Ana Inịm Utuakibuot Ubon Edieke Iyomde Ndibọhọ!

KERE nte “ekọn̄ akwa usen Abasi Ata Ọkpọsọn̄” edinyenede ndịk! (Edi. 16:14) Prọfet Micah ama etịn̄ nte usen oro editiede, ete: “Ikpọ obot ẹyetara ke idak esie, mme itịghede ẹyenyụn̄ ẹsiaha, kpa nte obukpa ọkwọk ke enyịn ikan̄, kpa nte mmọn̄ eke ẹn̄wan̄ade ke n̄wewere.” (Mic. 1:4) Nso iditịbe inọ mbon oro mîtuakke ibuot inọ Jehovah? Ikọ Abasi ọdọhọ ke “mmọ eke Jehovah ediwotde ke usen oro ẹyetọn̄ọ ke utịt ererimbot ẹna ẹsịm ke utịt ererimbot.”—Jer. 25:33.

Ntem, ọfọn mme ibuot ufọk—emi ediwak mmọ ẹbọkde nditọ ikpọn̄—ẹbụp idemmọ ete: ‘Ndi nditọ mi oro ẹkponide ẹkem ndifiọk Abasi ẹyebọhọ Armageddon?’ Bible ọdọhọ ke mmọ ẹyebọhọ edieke mmọ ẹkade iso ẹnam n̄kpọ Abasi nte ukeme mmọ ẹdide.—Matt. 24:21.

Ọfọn Ẹnyene Ini Utuakibuot Ubon

Mme ete ye eka, ẹkụt ẹte ke ẹmeka iso ẹkama nditọ mbufo “ke ntụnọ ye ke usụn̄ ukere n̄kpọ Jehovah.” (Eph. 6:4) Ndikpep nditọ mbufo Bible edi ata akpan n̄kpọ. Iyom nditọ nnyịn ẹtie nte mme Christian ke Philippi, emi Paul okotorode ke ntak emi mmọ ẹkemade ndinam n̄kpọ Jehovah. Enye ọkọdọhọ mmọ ete: “Ndima mi, kpa nte mbufo ẹkopde uyo mi kpukpru ini, idịghe ke ini ndude kpọt, edi akpan akpan ke ini mmendụhe, ẹka iso ẹsan̄a ke ndịk ye nyekidem ẹnam edinyan̄a mbufo ọwọrọ usụn̄.”—Phil. 2:12.

Ndi nditọ mbufo ẹsinam ibet Jehovah ke ini mbufo mîdụhe? Ndi mmọ ẹsinam emi ke ufọkn̄wed? Didie ke ẹkpen̄wam mmọ ẹfiọk ufọn ibet Jehovah man mmọ ẹkpenam ibet emi ọkpọkọm mbufo idụhe?

Utuakibuot Ubon ekeme ndinen̄ede n̄n̄wam nditọ mbufo ẹnam emi. Ke ntem, ẹyak ineme n̄kpọ ita oro ẹkemede ndinam ukpepn̄kpọ ubon mbufo enyene uforo.

Ẹnịm Kpukpru Ini

Ke usem emi ẹkedade ẹwet Bible, ikọ oro, “usen kiet,” emi odude ke Job 1:6 owụt ke mme angel ẹnyene ini emi mmọ ẹsisopde idem ke iso Abasi. Ẹnam ntre n̄ko ye nditọ mbufo. Ẹmek usen ye mbubreyo emi ẹdisinịmde Utuakibuot Ubon, ẹnyụn̄ ẹsinịm enye kpukpru ini. Ẹmek ini en̄wen n̄ko mbak edieke n̄kpọntịbe unana idotenyịn mîyakke ẹnịm ke usen emi ẹkemekde.

Ẹkûyak Utuakibuot Ubon akabade edi n̄kpọ emi ẹnịmde ini emi ẹnyụn̄ ẹtide. Ẹti ke nditọ mbufo edi ata akpan nditọ ukpepn̄kpọ Bible mbufo, ye nte ke Satan ke oyom mmọ ndita. (1 Pet. 5:8) Edieke ẹdade ini Utuakibuot Ubon ẹse ekebe ndise m̀mê n̄kpọ ntre, emi owụt ke Satan akan mbufo.—Eph. 5:15, 16; 6:12; Phil. 1:10.

Ẹneme Se Ibehede Kpukpru Owo

Ẹkûnịm Utuakibuot Ubon nte ufọkn̄wed. Ẹneme se ibehede kpukpru owo. Didie ke ẹkeme ndinam emi? Ndusụk ini, ẹmekeme ndineme se nditọ mbufo  ẹdisobode. Ke uwụtn̄kpọ, emekeme ndidọhọ mmọ ẹnanam ẹwụt nte ẹkpekwọrọde ikọ. Esinem nditọwọn̄ ndinam n̄kpọ emi mmọ ẹnen̄erede ẹfiọk ndinam. Ndinam n̄wụt nte ẹkpekwọrọde ikọ ye nte ẹkpenamde n̄kpọ ke ini mme owo ẹfan̄ade mfan̄a ke an̄wautom ayanam nditọ mbufo ẹnyene uko ke ini ẹkwọrọde ikọ m̀mê ẹkpepde owo n̄kpọ.—2 Tim. 2:15.

Emekeme n̄ko ndisineme se eyen fo akpanamde ke ini ubọkn̄ka ẹyomde enye anam idiọk. Neme mme n̄kpọ oro ẹdinamde eyen fo etiene osioro uyo. Emekeme ndibụp enye mme afanikọn̄ oro enye esisobode, ebiet oro enye esisobode afanikọn̄ emi, ye se ikpetịbede edieke enye ọduọde odụk afanikọn̄ emi, ye se iditịbede edieke enye akande enye. Ke ini ke ini, tie ye eyen fo nam wụt se enye akpanamde—oro edi, emekeme ndinam nte afo edi owo afanikọn̄, ndien eyen fo etịn̄ se enye akpanamde ke ini ọnọde enye afanikọn̄.

Utuakibuot Ubon esinọ mme ete ye eka ifet ndinam nditọ mmọ ẹfiọk ufọn edinịm mme utịtmbuba eke spirit. Mme mbụk eyouwem mme anam-akpanikọ asan̄autom Jehovah oro ẹdọn̄ọde ke mme magazine nnyịn eyenen̄ede an̄wam nditọ mbufo ẹkụt ke inyeneke se ifọnde nte edisịn idem nnam n̄kpọ Jehovah. Nam ọdọn̄ mmọ ndinam utom usiakusụn̄, ndinam utom ke Bethel, ndika Ufọkn̄wed Unọ Mme Asan̄autom Ukpep, m̀mê ndinam mme utom uyọhọ ini eken.

Se ẹkpefepde: Ndusụk mme ete ye eka emi ẹyomde nditọ mmọ ẹnam nti n̄kpọ ẹsitak ke ndikere se mmọ ẹyomde nditọ ẹnam tutu ẹfre ndikọm nditọ ke se mmọ ẹnamde. Enen̄ede ọfọn ndisịn udọn̄ nnọ nditọ mbufo ndinịm nti utịtmbuba utọ nte edinam utom ke Bethel ye utom isụn̄utom. Edi ke ini anamde oro, kpeme mbak udunam enye ayat esịt m̀mê ndinam esịt ọduọ enye. (Col. 3:21) Ti ke ọfọn enye n̄ko ama Jehovah ke esịt esie—idịghe sia afo amama. (Matt. 22:37) Ntem, toro enye ke se enye anamde, utu ke ndikọbọ ntịn̄ se enye mînamke. Nam enye okụt kpukpru se Jehovah anamde ọnọ enye. Ndien yak enye owụt esịtekọm aban̄a mfọnido Jehovah ke idemesie.

Nam Enyene Inem

Ọyọhọ n̄kpọ ita oro edinamde Utuakibuot Ubon mbufo enyene uforo edi ndinam enye enyene inem. Didie ke ekeme ndinam emi? Ndusụk ini ẹmekeme ndise nnyụn̄ nneme se ẹsiode ke mme vidio nnyịn mîdịghe ẹbre drama ẹnyụn̄ ẹneme se ẹkopde. N̄ko-n̄ko, ẹmekeme ndimek ibuot Bible oro ẹmade, ẹnyụn̄ ẹdọhọ owo kiet kiet okot se owo kiet kiet eketịn̄de ke itie N̄wed Abasi oro.

Ediwak ikpehe ke Enyọn̄-Ukpeme (nsiondi  ofụri owo) enen̄ede ọfọn ndida nnịm Utuakibuot Ubon, utọ nte enye emi ẹkotde, “Eke N̄kparawa Owo” ye “Kpep Nditọ fo.” Akpatre ikpehe emi ẹsinyene nditọwọn̄.

Enyene mme ibuotikọ ke n̄wed Mme Mbụme N̄kparawa Owo Ẹbụpde, Eboho 1 emi ẹdinen̄erede in̄wam mme ete ye eka oro nditọ mmọ ẹdide uyen. Ke ini ẹnemede n̄kpọ ke n̄wed emi, ẹkûkere ke ekebe oro, “Mme Mbụme Ndida Nnyene Nneme” emi odude ke utịt ibuotikọ kiet kiet edi ekebe ndụn̄ọde kpọt. Ẹmekam ẹkeme ndida se idude ke ekebe emi nnam ukpepn̄kpọ ubon.

Ẹkûnam ukpepn̄kpọ ubon akabade etie nte ufọk-udomo. Ẹsisịn udọn̄ ẹnọ mme ete ye eka ẹdọhọ nditọ ẹwet se mmọ ẹkerede ẹban̄a se ikekpepde ke ukpepn̄kpọ ubon, ye nte ikpadade emi idu uwem. Edi ẹkûdomo ndinyịk mmọ ẹkot se mmọ ẹkewetde ẹnọ mbufo. Koro emi idiyakke mmọ ẹsiwet se inen̄erede isịne mmọ ke esịt. Ẹnọ mmọ ifụre.

Edieke ẹsinịmde Utuakibuot Ubon kpukpru ini, ẹnemede se ibehede kpukpru owo, ẹnyụn̄ ẹnamde enye enyene inem, Jehovah ọyọdiọn̄ mbufo ke ukeme oro ẹsịnde. San̄asan̄a ini emi ubon ẹtiede kiet ẹkpono Abasi mi ayanam kpukpru owo ke ubon ẹnen̄ede ẹsọn̄ idem ke n̄kan̄ eke spirit.

[Ekebe ke page 31]

Nam Enye Enyene Inem

Sista J.M., ke United States ọdọhọ ete: “Ke ini ikpepde nditọ nnyịn iban n̄kpọ, ami ye ebe mi imesineme se ẹdikpepde ke mbono esop inyụn̄ idọhọ mmọ ẹtịn̄ ibio ibio se ẹdikpepde. Ndusụk ini, imesinanam se ikotde ke Bible iwụt mîdịghe inam iwụt nte ikpọkwọrọde ikọ. Ikesinịm ukpepn̄kpọ emi itiene isua emana mmọ, inam enye enen̄erede enyene inem.”

Brọda Y.T., ke Japan ọdọhọ ete: “Man in̄wam eyen owo ukpepn̄kpọ Bible mi okụt nte ẹkesisọn̄de ndikụbọde ikpan̄wed ke eyo Bible, ima isọhi kpukpru ibuot ye ufan̄ikọ ifep ke n̄wed Isaiah inyụn̄ imịn̄ enye ntre ke anyan ikpan̄wed. Ima inyụn̄ itan̄ mme ikpan̄wed oro idian kiet iwan̄ ke eto. Eyen emi ama odomo ndiyom itien̄wed emi Jesus okokotde ke synagogue ke Nazareth. Luke 4:16-21 ọdọhọ ke Jesus ama ‘okụbọde n̄wed [Isaiah] onyụn̄ okụt’ itien̄wed emi enye okoyomde. (Isa. 61:1, 2) Edi ke ini eyen emi okodomode ndinam nte Jesus akanamde, ama ọsọn̄ enye ndikụt Isaiah ibuot 61 emi Jesus okokotde, sia ima isọhi mme ibuot ye mme ufan̄ikọ ifep ke ikpan̄wed oro. Nte Jesus akasan̄ade ọsọp okụt itien̄wed emi ama anam eyen oro ofiori ete, ‘Ih da, Jesus ikememke!’”

[Ndise ke page 30]

Ndisineme mme n̄kpọ oro nditọ fo ẹdisobode ekeme ndin̄wam mmọ ẹfiọk se ẹkpenamde ke ini ubọkn̄ka ẹyomde mmọ ẹnam idiọk

[Ndise ke page 31]

Domo ndinam ukpepn̄kpọ ubon enyene inem