Didie ke Ikeme Ndin̄wana ye Mme Demon?
Didie ke Ikeme Ndin̄wana ye Mme Demon?
“Mme angel oro mîkomụmke akpa itie mmọ ikama edi ẹkpọn̄de nnennen ebietidụn̄ mmọ [Abasi] ama ọkọbi ke nsinsi n̄kpọkọbi enịm ke makmak ekịm ebet ubiereikpe akwa usen oro.”—JUDE 6.
1, 2. Mme mbụme ewe ẹdemerede ẹban̄a Satan kpa Devil ye mme demon?
APOSTLE PETER odụri nnyịn utọn̄ ete: “Ẹnyene mbufiọk, ẹdu ke ukpeme. Asua mbufo, kpa Devil, ke oyoyo asan̄a nte ekpe eke okụnide, oyom owo eke enye editade.” (1 Peter 5:8) Apostle Paul ọkọdọhọ ete: “Nyomke mbufo ẹkabade ẹdi mme andibuana n̄kpọ ye mme demon. Mbufo ikemeke ndin̄wọn̄ cup Jehovah ye cup mme demon; mbufo ikemeke ndidia n̄kpọ ke ‘okpokoro Jehovah’ ye ke okpokoro mme demon.”—1 Corinth 10:20, 21.
2 Nte ededi, anie edi Satan kpa Devil, mmanie ẹnyụn̄ ẹdi mme demon? Mmọ ẹkesan̄a didie ẹdidu, ndien ini ewe ke mmọ ẹkedi ẹdidu? Ndi Abasi okobot mmọ? Mmọ ẹnyene odudu adan̄a didie ke idem owo? Didie ke ikeme ndin̄wana ye mmọ, ke edide imekeme ndinam oro?
Satan ye Mme Demon Ẹkesan̄a Didie Ẹdidu?
3. Didie ke angel Abasi akakabarede Satan kpa Devil?
3 Ke ntọn̄ọ ntọn̄ọ ini oro ẹkebotde owo, ke ini owo okodude ke In̄wan̄ Eden, angel Abasi kiet ama ọsọn̄ ibuot. Ntak-a? Koro enye ikoyụhọke ye utom oro Jehovah ọkọnọde enye ke heaven. Ke ẹma ẹkebot Adam ye Eve, enye ama okụt ifet ndinam mme owo ẹkop uyo ẹnyụn̄ ẹtuak ibuot ẹnọ imọ utu ke Abasi. Ke ntak emi enye ọkọsọn̄de ibuot ye Abasi ye ke ntak emi enye akatapde akpa ebe ye n̄wan odụk usụn̄ idiọk, angel emi ama anam idemesie Satan kpa Devil. Nte ini akakade, mme angel en̄wen ẹma ẹtiene ẹsọn̄ ibuot. Didie?—Genesis 3:1-6; Rome 5:12; Ediyarade 12:9.
4. Nso ke ndusụk angel oro ẹkesọn̄de ibuot ẹkenam mbemiso Ukwọ eyo Noah?
4 N̄wed Abasi emi ẹkedade odudu spirit Abasi ẹwet asian nnyịn ete ke mbemiso akwa Ukwọ eyo Noah, ndusụk angel ẹma ẹtọn̄ọ ndinyene esen esen udọn̄ ke idem iban mi ke isọn̄. Nte Bible ọdọhọde, “nditọ-iren Abasi [eke heaven ẹkeda enyịn use ẹse] nte nditọ-iban owo ẹyede, ndien mmọ ẹda iban kpukpru eke mmọ ẹmekde ẹdọ.” Ndọ emi ekedi ata esen esen ndọ, mmọ ẹma ẹnyụn̄ ẹbon nditọ mbuaha iyịp emi ẹkefiọkde nte Nephilim. (Genesis 6:2-4) Ke ntem, mme ọsọn̄ibuot edibotn̄kpọ emi ẹkediana ye Satan ẹsọn̄ ibuot ye Jehovah.
5. Nso iketịbe inọ mbon nsọn̄ibuot ke ini Jehovah akadade Ukwọ osobo idiọk ererimbot?
5 Mme Nephilim oro ye mme eka mmọ ẹma ẹkpan̄a ke ini Jehovah akadade Ukwọ osobo ubonowo. Mme ọsọn̄ibuot angel oro ẹma ẹfọrọde idem owo ẹnịm ẹnyụn̄ ẹfiak ẹnyọn̄ọ heaven. Nte ededi, mmọ ‘ikomụmke akpa itie mmọ ikama’ ye Abasi. Utu ke oro, ẹkedọn̄ mmọ ke “makmak ekịm” eke spirit, emi ẹdiọn̄ọde nte Tartarus.—Jude 6; 2 Peter 2:4.
6. Nso ke mme demon ẹda ẹbian̄a owo?
6 Toto ke ini oro ndiọi angel ẹketabade “akpa itie mmọ,” mmọ ẹma ẹkabade mme demon nsan̄a Satan ẹnyụn̄ ẹnam uduak esie. Ọtọn̄ọde ke ini oro, mme demon inyeneke aba ukeme ndifiak nda idem owo nsịne. Nte ededi, mmọ ẹkeme nditap mme owo ẹnam nsio nsio orụk obukpo idan̄. N̄kpọ efen emi mme demon ẹnen̄erede ẹda ẹbian̄a ubonowo edi ubụpekpo, emi ekemede ndisịne mme utọ n̄kpọ nte editọ owo ibọk ye edituak ibuot nnọ mme ete ete. (Deuteronomy 18:10-13; 2 Chronicles 33:6) Se idiwọrọde ndiọi angel emi edi ukem ye se idiwọrọde Devil—oro edi, nsinsi nsobo. (Matthew 25:41; Ediyarade 20:10) Edi oyom nnyịn isọn̄ọ ida ibiọn̄ọ mmọ idahaemi. Odot ineme adan̄a nte Satan okopde odudu ye nte nnyịn ikemede ndin̄wana ye enye ye mme demon esie uforo uforo.
Satan Okop Odudu Adan̄a Didie?
7. Satan akara ererimbot adan̄a didie?
7 Satan ọmọdọk Jehovah edidọk ke ofụri emana. (Mme N̄ke 27:11) Enye onyụn̄ akara ata ediwak ke otu ubonowo. Akpa John 5:19 ọdọhọ ke “ofụri ererimbot esịne ke idak odudu andidiọk.” Oro edi ntak emi Devil ekekemede ndidomo Jesus ke ndikọnọ enye “kpukpru mme obio ubọn̄ isọn̄.” (Luke 4:5-7) Apostle Paul eketịn̄ ntem aban̄a Satan: “Edi, edieke eti mbụk oro nnyịn itan̄ade edịbede, enye edịbe ke otu mbon oro ẹtakde, emi abasi editịm n̄kpọ emi ama ekesịri enyịn ikike mbon oro mînịmke ke akpanikọ, mbak un̄wana ubọn̄ ubọn̄ eti mbụk emi aban̄ade Christ, emi edide mbiet Abasi, ediyama ọnọ mmọ.” (2 Corinth 4:3, 4) Satan edi “osu nsu ye ete nsu,” edi aka iso anam nte idi “angel un̄wana.” (John 8:44; 2 Corinth 11:14) Enye enyene odudu ye mme usụn̄ oro ẹkemede ndisịri enyịn ikike mme andikara ererimbot emi ye mbon oro mmọ ẹkarade. Enye amada nsunsu etop ye nsunsu ukpepn̄kpọ ido ukpono abian̄a ubonowo.
8. Nso ke Bible etịn̄ aban̄a odudu Satan?
8 Ẹma ẹkụt adan̄a nte Satan okopde odudu ke eyo prọfet Daniel, ke n̄kpọ nte isua ikie ition Mbemiso Eyo Nnyịn. Ke ini Jehovah ọkọdọn̄de angel aka ọkọnọ Daniel etop nsịnudọn̄, “ọbọn̄ [eke spirit] idụt Persia” ama ọbiọn̄ọ angel oro. Ẹma ẹbiọn̄ọ anam-akpanikọ angel oro ke usen 21 tutu “Michael akpan mbọn̄ kiet” edi edin̄wam enye. Mbụk oro asiak n̄ko “[demon] ọbọn̄ Javan,” m̀mê Greece. (Daniel 10:12, 13, 20) Ndien ke Ediyarade 13:1, 2, ẹdọhọ ke Satan edi “dragon” emi ayakde “odudu esie ye ebekpo esie ye akwa odudu ukara ọnọ idiọk unam,” oro edi, n̄ka ukaraidem.
9. Mme Christian ẹn̄wana ye mmanie?
9 Do, an̄wan̄a ntak emi apostle Paul ekewetde ete: “Nnyịn imenyene en̄wan ndin̄wana, idịghe ye obụk ye iyịp, edi in̄wana ye mme ukara, ye mme enyene-odudu, ye mme andikara ekịm ererimbot emi, ye odudu ndiọi spirit ke enyọn̄.” (Ephesus 6:12) Idem mfịn emi, udịm mme demon emi enyịn mîkwe, emi Satan kpa Devil akarade, ẹkara mme andikara ye ubonowo ke ofụri ofụri, ẹnam mmọ ẹnam mme enyene-ndịk n̄kpọ nte ediwot ofụri orụk ye edinam oyomonsia. Ẹyak nnyịn ineme idahaemi nte ikemede ndibiọn̄ọ odudu ndiọi spirit emi uforo uforo.
Nso Idin̄wam Nnyịn In̄wana ye Mme Demon?
10, 11. Didie ke nnyịn ikeme ndin̄wana ye Satan ye ndiọi angel esie?
10 Nnyịn ikemeke ndida odudu idem nnyịn kpọt n̄n̄wana ye Satan ye ndiọi angel esie. Paul eketeme ete: “Ẹka iso ẹkop odudu ke Ọbọn̄ ye ke ọkpọsọn̄ ukeme esie.” Ana iyom un̄wam Abasi. Paul adian do ete: “Ẹmen ofụri n̄kpọekọn̄ Abasi ẹsịne man mbufo ẹkpekeme ndisọn̄ọ nda n̄n̄wana ye n̄kari Devil . . . Ẹda ofụri n̄kpọekọn̄ Abasi, man mbufo ẹkpekeme ndin̄wana mbiọn̄ọ ke usen idiọk, nnyụn̄ nsọn̄ọ nda, ke mbufo ẹma ẹkenam kpukpru n̄kpọ ọyọhọ ọyọhọ.”—Ephesus 6:10, 11, 13.
11 Paul ọdọhọ mme Christian utịm ikaba ete ẹsịne “ofụri n̄kpọekọn̄ Abasi.” Ikọ oro “ofụri” ọwọrọ ke edieke owo anamde n̄kpọ umiọn̄ umiọn̄ ke enye idikemeke ndin̄wana ye mme demon. Mmọdo, nso idi mme akpan ikpehe n̄kpọekọn̄ eke spirit oro anade mme Christian ẹsịne mfịn usọp usọp man ẹkeme ndin̄wana ye mme demon?
“Ẹsọn̄ọ Ẹda”—Didie?
12. Didie ke mme Christian ẹkeme ndida akpanikọ mbọp isịn?
12 Paul ọdọhọ ete: “Ẹsọn̄ọ ẹda, ndien, ẹda akpanikọ ẹbọbọ ke isịn, ẹnyụn̄ ẹsịne edinen ido nte ukwak ikpanesịt.” (Ephesus 6:14) Ikpehe n̄kpọekọn̄ iba oro ẹsiakde mi edi mbọbọ idịbi, m̀mê n̄kpahaisịn, ye ukwak ikpanesịt. Owoekọn̄ ekenyene ndibọp n̄kpaha esie ọsọn̄ man ekpeme enye isịn (ekikoi, etak ifụhi, ye edak) onyụn̄ afak akan̄kan̄. Kpasụk ntre, nnyịn inyene ndida Bible mbọp idem nnyịn ke ndamban̄a usụn̄ man ikeme ndida enye nsịn ke edinam. Nte imenyene ndutịm edikot Bible kpukpru usen? Nte ofụri ubon ẹsitiene ẹbuana? Nte imenyene ndutịm edikot itien̄wed eke usen nte ubon? Ke adianade do, nte imọfiọk nte ẹtatde mme itie N̄wed Abasi ke mme n̄wed “ofụn emi anamde akpanikọ onyụn̄ enyenede ọniọn̄”? (Matthew 24:45) Ke edide ntre, ọwọrọ ke nnyịn ke idomo ndinam item Paul. Nnyịn imenyene mme kaset vidio ye mme nsemnsem usanikwọ emi ẹkemede ndinọ nnyịn ndausụn̄ oro otode N̄wed Abasi. Ndisọn̄ọ nyịre ke akpanikọ ekeme ndinam nnyịn inam nti ubiere inyụn̄ iyakke nnyịn idụk idiọk afan̄.
13. Didie ke nnyịn ikeme ndikpeme ndamban̄a esịt nnyịn?
13 Ata ata ukwak ikpanesịt esikpeme ikpanesịt, esịt, ye mme akpan ndido eken ke idem owoekọn̄. Christian ekeme ndikpeme ndamban̄a ikpanesịt esie—oro edi, owo emi enye edide ke esịtidem—ke ndinen̄ede mma edinen ido Abasi nnyụn̄ nnịm mme edumbet Jehovah. Ndamban̄a ikpanesịt iyakke nnyịn isiak mmọn̄ ke Ikọ Abasi. Nnyịn ima ‘isua idiọk, inyụn̄ ima eti,’ nnyịn idiyakke ukot nnyịn odụk “mme idiọk usụn̄.”—Amos 5:15; Psalm 119:101.
14. Nso ke ndisịne “n̄kpọutom eti mbụk emem ke ukot nte ikpaukot” ọwọrọ?
14 Mbonekọn̄ Rome ẹma ẹsisịne ata nti ikpaukot oro akanamde mmọ ẹkeme ndisan̄a ata anyan isan̄ ke mme ọkpọusụn̄ Rome oro ẹkebede ke ofụri obio ukara oro. Nso ke ikọ oro “ẹsịne n̄kpọutom eti mbụk emem ke ukot nte ikpaukot” ọwọrọ ọnọ mme Christian? (Ephesus 6:15) Emi ọwọrọ ke nnyịn imeben̄e idem ndinam n̄kpọ. Imeben̄e idem ndibuana eti mbụk Obio Ubọn̄ Abasi ke idaha ekededi oro odotde. (Rome 10:13-15) Nnyịn ndisịn ifịk ke utom ukwọrọikọ ekpeme nnyịn ọbiọn̄ọ “n̄kari Satan.”—Ephesus 6:11.
15. (a) Nso iwụt ke akwa otuekọn̄ edi ata akpan n̄kpọ? (b) Ewe “enyịm ikan̄” ẹkeme ndibiat mbuọtidem nnyịn?
15 Paul aka iso ete: “Ke akande kpukpru n̄kpọ, ẹda mbuọtidem nte akwa otuekọn̄, emi mbufo ẹdikemede ndida nnịme kpukpru enyịm ikan̄ andidiọk.” (Ephesus 6:16) Paul ọtọn̄ọ item emi ye ikọ oro, “ke akande kpukpru n̄kpọ,” emi ọwọrọde ke ikpehe n̄kpọekọn̄ emi edi ata akpan n̄kpọ. Inaha nnyịn inana mbuọtidem. Ukem nte akwa otuekọn̄, mbuọtidem nnyịn ekeme ndikpeme nnyịn mbiọn̄ọ “enyịm ikan̄” Satan. Nso ke enyịm ikan̄ emi ada aban̄a mfịn? Enye ekeme ndidi ata akpatre idiọk isụn̄i, nsu, ye se mîdịghe ofụri akpanikọ oro mme asua ye mbon mfiakedem ẹsuande man ẹbiat mbuọtidem nnyịn. “Enyịm ikan̄” emi ẹkeme n̄ko ndidi mme idomo uma-inyene, emi ẹnamde nnyịn iduọ inyịne ke ndidep mme n̄kpọ, akam onyụn̄ anamde nnyịn imia mbuba ye mbon oro ẹmade edu n̄wụtidem. Ekeme ndidi mmọ ẹma ẹdep ikpọ ndiye ufọk ye ikpọ ubomisọn̄ m̀mê mme ọsọn̄urua n̄kpọ mmaidem ye mbufa n̄kon̄ine ọfọn̄. Inamke n̄kpọ se mbon en̄wen ẹnamde, ana inyene mbuọtidem oro ọsọn̄de ekem ndinam nnyịn ifep “enyịm ikan̄” emi. Didie ke nnyịn ikeme ndinam mbuọtidem nnyịn ọkọri onyụn̄ aka iso okop idem?—1 Peter 3:3-5; 1 John 2:15-17.
16. Nso ikeme ndinam mbuọtidem nnyịn okop idem?
16 Nnyịn imekeme ndisan̄a n̄kpere Abasi ebe ke ọkpọkpọ ukpepn̄kpọ Bible ofụri ini ye akam ofụri esịt. Nnyịn imekeme ndiben̄e Jehovah ọsọn̄ọ mbuọtidem nnyịn inyụn̄ inam n̄kpọ ekekem ye akam nnyịn. Ke uwụtn̄kpọ, nte nnyịn imesitịn̄ enyịn itịm idem inọ Ukpepn̄kpọ Enyọn̄-Ukpeme kpukpru urua man ikpetiene ibọrọ mbụme? Mbuọtidem nnyịn oyokop idem edieke isikpepde Bible ye mme n̄wed Bible.—Mme Hebrew 10:38, 39; 11:6.
17. Didie ke ikeme ‘ndibọ ndụn edinyan̄a’?
17 Paul ada ikọ esie aban̄ade mme ikpehe n̄kpọekọn̄ eke spirit ekeberi ntem: “Ẹbọ ndụn edinyan̄a ẹyara, ẹnyụn̄ ẹkama akan̄kan̄ eke spirit, oro edi, ikọ Abasi.” (Ephesus 6:17) Ndụn ekesikpeme ibuot ye mfre owoekọn̄, kpa ebiet unam ubiere. Kpasụk ntre ke mbuọtidem nnyịn esikpeme ukeme ukere n̄kpọ nnyịn. (1 Thessalonica 5:8) Utu ke ndisitie n̄kere mme utịtmbuba ererimbot ye mme udọn̄ inyene, nnyịn ikpowụk ekikere ke idotenyịn oro Abasi ọnọde, kpa nte Jesus okowụkde.—Mme Hebrew 12:2.
18. Didie ke ifiọk Ikọ Abasi ekpeme nnyịn ọbiọn̄ọ odudu Satan ye eke mme demon esie?
18 Akpatre n̄kpọ oro ekemede ndin̄wam nnyịn in̄wana ye Satan ye mme demon esie edi ikọ, m̀mê etop Abasi, oro ẹwetde ke Bible. Emi edi ntak en̄wen oro nnyịn mîkpadaha edikot Bible kpukpru ini inam mbubru. Edieke inen̄erede ifiọk Ikọ Abasi, emi eyekpeme nnyịn ọbiọn̄ọ nsu Satan ye etop mme demon, ọkọrọ ye ndiọi etop oro mbon mfiakedem ẹsuande.
“Ẹbọn̄ Akam Kpukpru Ini”
19, 20. (a) Nso ina ibet Satan ye mme demon esie? (b) Nso ikeme ndisọn̄ọ nnyịn idem ke n̄kan̄ eke spirit?
19 Ini ekpere ndisobo Satan, mme demon esie, ye idiọk ererimbot. Satan ọfiọk ke “ini imọ edi ibio.” Enye ayat esịt onyụn̄ an̄wana “ekọn̄ ye mbon oro ẹsụhọde ke otu mfri esie, emi ẹnịmde ibet Abasi ẹnyụn̄ ẹnyenede utom editie ntiense nnọ Jesus.” (Ediyarade 12:12, 17) Enen̄ede oyom in̄wana ye Satan ye mme demon esie.
20 Nnyịn iwụt esịtekọm didie ntem ke emi ẹtemede nnyịn ẹte imen ofụri n̄kpọekọn̄ Abasi isịne! Paul akada item emi eberi nneme esie aban̄ade mme n̄kpọekọn̄ eke spirit: “[Ẹka] iso ẹda kpukpru orụk akam ye n̄kpeubọk ẹbọn̄ akam kpukpru ini ke spirit. Mmọdo ndien ẹdu ke edidemede kpukpru ini ẹnyụn̄ ẹnam n̄kpeubọk ẹban̄a kpukpru ndisana owo.” (Ephesus 6:18) Akam ekeme ndisọn̄ọ nnyịn idem ke n̄kan̄ eke spirit onyụn̄ anam nnyịn idu ke edidemede. Ẹyak inam item Paul inyụn̄ ika iso ibọn̄ akam, sia emi ayanam nnyịn in̄wana ye Satan ye mme demon esie.
Nso ke Afo Ekekpep?
• Satan ye mme demon esie ẹkesan̄a didie ẹdidu?
• Devil okop odudu adan̄a didie?
• Nso ke nnyịn ikeme ndida n̄n̄wana ye Satan ye mme demon esie?
• Didie ke nnyịn ikeme ndimen ofụri n̄kpọekọn̄ Abasi nsịne?
[Mme Mbụme Ukpepn̄kpọ]
[Ndise ke page 26]
“Nditọ-iren Abasi ẹkụt nte nditọ-iban owo ẹyede”
[Ndise ke page 28]
Nte afo emekeme ndisiak kpukpru ikpehe itiokiet ke n̄kpọekọn̄ eke spirit?
[Mme ndise ke page 29]
Didie ke nditiene mbuana ke mme edinam emi ẹkeme ndin̄wam nnyịn in̄wana ye Satan ye mme demon esie?