Mme Ufọkn̄wed Ukara Abasi​—Uyarade Ima Jehovah

JEHOVAH edi “Akwa Anditeme” nnyịn. (Isa. 30:20) Ima anam enye esinọ mme owo ukpep. Ke uwụtn̄kpọ, ima anam enye owụt Jesus “kpukpru n̄kpọ emi enye ke idemesie anamde.” (John 5:20) Ima emi enye amade nnyịn nte Mme Ntiense esie anam enye ọnọ nnyịn “edeme mmọ eke ẹbọde ukpep,” nte nnyịn isịnde ofụri ukeme ndikpono enye nnyụn̄ n̄n̄wam mme owo.—Isa. 50:4.

Sia Kọmiti Unọ Ukpep eke Otu Ukara ẹkpebede ima Jehovah, mmọ ẹda ufọkn̄wed ukara Abasi duop ẹkpep mbon oro ẹnyenede udọn̄, emi idaha mmọ onyụn̄ ayakde ẹsịn enyịn̄ ke mme ufọkn̄wed emi. Ndi afo amada mme ufọkn̄wed emi nte uyarade ima Jehovah?

Kot se ẹwetde ibio ibio ẹban̄a mme ufọkn̄wed ukara Abasi oro ẹdude idahaemi ye se ndusụk mbon oro ẹma ẹkedụk ufọkn̄wed emi ẹtịn̄de. Ekem bụp idemfo ete, ‘Didie ke n̄keme ndibọ ufọn nto ukpep emi Abasi ọnọde mi?’

 BỌ UFỌN TO UKPEP UKARA ABASI

Sia Jehovah edide “Abasi ima,” enye ọnọ ukpep emi anamde uwem nnyịn enyene se ọwọrọde, anam nnyịn ikeme ndikan idomo, onyụn̄ anam nnyịn inen̄ede ikop idatesịt ke utom ukwọrọikọ nnyịn. (2 Cor. 13:11) Ukem nte mme mbet oro ẹkedude ke eyo mme apostle, ẹnen̄ede ẹtịm nnyịn idem man ikpekeme ndin̄wam mbon en̄wen nnyụn̄ ‘n̄kpep mmọ ẹnam kpukpru n̄kpọ’ emi ẹtemede nnyịn.—Matt. 28:20.

Okposụkedi emi nnyịn mîdikemeke ndidụk kpukpru ufọkn̄wed emi, imekeme ndibọ ufọn nto kiet ke otu ufọkn̄wed emi m̀mê akande oro. Ndien nnyịn imekeme ndida item N̄wed Abasi oro ẹnọde ke mme ufọkn̄wed emi nsịn ke edinam. Imonyụn̄ ikeme n̄ko ndinen̄ede nnyene uforo ke an̄wautom ke ini isan̄ade ye mme asan̄autom Jehovah oro ẹma ẹkebọ ukpep emi.

Bụp idemfo ete, ‘Ndi idaha mi ayayak n̄keme ndidụk ekededi ke otu ufọkn̄wed emi?’

Mme andituak ibuot nnọ Jehovah ẹbat ke edi ata akwa ifet ndinọ nti ufọkn̄wed emi ibetedem nnyụn̄ n̄kpep n̄kpọ nto mmọ. Ukpep oro afo ọbọde akpakam anam fi enen̄ede ekpere Abasi onyụn̄ etịm fi idem man ekpekeme ndinam mme utom oro ẹnọde fi, akpan akpan utom edikwọrọ eti mbụk oro anade ẹnam usọp usọp.

[Ekebe/​Mme ndise ke page 13-17]

NDITỊN̄ IBIO IBIO MBAN̄A MME UFỌKN̄WED UKARA ABASI

Ufọkn̄wed Utom Ukara Abasi

Uduak: Man ẹnọ mme asuanetop ukpep ndidi mme ọkwọrọikọ ye mme andikpep eti mbụk oro ẹkụtde unen.

Nte Ebịghide: Inyeneke utịt.

Ebiet Oro Ẹnịmde: Ufọkmbono Obio Ubọn̄. Se Inamde Owo Odot: Kpukpru owo oro ẹsidụkde mbono esop kpukpru ini, emi ẹnyịmede mme ukpepn̄kpọ Bible, emi uwem mmọ onyụn̄ odude ke n̄kemuyo ye mme edumbet Christian.

Nte Ẹkpesịnde Enyịn̄: Esenyịn Ufọkn̄wed Utom Ukara Abasi esisịn owo enyịn̄.

Sharon, emi ọdọn̄ọde idiọk udọn̄ọ emi mîyakke enye anam baba n̄kpọ kiet, ọdọhọ ete: “Ufọkn̄wed Utom Ukara Abasi ekpep mi ndinam ndụn̄ọde nnyụn̄ nneme n̄kpọ ye mme owo ke usụn̄ oro esịnede ifiọk. Mmonyụn̄ n̄kpep ndiwụk ntịn̄enyịn ke se mbon en̄wen ẹyomde ke n̄kan̄ eke spirit, idịghe okịmmọ kpọt.”

Arnie, emi edide esenyịn oro asan̄ade-san̄a ke ediwak isua, ọdọhọ ete: “N̄kedi ekek toto ke uyen, n̄kesinyụn̄ n̄kemeke ndise owo iso ntịn̄ ikọ. Ufọkn̄wed emi anam nnyene uko nnyụn̄ mfiọk ke mmenyene ufọn. Jehovah ada ufọkn̄wed emi an̄wam mi, ndien mmọfiọk ndikot ibifịk ye nte n̄kpetịn̄de enyịn ke n̄kpọ. Mmọkọm Abasi nte n̄kemede nditoro enye ke esop ye ke utom ukwọrọikọ.”

 Ufọkn̄wed Mme Andidụk Bethel

Uduak: Man ẹn̄wam mbufa mbon oro ẹdide Bethel ẹkụt unen ke utom mmọ.

Nte Ebịghide: Minit 45 kpukpru urua ke n̄kpọ nte ọfiọn̄ inan̄.

Ebiet Oro Ẹnịmde: Bethel.

Se Inamde Owo Odot: Ana owo edi owo ubon Bethel m̀mê owo emi anamde utom ibio ini ke Bethel ke isua kiet m̀mê akande oro.

Nte Ẹkpesịnde Enyịn̄: Mbufa mbonubon Bethel ke ẹsisịn enyịn̄.

Demetrius, emi okodụkde ufọkn̄wed emi ke iduọk isua 1980, ọdọhọ ete: “Ufọkn̄wed emi ama anam nnen̄ede mfiọk ndikpep n̄kpọ onyụn̄ etịm mi idem ndidu ke Bethel mbịghi. Mme andikpep, se ẹkekpepde, ye nti item oro ẹkenọde ẹma ẹnam nnịm ke Jehovah enen̄ede ekere aban̄a mi onyụn̄ oyom mi n̄kụt unen ke utom Bethel mi.”

Kaitlyn ọdọhọ ete: “Ẹma ẹn̄wam mi n̄wụk ntịn̄enyịn ke se idide akpan n̄kpọ ikan—ndidi owo emi amade n̄kpọ eke spirit. Ufọkn̄wed emi anam nnen̄ede mfiọk nnyụn̄ mma Jehovah, ufọk esie, ye esop esie.”

Ufọkn̄wed Utom Obio Ubọn̄

Uduak: Man ẹkpep mme esenyịn oro ẹsan̄ade-san̄a, mbiowo, ye ndusụk ini, mme asan̄autom unamutom, ndise mban̄a utom mmọ ke esop. (Utom 20:28) Ẹsineme nte n̄kpọ etiede idahaemi, ẹneme ido ererimbot oro anade ifep, ẹnyụn̄ ẹneme se esop ẹyomde. Otu Ukara esibiere ini emi ẹdinịmde ufọkn̄wed emi ke n̄kpọ nte isua ifan̄ ẹma ẹbe.

Nte Ebịghide: Ke mme isua ndondo emi, mme esenyịn oro ẹsan̄ade-san̄a ẹsidụk ufọkn̄wed emi usen iba m̀mê usen iba ye ubak, mbiowo ẹdụk usen kiet ye ubak, ndien mme asan̄autom unamutom ẹdụk usen kiet.

Ebiet Oro Ẹnịmde: Ẹsiwak ndinịm ke Ufọkmbono Obio Ubọn̄ m̀mê ke Ufọk Mbono.

Se Inamde Owo Odot: Ana owo edi esenyịn oro asan̄ade-san̄a, ebiowo, m̀mê asan̄autom unamutom.

Nte Ẹkpesịnde Enyịn̄: Esenyịn circuit esikot mbiowo ye mme asan̄autom unamutom. N̄kọk itieutom esikot mme esenyịn oro ẹsan̄ade-san̄a.

“Okposụkedi emi ẹsidade esisịt ini ẹkpep ekese n̄kpọ ke ufọkn̄wed emi, enye esin̄wam mbiowo ẹka iso ẹkop idatesịt ẹnyụn̄ ‘ẹnam n̄kpọ nte irenowo’ ke utom Jehovah. Mbufa ye n̄kani mbiowo ẹsikpep nte ẹkpetịmde ẹbọk erọn̄ ẹnyụn̄ ẹdiana kiet ke ‘nte ẹkerede n̄kpọ.’”​—Quinn (odude mi ke idak).

“Ukpep emi anam nnyịn inen̄ede ifiọk mme n̄kpọ oro ẹban̄ade utuakibuot nnyịn, odụri nnyịn utọn̄ aban̄a mme afanikọn̄, onyụn̄ ọnọ nnyịn nti ekikere aban̄a nte ikpesede iban̄a otuerọn̄. Jehovah ọfọn ido etieti ke ndin̄wam nnyịn.”​—Michael.

 Ufọkn̄wed Utom Usiakusụn̄

Uduak: Man ẹn̄wam mme asiakusụn̄ ‘ẹnam utom mmọ ọyọhọ ọyọhọ ẹma.’​—2 Tim. 4:5.

Nte Ebịghide: Urua iba.

Ebiet Oro Ẹnịmde: N̄kọk itieutom esibiere; esiwak ndidi ke Ufọkmbono Obio Ubọn̄.

Se Inamde Owo Odot: Ana owo anam utom usiakusụn̄ ofụri ini ke isua kiet m̀mê akande oro. *

Nte Ẹkpesịnde Enyịn̄: Esenyịn circuit esisịn enyịn̄ mme asiakusụn̄ oro ẹdotde onyụn̄ asian mmọ.

Lily (odude mi ke nnasia) ọdọhọ ete:“Ufọkn̄wed oro an̄wam mi n̄kan mme mfịna ke an̄wautom ye ke uwem mi. Mmenen̄ede nnam n̄kọri ke nte n̄kpepde n̄kpọ, n̄kpepde owo n̄kpọ, nnyụn̄ ndade Bible nnam n̄kpọ. Ufọkn̄wed emi anam mi nnen̄ede ndot ndin̄wam mbon en̄wen, ndibere ye mbiowo, nnyụn̄ ntịp nsịn ke n̄kọri esop.”

Brenda, emi ama okodụk ufọkn̄wed emi ikaba ọdọhọ ete: “Enye anam mi nsịn idem ofụri ofụri ke mme n̄kpọ eke spirit, nnen̄ede nnyene eti ubieresịt, nnyụn̄ ntịn̄ enyịn n̄n̄wam mbon en̄wen. Ke akpanikọ, Jehovah enen̄ede atat ubọk!”

[Ikọ Idakisọn̄]

Ufọkn̄wed Mbiowo Esop

Uduak: Man ẹn̄wam mbiowo ẹse ẹban̄a utom mmọ ke esop ẹnyụn̄ ẹnen̄ede ẹsọn̄ idem ke n̄kan̄ eke spirit.

Nte Ebịghide: Usen ition.

Ebiet Oro Ẹnịmde: N̄kọk itieutom esibiere; ẹsiwak ndinịm ke Ufọkmbono Obio Ubọn̄ m̀mê ke Ufọk Mbono.

Se Inamde Owo Odot: Ana owo edi ebiowo.

Nte Ẹkpesịnde Enyịn̄: N̄kọk itieutom esikot mbiowo.

Kop se ndusụk mbon oro ẹkedụkde ọyọhọ otu 92 ke United States ẹketịn̄de mi:

“Ufọkn̄wed emi enen̄ede anam ufọn ọnọ mi, anam mi nnen̄ede nse idemmi nnyụn̄ n̄kụt nte n̄kemede ndise mban̄a mme erọn̄ Jehovah.”

“Mmodot ndinen̄ede nsịn udọn̄ nnọ kpukpru owo ebe ke nditịn̄ mme ọkpọikọ ke N̄wed Abasi.”

“Ndifreke ukpep emi tutu amama.”

Ufọkn̄wed Mme Esenyịn Oro Ẹsan̄ade-San̄a ye Iban Mmọ

Uduak: Man ẹn̄wam mme esenyịn circuit ye district ẹnen̄ede ẹnam utom mmọ ọfọn nte mmọ ẹsan̄ade ẹse mme esop ẹnyụn̄ ‘ẹnamde utom ọkpọsọn̄ ke utịn̄ikọ ye ukpepn̄kpọ.’—1 Tim. 5:17; 1 Pet. 5:2, 3.

Nte Ebịghide: Ọfiọn̄ iba.

Ebiet Oro Ẹnịmde: N̄kọk itieutom esibiere.

Se Inamde Owo Odot: Ana andidụk edi esenyịn circuit m̀mê district.

Nte Ẹkpesịnde Enyịn̄: N̄kọk itieutom esikot mme esenyịn oro ẹsan̄ade-san̄a ye iban mmọ ẹdidụk.

“Ẹma ẹnam nnyịn inen̄ede ikụt nte Jesus odotde ndidi ibuot esop Abasi. Ima ikụt ke odot isịn udọn̄ inọ nditọete oro isikade ikese inyụn̄ inam esop kiet kiet ọdọdiọn̄ adiana kiet. Ufọkn̄wed emi anam nnyịn inen̄ede ifiọk ite ke adan̄aemi esenyịn oro asan̄ade-san̄a esinọde item ye edinen̄ede ke ini ke ini, akpan uduak esie edi ndin̄wam nditọete ẹkụt ke Jehovah ama mmimọ.”—Joel, akpa otu, 1999.

 Ufọkn̄wed Ukpep Bible Eke Nditọete Iren Emi Mîdọhọ Ndọ

Uduak: Man ẹtịm mbiowo ye mme asan̄autom unamutom oro mîdọhọ ndọ idem ndise mban̄a ifetutom efen efen ke esop Jehovah. Ẹyenọ ediwak mme andikụre ufọkn̄wed emi ẹka ebiet emi ẹyomde un̄wam ke idụt mmọ. Ẹkeme ndinọ mbon eken ẹka idụt efen edieke mmọ ẹnyịmede. Ndusụk mme andikụre ukpep ẹkeme ndinam utom nte mme akpan asiakusụn̄ ibio ini man ẹketọn̄ọ ẹnyụn̄ ẹtat utom ukwọrọikọ ke mme ebiet emi ẹdude nsannsan.

Nte Ebịghide: Ọfiọn̄ iba.

Ebiet Oro Ẹnịmde: N̄kọk itieutom esibiere; ẹsiwak ndinịm ke Ufọkmbono Obio Ubọn̄ m̀mê ke Ufọk Mbono.

Se Inamde Owo Odot: Nditọete iren oro mîdọhọ ndọ, emi ẹdude ke ufọt isua 23 esịm 62, ẹkopde nsọn̄idem, ẹkpenyụn̄ ẹmade ndinam utom ke ebiet ekededi oro udọn̄ okponde. (Mark 10:29, 30) Ana mmọ ẹnam utom nte mme asiakusụn̄ ofụri ini ke nsụhọde n̄kaha isua iba ẹnyụn̄ ẹnam utom nte mbiowo m̀mê mme asan̄autom unamutom ke isua iba ye unana editre.

Nte Ẹkpesịnde Enyịn̄: Ẹsinịm mbono ke mbono circuit man ẹnọ mbon oro ẹkpemade ndisịn enyịn̄ ntọt.

Rick emi okodụkde ọyọhọ otu 23 ke ufọkn̄wed emi ke United States ọdọhọ ete: “Ndiyak idemmi nsịn ke ukpep emi anam spirit Jehovah anam ikpọ ukpụhọde ke uwem mi. Ke ini Jehovah ọnọde owo utom, enye esin̄wam owo oro anam utom oro. Mmekpep ke edieke n̄wụkde ntịn̄enyịn ke uduak Abasi utu ke uduak mi, ke Abasi ọyọsọn̄ọ mi idem.”

Andreas emi anamde utom ke Germany ọdọhọ ete: “Mmekpep ke nte ẹnamde n̄kpọ ke esop Abasi ke eyo nnyịn emi edi utịben̄kpọ. Ukpep oro ama etịm mi idem ọnọ utom oro nnyenede ndinam. Ke adianade do, uwụtn̄kpọ mme owo oro ẹsiakde ke Bible ẹkpep mi ata akpanikọ emi: Ndinam n̄kpọ nnọ nditọete mi ye Jehovah ayanam n̄kop ata inemesịt.”

Ufọkn̄wed Ukpep Bible Eke Mme Christian Oro Ẹdọde Ndọ

Uduak: Man ẹnọ mme ọdọ ndọ san̄asan̄a ukpep man Jehovah ye esop esie ẹkeme ndinen̄ede nda mmọ nnam n̄kpọ. Ẹdinọ ediwak mme andikụre ufọkn̄wed emi ẹka ebiet emi ẹnen̄erede ẹyom un̄wam ke idụt mmọ. Ẹkeme ndinọ ndusụk mmọ ẹka idụt efen edieke mmọ ẹnyịmede ndika. Ndusụk mme andikụre ukpep ẹkeme ndinam utom nte mme akpan asiakusụn̄ ibio ini man ẹketọn̄ọ ẹnyụn̄ ẹtat utom ukwọrọikọ ke mme ebiet emi ẹdude nsannsan.

Nte Ebịghide: Ọfiọn̄ iba.

Ebiet Oro Ẹnịmde: Ẹnịm ufọkn̄wed emi ke United States, edi ọtọn̄ọde ke September 2012, ẹyenịm enye n̄ko ke nsio nsio idụt emi ẹmekde ke ofụri ererimbot. Ẹsinịm enye ke Ufọkmbono Obio Ubọn̄ m̀mê ke Ufọk Mbono.

Se Inamde Owo Odot: Mme ọdọ ndọ emi ẹdude ke ufọt isua 25 esịm 50, ẹkopde nsọn̄idem, ẹkemede ndika ebiet ekededi oro ẹnen̄erede ẹyom un̄wam, emi ẹnyụn̄ ẹnyenede edu emi: “Se mi mi! Dọn̄ mi utom.” (Isa. 6:8) Ana mmọ ẹdọ ndọ ke nsụhọde n̄kaha isua iba ẹnyụn̄ ẹnam utom uyọhọ ini ke nsụhọde n̄kaha isua iba ye unana editre. Ana ebe edi ebiowo m̀mê asan̄autom unamutom ke nsụhọde n̄kaha isua iba ye unana editre.

Nte Ẹkpesịnde Enyịn̄: Ẹsinịm mbono ke mbono district man ẹnọ mbon oro ẹkpemade ndisịn enyịn̄ ntọt. Edieke owo mînịmke mbono emi ke mbono district ke idụt mbufo, edi afo akpama ndisịn enyịn̄, emekeme ndiwet n̄kọk itieutom idụt mbufo ndọhọ ẹnọ fi ntọt efen efen.

“Ọfiọn̄ iba oro ẹsidụkde ufọkn̄wed oro enen̄ede okpụhọde uwem mme ọdọ ndọ onyụn̄ ọnọ mbon oro ẹyomde ndinam ekese ke utom Jehovah akwa ifet! Imebiere ndida eti ibuot ndu uwem oro edinamde nnyịn ida ini nnyịn inam n̄kpọ ọniọn̄ ọniọn̄.”—Eric ye Corina, (odude mi ke idak), akpa otu, 2011.

Ufọkn̄wed Enyọn̄-Ukpeme Ukpep Bible Eke Gilead

Uduak: Man ẹnọ mme andidụk ukpep ndinam utom isụn̄utom ke ebiet emi mme owo ẹnen̄erede ẹwak, ndidi mme esenyịn oro ẹsan̄ade-san̄a, m̀mê ndidi mbonubon Bethel. Ẹnam emi man nte ẹtịmde utom ukwọrọikọ, esop, ye n̄kọk itieutom enen̄ede ọfọn.

Nte Ebịghide: Ọfiọn̄ ition.

Ebiet Oro Ẹnịmde: Itie Unọ Ukpep Enyọn̄-Ukpeme ke Patterson ke New York, U.S.A.

Se Inamde Owo Odot: Mme ọdọ ndọ oro ẹdude ke san̄asan̄a utom uyọhọ ini—oro edi, mme isụn̄utom emi mîdụkke kan̄a ufọkn̄wed emi, mme akpan asiakusụn̄, mme esenyịn oro ẹsan̄ade-san̄a, m̀mê mbonubon Bethel. Ana mmọ ẹnam utom emi nte ebe ye n̄wan ke nsụhọde n̄kaha isua ita ye unana editre. Ana mmọ ẹfiọk nditịn̄, ndikot, ndinyụn̄ n̄wet Ikọmbakara ọfọn.

Nte Ẹkpesịnde Enyịn̄: Kọmiti N̄kọk Itieutom ẹkeme ndidọhọ owo esịn n̄wed eben̄e.

Lade ye Monique emi ẹtode United States ẹnam utom idahaemi ke Africa. Lade ọdọhọ ete: “Ufọkn̄wed Gilead ama etịm nnyịn idem ndika ebiet ekededi ke ererimbot, iben̄e idem, inyụn̄ inam utom ye ndima nditọete nnyịn.”

Monique adian do ete: “Mmenen̄ede n̄kop idatesịt ke utom mi nte ndade se n̄kekpepde ke Ikọ Abasi nsịn ke edinam. Nda idatesịt oro nte n̄kaiso uyarade ima Jehovah.”

Ufọkn̄wed Mbon Kọmiti N̄kọk Itieutom ye Iban Mmọ

Uduak: Man ẹn̄wam mbon Kọmiti N̄kọk Itieutom ẹtịm ẹse ẹban̄a mme ufọkidụn̄ Bethel, ẹnọ ntịn̄enyịn ke mme n̄kpọ oro ẹbehede esop, ẹse ẹban̄a mme circuit ye mme district. Mmọ ẹkpep n̄ko ẹban̄a utom ukabade n̄wed, umịn̄ n̄wed, ye unọ n̄wed ẹsọk mme esop.

Nte Ebịghide: Ọfiọn̄ iba.

Ebiet Oro Ẹnịmde: Itie Unọ Ukpep Enyọn̄-Ukpeme ke Patterson ke New York, U.S.A.

Se Inamde Owo Odot: Ana owo edi owo Kọmiti N̄kọk Itieutom m̀mê Kọmiti Idụt m̀mê oro ẹmekde anam utom ntre.

Nte Ẹkpesịnde Enyịn̄: Otu Ukara esikot nditọete emi ye iban mmọ ẹdidụk.

Lowell ye Cara, emi ẹkedụkde ọyọhọ otu 25, ẹnam utom idahaemi ke Nigeria. Lowell ọdọhọ ete: “Ẹma ẹti mi ke inamke n̄kpọ m̀mê nnam utom adan̄a didie m̀mê nso ke nnam, ke akpan n̄kpọ oro anamde esịt enem Jehovah edi ndisọn̄ idem ke n̄kan̄ eke spirit. Ufọkn̄wed oro ama ọsọn̄ọ owụt n̄ko ke ikpanam n̄kpọ ye mbon en̄wen ke usụn̄ emi owụtde adan̄a nte Jehovah amade nnyịn.”

Cara adian do ete: “N̄kpọ kiet oro n̄kade iso ndikere mban̄a edi emi: Edieke mmen̄kemeke nditịn̄ n̄kpọ ke mmemmem usụn̄, oyom nnen̄ede n̄kpep n̄kpọ oro mbemiso ndomode ndikpep mbon en̄wen.”