Tịn̄ n̄kpọ ban̄a idem fo.

Ete mi ekedi ekịm ikpaukot; eka mi anam utom ke in̄wan̄. Edi n̄koyom ndidi ataifiọk. Mma nsinen̄ede mma ndiye frawa, mme inuen, ye n̄kpri unam eken. Mma ndiọn̄ọ ke idịghe ifiọk owo ke ẹkeda ẹbot mmọ.

Ndi emi ọwọrọ ke afo ama enịm ke Abasi odu toto ke uyen?

Ihih. Ke nditịn̄ akpanikọ, n̄kọtọn̄ọ ke ekpri n̄kere ke etie nte Abasi idụhe. Ke ini udọn̄ọ esịt okowotde ete mi, mma n̄kere m̀mê ntak emi Owo emi okobotde utọ ndiye n̄kpọ emi ẹyọhọde ekondo mi akpayakde owo ọbọ ufen onyụn̄ akpa.

Ndi ifiọk ntaifiọk ama anam ọfiọk ntak?

N̄kọsọpke mfiọk ntak. Ke ini n̄kakabarede ndi ataifiọk emi ekpepde n̄kpọ aban̄a odu-uwem n̄kpọ, mma ntọn̄ọ ndikpep mban̄a n̄kpa. Ntịn̄ke mban̄a ntak emi ndusụk nsen ẹsikpan̄ade owo ke idem afai afai tutu idem obụp owo odụk ebende. Edi ntịn̄ mban̄a ntak emi kpukpru nsen idem owo ẹnyenede ini emi mmọ ẹsikpan̄ade. Okposụkedi mmọ ndikpan̄a ntem akam edide ke ufọn nnyịn, ibịghike ntaifiọk ẹketọn̄ọ ndidụn̄ọde ntak emi mme nsen idem owo ẹnyenede akpan ini emi mmọ ẹsikpan̄ade.

Ntak emi anade nsen idem owo ẹkpan̄a ke edikem ini?

Nsen emi ẹdude nnyịn ke idem ẹwak etieti. Kpukpru n̄kani nsen ẹnyene ndikpan̄a man mbufa ẹda itie mmọ. Orụk nsen kiet kiet ẹnyene ini emi mmọ ẹsikpan̄ade. Idem nnyịn esision̄o ndusụk nsen kpukpru urua ifan̄, onyụn̄ osion̄o mbon eken kpukpru isua ifan̄. Owo ekeme ndinyene akamba mfịna edieke idem esie osion̄ode nsen ẹwak ẹkan mbon oro ẹkpan̄ade, m̀mê edieke nsen oro ẹkpan̄ade  ẹwakde ẹkan mbon oro idem esie osion̄ode.

Nso utọ mfịna ke ẹkeme ndinyene?

Ndụn̄ọde oro ndusụk ntaifiọk ẹnamde owụt ke owo ekeme ndidọn̄ọ ewan̄kọ m̀mê kansa edieke nsen mîkpaha enye ke idem ini emi akpakpade. Edieke nsen onyụn̄ akpade owo ke idem ke ini mîkemke, owo oro ekeme ndidọn̄ọ ata idiọk udọn̄ọ mmemidem emi ẹkotde Parkinson m̀mê udọn̄ọ ibuot emi ẹkotde Alzheimer. Ke nnam ndụn̄ọde mban̄a nte ẹdisan̄ade ikọk mme udọn̄ọ emi.

Didie ke ndifiọk ke nsen kiet kiet ẹnyene ini emi mmọ ẹsikpan̄ade okotụk fi?

Ke nditịn̄ akpanikọ, idem ama akpa mi. Emi ama anam n̄kụt ke Owo emi akanamde utọ utịbe utịbe n̄kpọ emi esịn nnyịn ke idem ikoyomke n̄kpọ anam nnyịn. Edi n̄kosụk mfiọkke ntak emi owo esibọde ufen onyụn̄ akpade.

Ndi ama enịm ke enyene owo emi akanamde nsen idem owo ẹsikpan̄a ke ini?

Ih, mma nnịm. Nte n̄kpọ emi etiede enen̄ede ayan̄a owo ifiọk! Abasi kpọt ekeme ndinam utọ n̄kpọ emi. Mma nda ukwak use n̄kpọ oro okopde odudu nse ndyọ ndyọ usụn̄ oro n̄kpọ emi esisan̄ade etịbe. Edieke idem owo oyomde ndision̄o mbufa nsen, n̄kpọ esitịbe inikiet inikiet ke idem owo man n̄kani nsen ẹtọn̄ọ ndikpan̄a. N̄kani nsen emi ẹsikam ẹtiene ẹwot idem mmọ. Ke akpanikọ, nte n̄kpọ emi etiede enen̄ede enyene ndyọ!

Akasan̄a didie ọdiọn̄ọ Abasi ye ntak emi enye ayakde owo ọbọ ufen?

N̄kparawa iba emi ẹdide Mme Ntiense Jehovah ẹma ẹwaha edem mi ke 1991, ntre mma mbụp mmọ ntak emi owo esikpade. Mmọ ẹma ẹwụt mi ibọrọ ke Bible. Itie oro mmọ ẹkewụtde mi okot ete: ‘Idiọkn̄kpọ okoto owo kiet odụk ererimbot, n̄kpa onyụn̄ oto ke idiọkn̄kpọ oro odụk.’ (Rome 5:12) Emi ọwọrọ ke Adam ikpakakpaha tutu amama ekpedi enye ama okop uyo Abasi. Mma nsọsọp n̄kụt ke emi ekekem ye se n̄kekpepde mban̄a idem owo. Nte idem owo etiede owụt ke Andibot ikoyomke owo akpa. Sia idem owo esision̄ode mbufa nsen ke ndondo oro n̄kani ẹkpan̄ade, emi owụt ke owo ekeme ndidu uwem ke nsinsi.

Nso ikanam fi enịm ke Bible edi Ikọ Abasi?

Mma n̄kụt se Bible etịn̄de aban̄a Abasi ke Psalm 139:16. Itie oro ọdọhọ ete: “Enyịn fo ama okụt mi ke ini n̄kedide ọbọn̄eyen, ndien ẹma ẹwewet kpukpru ndido esie ẹsịn ke n̄wed fo.” Mma n̄kpep kpukpru se iban̄ade idem owo, emi ẹwetde ẹsịn ke nsen idem owo, ke ufọkn̄wed ntaifiọk. Andiwet psalm akasan̄ade didie ọfiọk kpukpru emi? Ntre, nte n̄kakade iso n̄kpep Bible, ntre ke n̄kokụt ke Abasi ọkọnọ mme owo odudu spirit esie ẹda ẹwet Bible.

Akasan̄a didie ọfiọk se Bible enen̄erede ekpep?

Owo kiet emi edide Ntiense Jehovah ama enyịme ndikpep mi Bible. Mma ndi ndifiọk ntak emi Abasi ayakde ibọ ufen. Mma nnyụn̄ n̄kụt ke Bible nte ke Abasi “eyemen n̄kpa emen ke nsinsi.” (Isaiah 25:8) Isọn̄ke Enye emi okobotde nnyịn ndinam utịbe utịbe n̄kpọ emi enye okobotde ọdọn̄ nnyịn ke idem ẹsan̄a nte ọfọnde man nnyịn ikeme ndidu uwem ke nsinsi.

Didie ke ada se afo ọfiọkde ke Bible an̄wam mme owo?

Mmekpep ediwak owo se mfiọkde ke Bible tọn̄ọ n̄kakabade ndi Ntiense Jehovah ke 1995. Ke uwụtn̄kpọ, ibuot ama oyon̄ owo itieutom nnyịn ke ini eyeneka esie okowotde idem. Ẹkekpep ke ufọkabasi mmọ nte ke Abasi idifenke inọ mbon emi ẹwotde idem. Edi mma n̄wụt enye se Bible etịn̄de aban̄a ediset ke n̄kpa. (John 5:28, 29) Esịt ama enem enye etieti ndifiọk ke Abasi enen̄ede ekere aban̄a nnyịn. Ifiọk ntaifiọk inọhọ mi utọ inemesịt emi nnyenede ini ekededi oro ndade se mfiọkde ke Bible n̄n̄wam mme owo!