Ndụn̄ọde oro ẹkenamde owụt ke ediwak owo ẹsikpan̄ utọn̄ ẹkop ikwọ ke ini ẹbede usụn̄, ndusụk ẹtịn̄ ikọ ke fon ye ntre ntre. Enye emi akam ọdiọkde akan oro edi ndidi ke ebe usụn̄ ke ọnọ owo etop ke fon. Mbon oro ẹsinamde emi isisọpke ibe usụn̄, ẹwak ndibe ke ini ye ebiet emi mmọ mîkpebehe, mîdịghe ẹbe isehe-se usụn̄.

Mbon emi ẹsitan̄de iban ke Nigeria ẹka obio mbakara man ẹkesan̄a akpara ẹn̄wana okụk ẹnọ mmọ ẹsibem iso ẹmen mmọ ẹka iso mbiam man ẹken̄wọn̄ọ ke mmimọ iditịn̄ke n̄kpọ emi inọ owo ndomokiet. Mmọ ẹsinam emi sia mmọ ẹdiọn̄ọ ke iban emi ẹfefehe mbiam, ndien idisioroke uyo ekpedi ẹnam mmọ didie.

Utom idụhe ke Spain inọ mbon oro ẹkekade ufọkn̄wed ntaifiọk. Ntre ediwak mbon emi ẹma ẹkesan̄a ẹyom utom ẹbịghi isitịn̄ke ke ima ika ufọkn̄wed ntaifiọk man ẹda mmimọ ke utom.

Ẹdọhọ ke nsụn̄ikan̄ otụn̄ikan̄ m̀mê nsụn̄ikan̄ emi ọwọrọde ke ikan̄ sọdọs esinam mme owo ke mme idụt oro mînyeneke n̄kpọ ẹdọn̄ọ ẹkpa. Ẹdọhọ ke nsụn̄ikan̄ esiwot n̄kpọ nte owo miliọn inan̄ kpukpru isua. Ntaifiọk ẹdọhọ ke nsụn̄ikan̄ ifia m̀mê eke ukan̄ onyụn̄ ọdiọk nte nsụn̄ikan̄ sika.