Ndisọn̄ọ Nda ke Ini Eyen Ọsọn̄de Ibuot

N̄WAN kiet oro idikotde Joy ama odomo ndibọk eyen esie ke usụn̄ Jehovah Abasi. Nte ededi, ke ini eyen oro ekekperede ndisịm isua 20, enye ama ọsọn̄ ibuot onyụn̄ ọkpọn̄ ufọk. Joy ọdọhọ ete: “Idụhe se ikabiakde mi ntre. Eketie mi nte enye ikamaha mi, esịt ama obụn̄ọ mi, onyụn̄ anam n̄kere ke n̄kakpa utom ikpîkpu. Etikwo etikwo ekikere ama adia mi idem.”

Eyedi afo n̄ko ama odomo ndibọk nditọ fo man mmọ ẹma ẹnyụn̄ ẹnam n̄kpọ Abasi, edi etise, owo mmọ kiet m̀mê akande oro awaha ọkpọn̄ usụn̄. Didie ke afo ekeme ndiyọ utọ nsọn̄ibuot oro? Nso idin̄wam fi ọsọn̄ọ ada anam n̄kpọ Jehovah?

Ke Ini Nditọ Abasi Ẹkesọn̄de Ibuot

Akpa n̄kpọ oro edin̄wamde fi edi ndifiọk ke Jehovah enen̄ede ọfiọk nte etiede fi ke idem. Nnyịn ikot ntem ke Isaiah 49:15 ite: “Nte n̄wan ekeme ndifre eyen-nsek esiemmọ, nnyụn̄ ntre nditua eyen emi enye amande mbọm? Idem mmọ ẹkeme ndifre, edi ami ndifreke fi.” Ke akpanikọ, esitie Jehovah ke idem nte esitiede mme ete ye eka. Mmọdo, kere ban̄a nte ekenemde enye ke ini kpukpru mme angel esie ẹketorode ẹnyụn̄ ẹnamde n̄kpọ esie. Ke ini Jehovah ‘eketiede ke oyobio’ ọbọrọ Job, enye ama etịn̄ nte ekenemde ndidu ye ubon esie eke heaven oro ẹdianade kiet, ete: “Afo okodu m̀mọ̀n̄ ke ini ntọn̄ọde ndinam ererimbot? . . . Ke ini mme ntantaọfiọn̄ usenubọk ẹkwọde uyo kiet, kpukpru nditọ Abasi ẹnyụn̄ ẹsiode n̄kpo.”—Job 38:1, 4, 7.

Nte ini akakade, kiet ke otu mfọnmma angel Abasi ama ọsọn̄ ibuot ye Abasi onyụn̄ akabade edi Satan, emi ọwọrọde “Andibiọn̄ọ.” Jehovah ama okụt n̄ko nte Adam, emi ekedide akpa eyen esie ke isọn̄, ye mfọnmma n̄wan esie Eve, ẹketienede ẹsọn̄ ibuot. (Genesis 3:1-6; Ediyarade 12:9) Ekem, mme angel en̄wen ẹma ‘ẹkpọn̄ nnennen ebietidụn̄ mmọ’ ẹnyụn̄ ẹsọn̄ ibuot ye Abasi.—Jude 6.

N̄wed Abasi itịn̄ke nte eketiede Jehovah ke idem ke ini ndusụk ke otu mfọnmma nditọ esie ẹkesọn̄de ibuot. Nte ededi, Bible etịn̄  in̄wan̄-in̄wan̄ ete: “Jehovah okụt idiọkn̄kpọ owo nte okponde ke isọn̄, kpukpru n̄kpọ ke ekikere esịt esie ẹnyụn̄ ẹsụk ẹdi idiọk kpukpru ini. Ndien Jehovah atua n̄kpọfiọk koro enye akanamde owo ke isọn̄, esịt onyụn̄ ayat enye.” (Genesis 6:5, 6) N̄ko, nsọn̄ibuot nditọ Israel, emi ẹkedide ndimek ikọt Jehovah, ama “ayat” enye esịt onyụn̄ “esuene” enye.—Psalm 78:40, 41.

Jehovah ọdiọn̄ọ nte esibiakde mme ete ye eka oro nditọ mmọ ẹsọn̄de ibuot. Ke Ikọ esie, kpa Bible, enye ọnọ eti ndausụn̄ ye nsịnudọn̄ oro ẹdin̄wamde mme utọ ete ye eka oro ndiyọ. Abasi ọdọhọ yak mmọ ẹtop editịmede esịt mmọ ẹdori imọ ke idem, ẹsụhọde idem, ẹnyụn̄ ẹn̄wana ye Satan kpa Devil. Ẹyak ise nte edida item emi nsịn ke edinam ekemede ndin̄wam fi ọsọn̄ọ ada ke ini eyen fo ọsọn̄de ibuot.

Top Editịmede Esịt Fo Dori Jehovah ke Idem

Jehovah ọfiọk ke iwakke se isinamde esịt etịmede mme ete ye eka nte mmọ ndikere ke nditọ mmimọ ẹmọn̄ ẹdụk afanikọn̄ m̀mê ke mbon en̄wen ẹmọn̄ ẹsịn mmọ ke afanikọn̄. Apostle Peter etịn̄ usụn̄ kiet oro ẹkemede ndiyọ emi ye mme mfịna eken. Enye ewet ete: ‘Ẹtop kpukpru editịmede esịt mbufo ẹdori Jehovah ke idem, koro enye ekere aban̄a mbufo.’ (1 Peter 5:7) Ntak emi ikọ oro enen̄erede ebehe mme ete ye eka oro eyen mmọ ọsọn̄de ibuot?

Ke ini eyen fo ekedide eyenọwọn̄, afo ama esinen̄ede ekpeme enye mbak edidụk afanikọn̄, ndien anaedi enye ama esitiene ima ima ndausụn̄ fo. Nte ededi, nte enye ọtọn̄ọde ndikpon n̄wọrọ owo, ekeme ndidi ukemeke aba ndikara enye, edi osụk ọdọdọn̄ fi ndikpeme enye mbak n̄kpọ edinam enye. Ke nditịm ntịn̄, ekeme ndidi etetịm ọdọn̄ fi ndikpeme enye.

Ntre, ekeme nditie fi nte ke afo edi ntak edieke eyen fo enyenede mfịna ke n̄kan̄ eke spirit, ke n̄kan̄ eke obụk, m̀mê okopde editịmede esịt. Ntre ke eketie Joy oro ikebemde iso itịn̄ iban̄a. Enye ọdọhọ ete: “Esinen̄ede afịna mi kpukpru usen ke ini ntiede n̄kere nte eyen mi ọsọn̄de ibuot, ndien emi esinam n̄kere m̀mê odu se n̄kanamde ndue.” Ke utọ ini oro akpan akpan ke Jehovah oyom fi  ‘otop kpukpru editịmede esịt fo ọnọ imọ.’ Ke anamde oro, enye ayan̄wam fi. Andiwet psalm ọkọdọhọ ete: “Top mbiomo fo nọ Jehovah, ndien enye ayakama fi: enye idiyakke edinen owo esehede ke nsinsi.” (Psalm 55:22) Joy ama okop utọ ndọn̄esịt oro. Enye ọdọhọ ete: “Mma ntịn̄ nte eketiede mi ke idem ofụri ofụri nnọ Jehovah. Mma n̄n̄wan̄a ofụri esịt mi nnọ enye, ndien ama enen̄ede efere mi ke idem.”

Ekeme ndidi afo ama esinam ndudue ke nte ọkọbọkde eyen fo sia mûfọnke uma. Edi ntak ayakde oro aka iso afịna fi? Jehovah isehe mme ndudue oro, koro andiwet psalm ama ada odudu spirit ọkwọ ete: “O Jehovah, afo ekpese mme idiọk ido, O Ọbọn̄, anie ekpekeme ndida?” (Psalm 130:3) Idem edieke afo ekpedide mfọnmma owo, ekeme ndidi eyen fo okposụk ọsọsọn̄ ibuot. Ntre, tịn̄ nte etiede fi ke idem nọ Jehovah ke akam, ndien enye ayan̄wam fi ọyọ. Nte ededi, oyom anam se ikande oro man afo ke idemfo ekeme ndisọn̄ọ nda nnam n̄kpọ Jehovah nnyụn̄ mfep afia Satan.

Sụhọde Idem

Peter ekewet ete: “Ẹsụhọde idem ke idak ọkpọsọn̄ ubọk Abasi, man enye ekpemenede mbufo ke edikem ini.” (1 Peter 5:6) Ntak oyomde osụhọde idem ke ini eyen fo ọsọn̄de ibuot? Ndinyene eyen oro ọsọn̄de ibuot ekeme ndinam ekere ke afo edi ntak onyụn̄ ekeme ndidi n̄kpọ esuene ọnọ fi. Ekeme ndifịna fi ke ini ekerede ke se eyen fo anamde abiat enyịn̄ ubon fo, akpan akpan edieke ẹsiode enye ẹfep ke esop Christian. Bụt ye esuene ẹkeme ndinam fi etre ndidụk mme mbono esop.

Man ekeme ndiyọ mme utọ idaha oro, oyom enyene ọniọn̄. Mme N̄ke 18:1 ọdọhọ ete: “Owo ido esie ebịne se enye oyomde; ayadada aka iso, ikereke item.” Edieke odụkde mme mbono esop kpukpru ini kpa ye se ifịnade fi, eyekeme ndinyene ata eti item ye nsịnudọn̄. Joy ọdọhọ ete: “Ke ntọn̄ọ ntọn̄ọ, n̄koyomke owo ndomokiet okụt mi. Edi mma nti mme ufọn oro n̄kesibọde nto mme edinam eke spirit. Ke ẹsiode oro ẹfep, edieke ntiede ke ufọk, mme mfịna mi ẹyedia mi idem. Mme mbono esop ẹma ẹn̄wam mi ndiwụk ekikere ke mme n̄kpọ eke spirit oro ẹbọpde-bọp. Enen̄ede enem mi nte mmen̄kedianakede ntie ikpọn̄ nnyụn̄ ntaba ima ye ibetedem nditọete mi eke spirit.”—Mme Hebrew 10:24, 25.

Ti n̄ko ke owo kiet kiet ke ubon “oyobiom mbiomo idemesie.” (Galatia 6:5) Jehovah oyom mme ete ye eka ẹma ẹnyụn̄ ẹtụnọ nditọ mmọ. Enye n̄ko oyom nditọ ẹkop uyo ẹnyụn̄ ẹkpono mme ete ye eka mmọ. Edieke mme ete ye eka ẹnamde se ẹkemede ke ndibọk nditọ mmọ “ke ntụnọ ye ke usụn̄ ukere n̄kpọ Jehovah,” do, mme ete ye eka ẹyenyene eti enyịn̄ ye Abasi. (Ephesus 6:1-4) Edi edieke eyen ọsọn̄de ibuot ke ini ete ye eka ẹdade ima ẹtụnọ enye, enye abiat enyịn̄ esiemmọ. Mme N̄ke 20:11 ọdọhọ ke “ẹyediọn̄ọ idem eyenọwọn̄ ke ido esie, m̀mê se enye anamde asana, m̀mê onyụn̄ enen.” Ke akpanikọ, mbon oro ẹfiọkde se iketịbede ẹdiọn̄ọ ke nsọn̄ibuot Satan ibiatke enyịn̄ Jehovah.

N̄wana ye Devil

Peter ọkọdọhọ ete: “Ẹnyene mbufiọk, ẹdu ke ukpeme. Asua mbufo, kpa Devil, ke oyoyo asan̄a nte ekpe eke okụnide, oyom owo eke  enye editade.” (1 Peter 5:8) Ukem nte ekpe esinamde, Devil esiwak ndika mbịne mme uyen oro mînyeneke ifiọk. Ke eset, ekpe ẹma ẹsiwọrọ ẹsan̄a ke Israel ẹyom ndimụm ufene nta. Edieke eyenerọn̄ ọwọrọde ke otuerọn̄ asan̄a ikpọn̄, ekesidi mmemmem n̄kpọ ekpe ndimụm enye nta. Ke ntak ima eyen, eka erọn̄ ekeme ndinyịme n̄kpa man anyan̄a eyen esie. Nte ededi, idem akamba erọn̄ ke idemesie ikemeke ndin̄wana ye ekpe. Ntre, ama oyom mme ekpemerọn̄ oro ẹnyenede uko ẹsikpeme erọn̄.—1 Samuel 17:34, 35.

Man Jehovah ekpeme ndamban̄a erọn̄ esie osio ke ubọk “ekpe eke okụnide,” enye anam ndutịm man mme ekpemerọn̄ eke spirit ẹse ẹban̄a otuerọn̄ ke idak “etubom ekpemerọn̄,” kpa Jesus Christ. (1 Peter 5:4) Peter eteme mme ekpemerọn̄ emi ete: “Ẹkpeme otuerọn̄ Abasi emi odude ke idak ukpeme mbufo, idịghe ke edinyenyịk, edi ke unyịmesịt; inyụn̄ idịghe ke edima idiọk udori, edi ye ọkpọsọn̄ udọn̄.” (1 Peter 5:1, 2) Edieke mbufo mme ete ye eka ẹberede ye mmọ, mmọ ẹkeme ndin̄wam eyen mbufo enen̄ede usụn̄ esie.

Ekeme nditie fi ke idem nte ukpûnyịmeke mbiowo ẹtụnọ eyen fo oro ọsọn̄de ibuot. Edi oro ekpedi ata akamba ndudue. Peter ọdọhọ “ẹn̄wana ye [Devil]”—idọhọke ẹn̄wana ye mbiowo.—1 Peter 5:9.

Ke Ini Ẹnọde Ọkpọsọn̄ Ntụnọ

Edieke eyen fo oro ama akana baptism mîkabakede esịt, ẹyenọ enye ata ọkpọsọn̄ ntụnọ—oro edi ndisio enye mfep ke esop. Isua emana esie ye mme n̄kpọ eken ẹdibiere nte afo edinamde n̄kpọ ye enye.

Edieke enye edide ekpri eyenọwọn̄ emi osụk odụn̄de ye afo, ayaka iso ọnọ enye mme n̄kpọ oro enye oyomde. Edi mbiomo fo ndinọ enye ukpep ke eti ido uwem ye ntụnọ oro odotde. (Mme N̄ke 1:8-18; 6:20-22; 29:17) Ekeme ndidi ayama ndinịm ukpepn̄kpọ Bible ye enye. Emekeme ndiwụt enye nsio nsio itie N̄wed Abasi ye mme n̄wed oro “ofụn emi anamde akpanikọ onyụn̄ enyenede ọniọn̄,” osiode. (Matthew 24:45) Emekeme n̄ko ndida enye ndụk mme mbono esop nnyụn̄ nnam enye etie ye afo. Anam kpukpru emi sia odoride enyịn ke item N̄wed Abasi oyotụk enye esịt.

Udunamke kpukpru emi edieke eyen oro ẹsiode ẹfep mîdịghe eyenọwọn̄ mînyụn̄ idụn̄ke ikpere ufọk. Apostle Paul ọkọnọ mme Christian ke Corinth item emi ete: “Ẹtre ndidụk ndụk ye owo ekededi emi ẹkotde eyenete, emi edide owo use m̀mê owo idiọkitọn̄ m̀mê okpono ndem m̀mê osụn̄i isụn̄i m̀mê akpammịn m̀mê owo n̄kanubọk, ẹkûkam ẹdia n̄kpọ ye utọ owo oro.” (1 Corinth 5:11) Okposụkedi ekemede ndiyom ẹnam n̄kpọ ndusụk ini ọtọkiet ye eyen oro ẹkesiode ẹfep ke esop ke ntak se ẹnyenede ndinam ke ubon, ete ye eka oro ẹdide Christian ẹyekụt ẹte ke mmimọ idianke idem ye utọ eyen oro ikaha.

Edieke mbiowo ẹtụnọde eyen oro anamde idiọkn̄kpọ, idiwụtke ifiọk edieke adade ye eyen fo asua ntụnọ oro ẹdade Bible ẹnọ enye. Ndida ye eyen fo idikpemeke enye isio ke ubọk Devil. Utu ke oro, edikam owowot mbuọtidem fo. Edi, edieke eberede ye mbiowo, afo ‘ọyọsọn̄ọ ada ke mbuọtidem’ onyụn̄ ọnọ eyen fo ata eti un̄wam.—1 Peter 5:9.

Jehovah Ayakama Fi

Edieke eyen fo ọsọn̄de ibuot, ti ete ke idịghe afo ikpọn̄ ke oro etịbe ọnọ. Ukem n̄kpọ emi ọwọrọ ediwak ete ye eka eken oro ẹdide Christian. Jehovah ayakama nnyịn inamke n̄kpọ m̀mê nso idomo ke isobo.—Psalm 68:19.

Bọn̄ akam nọ Jehovah. Buana ye esop Christian kpukpru ini. Nyịme ntụnọ oro mbiowo ẹnọde. Edieke anamde oro, afo ọyọsọn̄ọ ada. Ndien eti uwụtn̄kpọ oro afo enịmde ekeme ndin̄wam eyen fo eyere ikot Jehovah ke ndifiak ntiene enye.—Malachi 3:6, 7.

[Mme ndise ke page 18]

Bọn̄ akam nyụn̄ buana ye esop Christian man enyene odudu