“Mme Ntiense Jehovah oro ikesifọnke ido ye mme owo kpọt, ẹma ẹsifọn ido ye mme ebua mi n̄ko. Usen kiet, owo mmọ kiet emi ekerede Elaine ama ọnọ ebua mi mbiba biskit. Ọtọn̄ọde ke usen oro, ekesidi mma nsasan̄a nsịm n̄kan̄ oro, mme ebua mi ẹmọn̄ ẹdụri mi ẹka do man ẹkebọ biskit.

“Nte ekesitiede edi oro ke ufan̄ ọfiọn̄ ifan̄. Ima isịm do, mme ebua mi ẹyeta biskit, mmọ ẹda ini oro ẹneme ekpri nneme ikọ Abasi ye ami. Edi ikọdọn̄ke mi ndinen̄ede ndian idem ye mmọ. Mma mbe isua 70 ini oro, n̄konyụn̄ ndiọn̄ọke se Mme Ntiense Jehovah ẹsikpepde. Mme ufọkabasi emi n̄kakade ikọnọhọ mi se n̄koyomde. Ntre mma n̄kere ke mfọnn̄kan n̄kpọ edi nditie ke idemmi n̄kpep Bible.

“Ke ufan̄ ini oro, mma nsikụt Mme Ntiense Jehovah ẹdade ye ukpatn̄kpọ ẹkwọrọ ikọ ke mme itie en̄wen ke obio nnyịn oro. Mmọ n̄ko ẹma ẹsifọn ido ye mme owo. Mmọ ẹma ẹsida Bible ẹbọrọ mme mbụme mi, ndien emi ama anam ntọn̄ọ ndian idem ye mmọ.

“Usen kiet, Elaine ama obụp mi, ‘Ndi emenịm ke mme unam ẹdi enọ Abasi?’ Mma ndọhọ enye ke mmenen̄ede nnịm. Ekem Elaine ama okot Isaiah 11:​6-9 ọnọ mi. Tọn̄ọ usen oro, mma nyom nditọn̄ọ n̄kpep Bible, edi n̄kosụk nyomke ndibọ n̄wed mmọ.

“Elaine ye Brent ebe esie ẹma ẹsineme ikọ Abasi ye ami. Kpa ye emi ekesidide ibio ibio, ama esinem etieti. Mmọ ẹma ẹdọhọ yak n̄kot n̄wed Matthew nsịm n̄wed Utom man ndiọn̄ọ se owo ndidi Christian ọwọrọde. Mma n̄kot, ndien ikebịghike mma nnyịme Brent ye Elaine ẹsikpep mi Bible. Ekedi ke ufọt isua 2016.

“Kpukpru urua, n̄kesitetie mbet usen ukpepn̄kpọ mi ye usen mbono esop. Ama esinem mi etieti ndikpep akpanikọ ke Bible. Ke isua kiet ye n̄kpọ ama ekebe, mma nna baptism. Idahaemi ndi isua 79. Enem mi etieti ndidu ke nnennen ido ukpono. Jehovah ọdiọn̄ mi ke ndinam nsịne ke otu mme asan̄autom esie emi ẹyakde idem ẹnọ enye.”