“Enye Akam Akpak Nnyịn Idi”

EDI ido ke mme idụt N̄kan̄ Edem Usiahautịn ndikama owo esen. Ke uwụtn̄kpọ, ke India, ubon ẹkeme ndimen udia oro mmọ ẹkpediade ẹnọ esenowo emi abuatde mmọ. N̄wan ufọkndọ ke Iran esidọdọn̄ udia kpukpru ini ọyọhọ ekebe ntụhube man akpada ese aban̄a isenowo oro ẹkemede ndibuat enye.

Ediwak owo oro ẹtịn̄de ẹban̄a ke Bible ẹma ẹsitat ubọk ntre. N̄wọrọnda uwụtn̄kpọ kiet edi Lydia, eyedi enye ekedi n̄wan emi eketienede okpono Abasi ke ido mme Jew, emi okodụn̄de ke Philippi, kpa akpan obio Macedonia. Ke usen sabbath kiet, apostle Paul ye mme nsan̄a esie ẹma ẹkụt Lydia ye iban eken ẹdade ẹkpere akpa oro okodude ke mbọhọ Philippi. Jehovah ama anam se Paul eketịn̄de otụk enye esịt. Ndien enye ye mbonubon esie ẹma ẹna baptism. Do ndien ke enye akakpak mme akaisan̄ emi ete: “Edieke mbufo ẹbatde ẹte ndi anam-akpanikọ nnọ Jehovah, ẹdụk ke ufọk mi.” Luke nsan̄a Paul ọdọhọ ete: “Enye akam akpak nnyịn idi.”—Utom 16:11-15.

Ukem nte Lydia, mme Christian mfịn ẹsikama nditọete mmọ esen, utọ nte mme esenyịn oro ẹsan̄ade-san̄a ye iban mmọ. Nditọete emi ‘ẹsikam ẹkpakpak mmọ ẹdi’ ufọk mmimọ. Nte utịp, nditọete oro ẹsitatde ubọk ẹkama mmọ esen mi ẹsibọ edidiọn̄ ke ndikop n̄kpọ oro ọbọpde-bọp ye nsịnudọn̄ ke n̄kan̄ eke spirit. Okposụkedi oro ata ediwak Mme Ntiense Jehovah mînen̄ekede inyene n̄kpọ, mmọ “ẹma ndikama isenowo.” (Rome 12:13; Mme Hebrew 13:2) Ntatubọk mmọ esinam mmọ ẹkop inemesịt. Ke akpanikọ, Jesus ama enen ke ndikọdọhọ ete: “Inemesịt okpon ke ndinọnọ akan ke ndibọbọ.”—Utom 20:35.