Ete Nditọ-Akpa
San̄a Kpere Abasi
Ete Nditọ-Akpa
“ABASI edi ete ndito-akpa . . . ke edisana idụn̄ esie.” (Psalm 68:5) Ikọ eke odudu spirit emi ekpep nnyịn n̄kpọ oro anamde nnyịn isan̄a ikpere Jehovah Abasi—oro edi, ke esidọn̄ enye ndin̄wam mbon oro ẹdude ke unana. Ibet oro enye ọkọnọde nditọ Israel ama enen̄ede owụt ke enye ekere aban̄a nditọakpa. Ẹyak idụn̄ọde akpa itie oro Bible etịn̄de n̄kpọ aban̄a “nditọ-akpa,” ke Exodus 22:22-24.
Abasi odụri nnyịn utọn̄ ete: “Ẹkûfịk baba . . . eyen-akpa.” (Ufan̄ikọ 22) Emi ikedịghe ikpîkpu ediben̄e mme owo ẹfọn ido ye nditọakpa; enye ekedi ewụhọ Abasi. Mme owo ẹma ẹsiwak ndifịk eyen oro ete akpade ọkpọn̄—sia enye mînyeneke aba ete emi ekedide andikpeme ye andibọk enye. Owo ikenyeneke ‘ndifịk’ utọ eyen oro ke usụn̄ ekededi. Ẹkabade ikọ oro ‘fịk’ ke mme edikabade Bible en̄wen nte “fiomo,” “diọk ukama,” ye “wo.” Abasi akada edifịk nditọakpa nte idiọk n̄kpọ. Ọkọdiọk adan̄a didie?
Ibet oro aka iso ete: “Edieke afo efịkde enye, enye onyụn̄ eseme ọnọ mi, nditreke ndikop eseme esie.” (Ufan̄ikọ 23) Ufan̄ikọ 22 etịn̄ aban̄a ediwak owo ete “ẹkûfịk,” edi ẹtịn̄ ẹban̄a owo kiet ke ufan̄ikọ 23 ẹte “edieke afo efịkde.” Akana owo kiet kiet ye ofụri idụt ẹnịm ibet Abasi emi. Jehovah ke ekese; akpan̄ utọn̄ ọnọ nditọakpa, onyụn̄ eben̄e idem kpukpru ini ndikop eseme oro mmọ ẹsemede ẹyom un̄wam.—Psalm 10:14; Mme N̄ke 23:10, 11.
Nso ikenyene nditịbe edieke owo ekefịkde eyenakpa, ndien emi anam enye eseme ọnọ Abasi? Jehovah ọdọhọ ete: “Iyatesịt mi oyonyụn̄ obụmede, ndien nyowot mbufo ke ofụt.” (Ufan̄ikọ 24) N̄wed ndụn̄ọde Bible kiet ọdọhọ ke emi “ọwọrọ ke ata ata usụn̄ ‘ndien ibuo mi oyofiop,’ emi edide ebetọ ikọ emi ọwọrọde ọkpọsọn̄ iyatesịt.” N̄kọ omokụt ke Jehovah ikọdọhọke mme ebiereikpe Israel ẹkpe ikpe ẹnọ owo ke n̄kpọ emi. Abasi ke idem esiemmọ ekebiere ikpe ọnọ owo ekededi oro ekefịkde eyenakpa.—Deuteronomy 10:17, 18.
Jehovah ikpụhọkede. (Malachi 3:6) Enye esitua nditọ oro mînyeneke ete m̀mê eka, mbọm. (James 1:27) Ke akpanikọ, Ete nditọakpa isikopke inemesịt ke ini ẹfịkde nditọ oro mînyeneke un̄wam. Mbon oro ẹfịkde eyen oro mînyeneke un̄wam idibọhọke “ikan̄ iyatesịt Jehovah.” (Zephaniah 2:2) Utọ mme idiọkowo oro ẹyefiọk ke “edi n̄kpọ ndịk ndiduọ ndụk ubọk odu-uwem Abasi.”—Mme Hebrew 10:31.