Ikpe Etebe Mbon Oro Ẹkenọmọde

KE May 3, 2007, Esopikpe Mbon Europe Esede Aban̄a Unen Owo ke Strasbourg ke France ama etebe Mme Ntiense Jehovah ke Republic of Georgia ikpe. Esop emi ama okụt ke ẹma ẹnam n̄kpọ ibak ibak ye Mme Ntiense ke Georgia, ke owo ikonyụn̄ iyakke mmọ ẹtuak ibuot ẹnọ Abasi ifụre ifụre. Esop emi ama asua ọnọ akani ukara Georgia ke ndikododop uyo nse mme abiatibet oro. Nso ikanam Esop ebiere ikpe emi ntem?

Ke October 17, 1999, owo 120 ke Esop Gldani eke Mme Ntiense Jehovah ẹkesụk ẹtuak ibuot ẹnọ Abasi ifụre ifụre ke Tbilisi, emi edide ibuot obio Georgia. Ẹtise, Vasili Mkalavishvili, kpa oku ufọkabasi Orthodox oro ẹma ẹkebịn ẹfep, asan̄a ye ediwak mbon ntịme obụn̄ odụk ọtọ mbono esop Mme Ntiense emi. Mbon ntịme oro ẹma ẹkama okpoyon̄ ye mme cross emi ẹdade ukwak ẹnam ẹyịbi mme andikodụk mbono emi, ẹnyụn̄ ẹnọ ediwak mmọ ata ikpọ unan. Ẹma ẹmia mma kiet enyịn kiet ẹsịri. Ẹma ẹda owo 16 ke nsụhọde n̄kaha ẹka ufọkibọk. Ke ini Mme Ntiense ẹkekade itieutom mme bodisi ẹkeyom un̄wam, akwa owo bodisi oro mmọ ẹkesobode ọkọdọhọ ke ekpedi imọ, ke ikpakanam mmọ ikan oro! Kiet ke otu mbon ntịme oro ama akama ukwak usio ndise vidio osio ntịme oro onyụn̄ anam ẹbre enye ke itieutom ekebe ndise idụt oro, ndien emi ama anam ẹnen̄ede ẹfiọk mbon ntịme oro. *

Mme Ntiense oro ẹkenọmọde mi ẹma ẹkot mbon ntịme emi ikpe, edi ukara ikanamke mbon ntịme emi n̄kpọ ndomokiet. Owo bodisi oro ẹkedọhọde ese aban̄a se iketịbede ọkọdọhọ ke imọ idikemeke ndikpe edinen ikpe sia imọ idide owo ufọkabasi Orthodox. Sia ukara mîkosioroke uyo, emi ama ọnọ mbon ntịme emi odudu ndifiak nsịn utọ ntịme emi mbe utịm ike-100.

Ntem, ke June 29, 2001, Mme Ntiense Jehovah ẹma ẹda ikpe emi ẹka Esopikpe Mbon Europe Esede Aban̄a Unen Owo. * Esop emi ama ebiere ikpe emi ke May 3, 2007, anam mme owo ẹnen̄ede ẹfiọk se iketịbede, onyụn̄ asua ọnọ ukara Georgia ke ndikodop uyo nse mbon ntịme emi. Esop oro ọkọdọhọ ete: “Akpakana ukara . . . ọsọsọp odụn̄ọde se iketịbede” oro. Esop ekebiere ete ke “ukara ndikodop uyo nse mme utọ edinam oro idiyakke mme owo ẹbuọt idem ke Ukara, oyonyụn̄ anam mme owo ẹbiat ibet nte ẹmama.”

Esop oro ekebiere ete: “Ntịme oro ẹkesịnde ye Mme Ntiense Jehovah ke October 17, 1999 ekedi akpa akwa nyomikọ oro ẹkeyomde mmọ, ndien ukara ndikododop uyo nse emi ama anam mbon ntịme emi ẹdọdiọn̄ ẹsịn ukem ntịme emi ke ofụri Georgia.”

Ntre, ẹma ẹtebe Mme Ntiense oro ẹkenọmọde mi ikpe, ẹnyụn̄ ẹdọhọ ukara Georgia ekpe Esop Gldani isop. Mme Ntiense Jehovah ke Georgia ẹkop inemesịt nte ke afai ye ntịme emi ẹsụhọde ubọk, ẹnyụn̄ ẹdat esịt sia ubiere oro Esop ekesịmde owụt ke mmọ ẹnyene unen ndituak ibuot nnọ Abasi ke ifụre. Mmọ ẹnen̄ede ẹkọm Ete mmọ eke heaven, kpa Jehovah Abasi, emi ekekpemede onyụn̄ esede aban̄a mmọ ke ofụri ini afanikọn̄ oro.—Psalm 23:4.

[Mme Ikọ Idakisọn̄]