Ẹkekot Mme Owo ye Uduak

NSO ke ẹsinam ke akamba n̄kọk itieutom Mme Ntiense Jehovah ke Mogale (Krugersdorp), emi odude ekpere Johannesburg ke South Africa? Ediwak mbon oro ẹsiwatde ẹbe ebiet emi ẹsibụp mbụme emi. Ntre Mme Ntiense ẹma ẹmek akpan usen iba ẹnịm—October 12 ye 13, 2007—man mme owo ẹsan̄a ẹse n̄kọk itieutom emi. Ntak iba akanam ẹnam emi—man mme owo ẹkûkop étè étè ikọ oro ẹkesitịn̄de, ẹnyụn̄ ẹwụt mmọ se ẹnamde ke n̄kọk itieutom emi man ẹnam utom oro Jesus Christ ọkọdọhọde ẹnam.—Matthew 28:19, 20.

Mbon oro ẹnamde utom ke n̄kọk itieutom oro ẹma ẹnịm ikpọ idiọn̄ọ ke inuaotop ndidara mbon oro ẹkedide, ndien mmọ ẹma ẹnọ mbon oro ẹkedụn̄de ẹkpere san̄asan̄a ikot. Ẹma ẹkot mbon mbubehe ye ubon mmọ. Nso ikedi utịp? Isenowo oro ẹkebede owo 500, emi mîdịghe Mme Ntiense Jehovah, ẹma ẹsan̄a ẹkanade n̄kọk itieutom oro.

Mme owo ẹma ẹnen̄ede ẹma akamba ukwak umịn̄n̄wed oro ẹkotde MAN Roland Lithoman, emi ẹsimịn̄de magazine 90,000 ke hour kiet. Ama eye isenowo ndikụt akamba itie oro ẹsinọde ediwak n̄wed ẹwọrọ kpukpru usen, ọkọrọ ye itie oro ẹsidiande n̄wed. Mme Ntiense oro ẹnamde utom ke nsio nsio itieutom ẹma ẹwụt ndiye ndise, esịnede ndise oro okowụtde ini ẹketọn̄ọde ndida masịn mmịn̄ n̄wed, utọ nte masịn oro ẹkotde Gutenberg ye enye oro ẹdade ẹmịn̄ n̄wed mfịn. Ndise efen ama owụt nte ẹsisede ẹban̄a n̄kọk itieutom oro. Ke uwụtn̄kpọ, odu ekwa oro esimende idiọk ofụm ye utebe oro ukwak umịn̄n̄wed osiode efep, ndien odu ikpehe oro esimende mbai n̄wed ọduọn̄ọ.

N̄wedmbụk n̄kpọntịbe n̄kann̄kụk oro ama etịn̄ ke mme anamutom unyịmesịt 700 emi ẹdụn̄ọde do “edi mme asan̄autom oro ẹma ẹkedori ubọk, emi ẹma ẹkeyak idem ẹnọ Jehovah.” Enye n̄ko ama etịn̄ aban̄a “nte ẹkenen̄erede ẹnịm n̄kann̄kụk oro asana ye nte ẹkenamde kpukpru n̄kpọ ke ini” ke itie umịn̄n̄wed. Owo oro ekesibiọn̄ọde Mme Ntiense Jehovah ama edi ndise n̄kọk itieutom emi. Ke enye ama ọkọnyọn̄, enye ama ewet leta ete: “Ẹsọsọn̄ọ-o! Imemke utom ndikụt utọ ediye itie emi mfịn.”

Ediwak isenowo ẹma ẹkop inemesịt ndisan̄a n̄kanade n̄kọk itieutom emi onyụn̄ akpa mmọ idem nte ke ẹnyene mme n̄wed Bible ke usem 151 ẹnyụn̄ ẹmịn̄ n̄wed ẹnọ idụt 18 ke usụk usụk ye ufọt ufọt Africa. Ke ofụri ererimbot, ẹsiyak mme owo ẹsan̄a ẹse n̄kọk itieutom Mme Ntiense Jehovah ke ini ẹsụk ẹnamde utom. Ntak mûyomke ini uka man ekese n̄kọk itieutom oro odude ekpere fi?

[Ndise ke page 14]

N̄wedikot

[Ndise ke page 14]

Isenowo ẹdisịm n̄kọk itieutom

 [Mme ndise ke page 15]

N̄kọk itieutom South Africa ke Mogale

[Ndise ke page 15]

Ukwak umịn̄n̄wed oro ẹkotde MAN Roland Lithoman

[Ndise ke page 15]

Itie udiann̄wed

[Ndise ke page 15]

Itie unọ n̄wed ọwọrọ