Ke Ini Owo Fo Ọdọn̄ọde
“Ke ini ete mi okoyomde ndikpọn̄ ufọkibọk, ima ibụp dọkta m̀mê nso ke ẹkekụt ke ini ẹsede nte iyịp esie etiede. Dọkta ama ọdọhọ ke mfịna ndomokiet idụhe, edi yak ise se ẹkewetde. Idem ama akpa enye ndikụt ke mfịna do ke iyịp ete mi! Enye ama ekpe nnyịn ubọk onyụn̄ okot dọkta emi esisede n̄kpọ aban̄a iyịp edisọbọ enye idem. Idem ọsọn̄ ete mi idahaemi. Ama ọfọn etieti nte ikobụpde dọkta oro mbụme.”—Maribel.
Isinemke-nem owo ndika ufọkibọk. Edi se Maribel etịn̄de ke enyọn̄ emi owụt ke ufan m̀mê iman ekeme ndin̄wam owo esie emi ọdọn̄ọde, ndien se enye anamde akam ekeme ndinyan̄a owo oro. Didie ke ekeme ndin̄wam owo fo emi ọdọn̄ọde?
Mbemiso ẹkade ufọkibọk. N̄wam enye wet nte udọn̄ọ emi esinamde enye ye ibọk ekededi emi enye esidade. Wet n̄ko kpukpru mbụme emi ẹdibụpde dọkta. N̄wam enye eti mme n̄kpọ en̄wen emi aban̄ade udọn̄ọ esie onyụn̄ eti m̀mê owo en̄wen ke ubon mmọ enyene ukem udọn̄ọ emi. Kûkere ke dọkta ọdọdiọn̄ọ kpukpru oro mîdịghe ke enye oyobụp mbufo.
Kpan̄ utọn̄, bụp mbụme ukpono ukpono, nyụn̄ wet mme akpan n̄kpọ
Ke ini ẹdude ye dọkta. Kụt ete ke se dọkta etịn̄de an̄wan̄a fi ye owo fo emi ọdọn̄ọde. Bụp mbụme, edi kûsọn̄ọ uyịre ke ekikere fo. Yak ọdọn̄ọ udọn̄ọ etiene obụp mbụme onyụn̄ etịn̄ ikọ idemesie. Kpan̄ utọn̄ nyụn̄ wet mme akpan n̄kpọ nịm. Bụp ban̄a nsio nsio usụn̄ emi ẹkemede ndisọbọ udọn̄ọ oro. Ndusụk ini, ekeme ndifọn ndidọhọ owo fo aka ebịne dọkta en̄wen onyụn̄ okokop se enye editịn̄de.
Fiak se se dọkta ọkọdọhọde ye mme ibọk oro enye ekewetde
Ke ẹma ẹkenyọn̄ ẹdi. Fiak neme se dọkta eketịn̄de ye enye. Kụt ete ke enye edep nnennen ibọk oro dọkta ekewetde ọnọ enye. Dọhọ enye ada ibọk esie nte dọkta eketemede nyụn̄ sọsọp ketịn̄ nọ dọkta edieke ibọk oro afịnade enye. Dọhọ enye okûtie mfụhọ mfụhọ, nyụn̄ dọhọ enye anam mme n̄kpọ eken oro ẹkedọhọde enye esinam, utọ nte ndifiak n̄ka ufọkibọk. N̄wam enye ọdiọn̄ọ mme n̄kpọ en̄wen aban̄a udọn̄ọ esie.
Ke Ini Ẹdude ke Ufọkibọk
Kụt ete ke mme n̄kpọ oro afo ewetde ke n̄wed ufọkibọk enen
Mụm idem kama nyụn̄ kpan̄ utọn̄. Esịt esitịmede owo emi idem mîsọn̄ke ke ini enye esịmde ufọkibọk. Edieke afo omụmde idem akama onyụn̄ etịmde akpan̄ utọn̄, emekeme ndin̄wam kpukpru owo do ẹkûtịmede esịt ẹkaha, udûnyụn̄ unamke ndudue. Kụt ete ke mme n̄kpọ oro afo ewetde ke n̄wed ufọkibọk enen. Yak owo udọn̄ọ etịn̄ nte enye oyomde ẹsọbọ imọ idem. Edieke udọn̄ọ mîyakke enye ekeme nditịn̄ ikọ, yak owo emi enye ọkọdọhọde etịn̄ ikọ ke ibuot imọ ebiere n̄kpọ ọnọ enye. *
Tịn̄ se okụtde nọ mbon ufọkibọk
Kûdodop uyo utie. Kûyak ndịk anam fi nditịn̄ se ọdiọn̄ọde. Afo ndinyụn̄ nsịne ọfọn̄ ediye ediye nnyụn̄ nnam n̄kpọ ukpono ukpono ekeme ndinam ufọkibọk ẹnen̄ede ẹse owo fo enyịn ẹnyụn̄ ẹtịm ẹsọbọ enye idem. Ke ediwak ufọkibọk, nsio nsio dọkta ẹsise owo idem. Ntre, emekeme ndin̄wam mmọ ke ndinam mmọ ẹdiọn̄ọ se mme dọkta eken ẹketịn̄de. Afo ọdiọn̄ọ owo fo akan, ntre tịn̄ ukpụhọde ekededi emi okụtde ke idem esie.
Nam ofụri se ekemede edi kûnam etie nte oyom ndibọbọ mbon ufọkibọk utom mmọ nnam
Kpono mbon ufọkibọk nyụn̄ kọm mmọ. Utom isimemke inọ mbon ufọkibọk. Ntre, nam n̄kpọ ye mmọ nte okponyụn̄ oyomde ẹnam ye afo. (Matthew 7:12) Wụt ke omokpono mmọ onyụn̄ enịm ke mmọ ẹdiọn̄ọ se ẹnamde. Kọm mmọ ke ofụri nti utom oro mmọ ẹnamde. Emi ekeme ndinam mmọ ẹnen̄ede ẹsịn idem ẹnam utom.
Idụhe owo emi mîsidọn̄ọke. Edi edieke etịmde ekere n̄kpọ onyụn̄ anamde ofụri se ekemede, emekeme ndin̄wam ufan m̀mê owo fo ke ini enye ọdọn̄ọde.—Mme N̄ke 17:17.
^ ikp. 8 Nsio nsio idụt ẹnyene nsio nsio ibet ẹban̄a unen oro owo udọn̄ọ enyenede. Nte ẹsinyụn̄ ẹnamde n̄kpọ ke idụt kiet okpụhọde ye eken. Kụt ete ke owo udọn̄ọ ewet n̄kpọ ọyọhọ n̄wed usọbọ esie man ẹdiọn̄ọ nte enye oyomde ẹsọbọ imọ idem.
