Kpukpru usen, n̄kpọ nte n̄kani mbonekọn̄ 20 ke United States ẹsiwot idem. Kpukpru ọfiọn̄, owo mmọ 950 ẹsiyom ndiwot idem kpa ye oro edide ukara United States ke esise mmọ enyịn.

N̄wedmbụk n̄kpọntịbe emi ẹkotde China Daily ọdọhọ ke n̄kpọ nte mbahade iba ke otu iban China emi ẹsikade obio en̄wen kpa ke China ẹkeyom utom ẹsimen idịbi. Iban emi isịmke kan̄a isua 30. N̄wedmbụk emi ọdọhọ ke iban emi ẹmende idịbi ke China ẹnen̄ede ẹwak idahaemi ẹkan akpa. Ẹdọhọ n̄ko ke ediwak iban ye irenowo ẹdụn̄ọ ntre ke China kpa ye oro mmọ mîdọhọ ndọ.

Utoenyịn afiak ọtọn̄ọ ndimụm owo ke Greece kpa ye oro eketiede nte ke mmọ ẹma ẹtre enye ofụri ofụri ke 1974. Mme owo ẹdọhọ ke nsọn̄ọn̄kpọ ada emi edi ye nte ke ukara ibiatke okụk aba nte ẹkesibiatde ke n̄kpọ ufọkibọk.

Ndụn̄ọde oro ẹnamde ke India owụt ke kpa ye oro mbon India ẹdude uwem idahaemi nte mbakara, ke ata ediwak mmọ ẹsụk ẹyom ete ye eka ẹmek owo oro mmimọ ididọde utu ke ndimek ke idem mmọ. Ata ediwak mmọ n̄ko ẹma ndidụn̄ ye iman mmọ.

“Ufọkabasi nnyịn inyeneke aba odudu nte ekesinyenede ke Europe ye ke America emi edide ẹnyene n̄kpọ etieti. Nnyịn isụk inam n̄kpọ eset eset. Ufọkabasi nnyịn okpon, edi mme owo iwakke aba. Mme owo inyụn̄ inịmke aba ibet ufọkabasi kpa ye oro nnyịn isisịnede ikpọ ọfọn̄ inam ikpọ n̄kpọ ke ufọkabasi. . . . Nnyịn isụk inam n̄kpọ nte ikesinamde isua 200 ke eset.”—Carlo Maria Martini emi ekedide Cardinal Ufọkabasi Catholic eketịn̄ ikọ emi. Ẹkewet ikọ emi ke n̄wedmbụk n̄kpọntịbe Corriere della Sera ke enye ama akakpa.