LISA etịn̄ akpa n̄kpọ emi akanamde imọ ima Mme Ntiense Jehovah. * Enye ọkọdọhọ ete: “Nte nditọete ẹkefọnde ido ye ami ekenen̄ede odụk mi esịt.” Ntre n̄ko ke ekedi ye Anne. Enye ọkọdọhọ ete: “Inen̄ekede idi se Mme Ntiense Jehovah ẹkpepde akanam nyom ndidi owo mmọ. Nte mmọ ẹkefọnde ido ye ami akanam.” Idahaemi, esinem sista iba emi ndikot Bible nnyụn̄ ntie n̄kere se mmọ ẹkotde, edi mfọnido nditọete akanam enen̄ede ọdọn̄ mmọ ndidụk esop Abasi.

Didie ke ikpọfọn ido ye mbon emi ẹdude ẹkpere nnyịn yak odụk mmọ esịt? Yak ineme usụn̄ iba: (1) se itịn̄de, (2) se inamde. Ekem iyeneme m̀mê ikpọfọn ido ye mmanie.

Bible ọdọhọ ke “ibet ima-mfọnido” odu ke edeme eti an̄wanndọ emi ẹtịn̄de ẹban̄a ke Mme N̄ke ibuot 31. (N̄ke 31:26) Enye ayak “ibet” oro an̄wam enye ọdiọn̄ọ se enye ekpetịn̄de ye nte enye ekpenịmde uyo etịn̄. Ọfọn “ibet” emi odu ke edeme mme ebe ye mme ete n̄ko. Ediwak ete ye eka ẹdiọn̄ọ ke nditịn̄ ikọ emi abiakde eyen mmimọ isifọnke ye eyen oro. Edieke ikọ mmọ ekịmde-kịm eyen mmọ mîdịghe etiede nte ẹtọhọ ye asua, ekeme ndinam eyen oro idikpan̄ke utọn̄ inọ mmọ. Ntre mmọ nditịn̄ ikọ ọfọn ayanam ikọ mmọ enenem eyen mmọ, se mmọ ẹtịn̄de oyonyụn̄ odụk enye esịt.

Edide emenyene eyen m̀mê unyeneke, akpanam didie esitịn̄ ikọ yak owụt ke ọmọfọn ido? Akpa ikpehe ke Mme N̄ke 31:26 owụt se akpanamde. Itie oro ọdọhọ: “Enye atat inua esie ke ọniọn̄.” Oro ọwọrọ yak etịm ekere se oyomde nditịn̄ ye nte edinịmde uyo itịn̄. Se idin̄wamde nnyịn edi ndisibụp idem nnyịn, ‘Ndi se nyomde nditịn̄ emi ayanam mme owo ẹyat esịt, m̀mê edinam emem odu?’ (N̄ke 15:⁠1) Ọfọn ikere kan̄a mbemiso itịn̄de ikọ ekededi.

N̄ke en̄wen ke Mme N̄ke 12:18 owụt ke ikọ emi ẹtịn̄de owo ikereke etie nte ndimen akan̄kan̄ n̄kịm owo. Ke ini itiede ikere nte ikọ nnyịn m̀mê nte uyoikọ nnyịn editiede mbon en̄wen ke idem, oro ekeme ndinam ikpeme se itịn̄de. Edieke iyakde “ibet ima-mfọnido” an̄wam nnyịn itịn̄ ikọ, ikọ emi abiakde owo odụk ọkpọ idiwọrọke nnyịn ke inua, nnyịn idinyụn̄ itịn̄ke ikọ nte itọtọhọ ye owo. (Eph. 4:​31, 32) Iyosion̄o ndiọi ekikere ye ndiọi ikọ unyọn̄, inyụn̄ itọn̄ọ ndisitịn̄ ikọ emi enemde-nem owo. Nte Jehovah eketịn̄de ikọ ye Elijah asan̄autom esie emi idem ekenyekde edi se ikpebede. Angel emi Jehovah akadade etịn̄ ikọ ye Elijah eketịn̄ ikọ ke “sụn̄sụn̄ ekpri uyo.” (1 Ndi. 19:12) Edi idịghe nditịn̄ ikọ ọfọn kpọt owụt ke imọfọn ido, ana inanam n̄kpọ n̄ko iwụt. Idinam nso?

Ke ini itịn̄de ikọ inyụn̄ inamde n̄kpọ ọfọn ye mme owo, ikpebe Jehovah. (Eph. 4:32; 5:​1, 2) Lisa emi iketịn̄de iban̄a etịn̄ nte Mme Ntiense Jehovah ẹkefọnde ido ye imọ ete: “Enyene ini emi akanade ubon nnyịn ẹsọsọp ẹwọrọ ẹkpọn̄ akpa itie emi ikodụn̄de. Brọda iba ye iban mmọ ẹma ẹfiak utom ẹdin̄wam nnyịn itan̄ n̄kpoduoho nnyịn. Ini oro n̄kọtọn̄ọke ndikpep Bible ye Mme Ntiense Jehovah kan̄a!” Se nditọete oro ẹkenamde ama anam Lisa oyom ndinen̄ede ndiọn̄ọ n̄kpọ mban̄a Mme Ntiense Jehovah.

 Anne emi iketịn̄de iban̄a ama ama n̄ko nte Mme Ntiense Jehovah ẹkefọnde ido ye enye. Enye ọkọdọhọ ete: “Nte ererimbot etiede ama anam nsikpekpeme idem n̄kaha. Ama ọsọn̄ mi ndiberi edem ke owo ekededi. Ini Mme Ntiense Jehovah ẹtọn̄ọde ndineme Ikọ Abasi ye ami, n̄kayakke idem nnọ mmọ. Mma n̄kere, ‘Nso inam mmọ ẹfọn ido ntem ye ami?’ Edi mma ndikụt ke mfọnido sista emi ekekpepde mi Bible okoto enye esịt. Oro ama anam mberi edem ke enye.” Didie ke emi akan̄wam Anne? Enye ọdọhọ ete, “Nte ini akakade, mma ntọn̄ọ ndinen̄ede nsịn esịt ke se ẹkekpepde mi.”

Omokụt do ke nte nditọete ẹkefọnde ido ye Lisa ye Anne ama otụk mmọ onyụn̄ anam mmọ ẹnen̄ede ẹyom ndidiọn̄ọ se Bible ekpepde. Mfọnido nditọete akanam mmọ ẹma Jehovah ye nditọete ke ofụri esịt.

Ndusụk owo ẹkeme ndisitịn̄ ikọ ọfọn ye owo ẹsinyụn̄ ẹtuak inua imam sia ido mmọ edi oro, nte ẹkebọkde mmọ edi oro, mîdịghe nte esinyụn̄ ẹnamde ke edem mmọ edi oro. Inyeneke se idiọkde do. Edi ekpedi n̄kukụre n̄kpọ emi  isinamde iwụt ke imọfọn ido ye mme owo edi oro, ekeme ndinam mfọnido nnyịn idịghe utọ enye emi Abasi ekpepde nnyịn.​—Men Utom 28:2 domo.

Utọ mfọnido emi Abasi ekpepde nnyịn edi edu emi spirit esie esinamde owo enyene. (Gal. 5:​22, 23) Spirit Abasi kpọt ekeme ndin̄wam nnyịn ifọn ido ye mme owo nte Abasi ọdọhọde. Ima ifọn ido ye mme owo ntre, ọwọrọ ikpebe Jehovah ye Jesus. Sia idide mme Christian, imesinen̄ede ikere iban̄a mme owo. Ima emi imade Jehovah Abasi ye mme owo esinam ikere iban̄a mmọ. Utọ ima oro esinam mfọnido nnyịn oto esịt, onyụn̄ edi se Abasi amade.

Ekeme ndimem nnyịn utom ndifọn ido ye mbon emi ẹma ẹkefọn ido ye nnyịn mîdịghe ye mbon emi idiọn̄ọde, inyụn̄ ikọm mmọ ke se mmọ ẹkenamde ẹnọ nnyịn. (2 Sam. 2:6; Col. 3:15) Edi idinam didie ekpedi enyene owo emi ikerede ke ikpanaha ifọn ido ye enye?

Kere ise: Jehovah esifọn ido ye mme owo kpa ye emi mmọ mîdotke mfọnido esie. Enye onyụn̄ anam ntre akan owo ekededi. Bible ekpep nnyịn akpan n̄kpọ kiet aban̄a nte ikemede ndifọn ido ye mme owo kpa ye emi mmọ mîdotke mfọnido nnyịn. Ikọ oro “mfọnido oro owo mîdotke” odu ke ata ediwak itie ke N̄wed Abasi Christian Usem Greek. Didie ke Jehovah esifọn ido ye nnyịn?

Tọn̄ọ ẹkebot owo, Jehovah ọfọn ido ye kpukpru owo onyụn̄ ọnọ mmọ se ẹdade ẹdu uwem. (Matt. 5:45) Jehovah ọkọtọn̄ọ ndifọn ido ye nnyịn idem mbemiso nnyịn idiọn̄ọde enye. (Eph. 2:​4, 5, 8) Ke uwụtn̄kpọ, enye ama ọnọ ikpọn̄-ikpọn̄ edibon Eyen esie edikpa afak mme owo. Se Jehovah ọkọnọde nnyịn oro ekedi mfọnn̄kan n̄kpọ emi enye enyenede. Apostle Paul ọkọdọhọ ke Jehovah ọkọnọ ufak “nte asan̄ade ekekem ye akpakịp mfọnido esie oro owo mîdotke.” (Eph. 1:⁠7) N̄kpọ efen edi ke kpa ye emi isiduede Jehovah inyụn̄ inamde se ibiakde enye, enye osụk akaka iso ada nnyịn usụn̄ onyụn̄ ekpep nnyịn n̄kpọ. Se enye esikpepde nnyịn ye mme ikọ emi enye esitịn̄de ye nnyịn ẹtie nte “n̄ken̄e ukot edịm,” itọhọ-tọ nnyịn ke idem nte ikpọ ukot edịm. (Deut. 32:⁠2) Idụhe se ikemede ndinọ Jehovah yak ekem ke kpukpru mfọn emi enye ọfọnde ye nnyịn. Mîkpedịghe emi Jehovah ọfọnde uwem ye nnyịn, nnyịn ikpekemeke ndidori enyịn ke n̄kpọ ọyọfọn ye nnyịn ke ini iso.​—Men 1 Peter 1:13 domo.

Imokụt ke nte Jehovah ọfọnde ido ye nnyịn otụk nnyịn esịt onyụn̄ anam ikpere enye. Ke ntak oro yak ikpebe Jehovah, ikûsasat mbon emi idinamde nti n̄kpọ inọ. Utu ke oro, yak ifọn ido ye mme owo kpukpru usen. (1 Thess. 5:15) Edieke isifọnde ido ye mme owo, iditie nte ikan̄ emi owo ewebede ke ini etuep. Iyanam uwem enem mbonubon nnyịn, nditọete nnyịn, mbon itieutom nnyịn, nditọ ufọkn̄wed nnyịn, ye mbọhọidụn̄ nnyịn.

Kere ise m̀mê enyene mme owo ke ubon mbufo m̀mê ke esop mbufo emi ekemede ndinam uwem emem mmọ ke ntak nti ikọ emi etịn̄de ye mmọ ye nti n̄kpọ emi anamde ọnọ mmọ. Owo ekeme ndidu ke esop mbufo emi enen̄erede oyom eke edin̄wamde inam ufọk imọ asana, inam utom ke in̄wan̄esa imọ, mîdịghe an̄wam imọ ekedep n̄kpọ. Edieke akade ukwọrọikọ okokụt owo emi oyomde un̄wam, ndi emekeme ndin̄wam?

Ẹyak ikpebe Jehovah, isiyak “ibet ima-mfọnido” an̄wam nnyịn itịn̄ nti ikọ inyụn̄ inam nti n̄kpọ inọ mme owo.