22:8.

KÛSỌP IYATESỊT.

“Owo eke mîsọpke iyatesịt enyene akwa mbufiọk, edi owo eke ananade ime owụt ndisịme esie.”—MME N̄KE 14:29.

KÛMA UDIA.

“Kûdu ke otu mme . . . ama-udia.”—MME N̄KE 23:20, 21.