‘Mmọfiọk Ubiak Mmọ’
San̄a Kpere Abasi
‘Mmọfiọk Ubiak Mmọ’
“EDISANA, edisana, edisana Jehovah mme udịm.” (Isaiah 6:3) Ikọ oro ẹkedade odudu spirit ẹwet do owụt ke Jehovah Abasi asana onyụn̄ eden̄i esịm akpatre ntọi. Afo emekeme ndibụp ete, ‘Ndi enye ndisana ntem anam enye okûkere aban̄a nnyịn m̀mê ndidi se owo mîkemeke ndisan̄a n̄kpere? Ndi utọ edisana Abasi emi ekeme ndinen̄ede n̄kere mban̄a mi—ami anana-mfọnmma anamidiọk?’ Ẹyak idụn̄ọde ikọ ndọn̄esịt oro Abasi eketịn̄de ọnọ Moses, emi ẹwetde ke Exodus 3:1-10.
Ke adan̄aemi Moses ekekpemede erọn̄ usen kiet, enye ama okụt ata esen esen n̄kpọ—ikan̄ ama asak ke eto edi “itaha eto.” (Ufan̄ikọ 2) Sia okoyomde ndifiọk n̄kpọ emi, enye ama asan̄a ekpere man ese. Jehovah ama anam angel etie ke ufọt ikan̄ oro etịn̄ ikọ ọnọ Moses ete: “Kûsan̄a ukpere ken; sio ikpa-ukot fo ke ukot fo fep: koro ọtọ oro afo adade ke esịt edi edisana isọn̄.” (Ufan̄ikọ 5) Kere ban̄a oro—sia ikan̄ oro akadade aban̄a edisana Abasi ndidu do, isọn̄ oro ama akabade edisana!
Edisana Abasi ama enyene ntak ndinyene nneme ye Moses. Abasi ọkọdọhọ ete: “Mmetịm n̄kụt ukụt ikọt mi emi ẹdude ke Egypt, mmonyụn̄ n̄kop eseme mmọ ẹban̄a mme otụk mmọ; koro mfiọkde ubiak mmọ.” (Ufan̄ikọ 7) Abasi ama okụt nnanenyịn ikọt esie; enye ama onyụn̄ okop eseme mmọ. Ntre, nnanenyịn mmọ ekedi esiemmọ. N̄kọ omokụt ke Abasi ọkọdọhọ ete: ‘Mmọfiọk ubiak mmọ.’ N̄wed ndụn̄ọde kiet etịn̄ ntem aban̄a ikọ oro ‘mmọfiọk,’ ete: “Ikọ oro aban̄a nte etiede enyene-idem ke idem, edikere mban̄a, ye mbọm.” Ikọ oro Abasi eketịn̄de ọnọ Moses owụt nte Abasi enen̄ede ekere aban̄a owo.
Nso ke Abasi akanam? Enye iketiehe-tie ise m̀mê ndikokop kpọt ke ntak mbọm. Enye ama anam n̄kpọ aban̄a. Enye ama ebiere ndifak ikọt esie nsio ke Egypt nnyụn̄ nda mmọ n̄ka “isọn̄ emi ọfiọrọde mmọn̄-eba ye aran-ọkwọk.” (Ufan̄ikọ 8) Oro ama anam Jehovah ọnọ Moses utom, ete: ‘Sio ikọt mi ke isọn̄ Egypt fep.’ (Ufan̄ikọ 10) Moses ama anam utom oro onyụn̄ osio Israel ke Egypt ke isua 1513 M.E.N.
Jehovah ikpụhọkede. Mme andituak ibuot nnọ enye mfịn ẹkeme nditịm nnịm ke enye okụt nnanenyịn mmimọ onyụn̄ okop eseme mmimọ. Enye enen̄ede ọfiọk ubiak mmọ. Edi Jehovah ikopke-kop mbọm kpọt iban̄a mme ifịk ifịk asan̄autom esie. Abasi ima esin̄wam mmọ “koro enye ekerede” aban̄a mmọ.—1 Peter 5:7.
Esịtmbọm Abasi anam nnyịn inyene idotenyịn. Enye ekeme ndin̄wam nnyịn mme anana-mfọnmma owo idomo ndida ndinen ye ndisana edumbet esie idu uwem inyụn̄ idi se enye amade. (1 Peter 1:15, 16) Mbụk oro aban̄ade se Moses okosobode ke ikọt ama esịn udọn̄ ọnọ Christian an̄wan kiet emi ọkọyọde mfụhọ ye mmemidem. Enye ọdọhọ ete: “Edieke Jehovah akam ekemede ndinam ntanisọn̄ asana, ọwọrọ ke mmosụk nnyene esisịt idotenyịn. N̄kpọ emi aman̄wam mi ọsọn̄!”
Ndi ọdọn̄ fi ndikpep n̄kpọ efen efen mban̄a Jehovah, kpa edisana Abasi? Emekeme ndinyene n̄kpet n̄kpet itie ebuana ye Jehovah, koro enye “ọfiọkde nte iborode; emeti ete ke nnyịn idi ntan.”—Psalm 103:14.