Owo Esisan̄a Didie Amana Obufa?

JESUS ama asian Nicodemus nte edimana obufa edide akpan n̄kpọ, se isinamde owo amana obufa, uduak edimana obufa ye nte owo esisan̄ade amana obufa. Jesus ọkọdọhọ ete: “Ibọhọke owo ekededi amana oto ke mmọn̄ ye spirit, enye ikemeke ndidụk ke obio ubọn̄ Abasi.” (John 3:5) Ntem, owo esimana obufa ke mmọn̄ ye spirit. Edi nso ke ikọ oro “mmọn̄ ye spirit” ọwọrọ?

Nso ke “Mmọn̄ ye Spirit” Ẹdi?

Sia Nicodemus ekedide eyen ukpepn̄kpọ ido ukpono, enye ama ọfiọk nte N̄wed Abasi Usem Hebrew ekesidade ikọ oro “spirit Abasi”—kpa anamutom odudu Abasi emi ekemede ndinam mme owo ẹnam n̄wọrọnda utom. (Genesis 41:38; Exodus 31:3; 1 Samuel 10:6) Ntre, ke ini Jesus eketịn̄de ikọ aban̄a “spirit,” anaedi Nicodemus ama ọfiọk ke edi edisana spirit, kpa anamutom odudu Abasi.

Nso kaban̄a emi Jesus eketịn̄de aban̄a mmọn̄? Kere ban̄a mme edinam oro ẹwetde esisịt ini mbemiso ye ke nneme Jesus ye Nicodemus ama okokụre. Emi owụt ke John Andinịm Owo Baptism ye mme mbet Jesus ẹma ẹsinịm owo baptism mmọn̄. (John 1:19, 31; 3:22; 4:1-3) Mme owo ẹma ẹnen̄ede ẹfiọk emi ke Jerusalem. Ke ntre, ke ini Jesus eketịn̄de aban̄a mmọn̄, anaedi Nicodemus ama ọfiọk ke Jesus iketịn̄ke iban̄a ikpîkpu mmọn̄, edi ke eketịn̄ aban̄a mmọn̄ baptism.

“Baptism ke Edisana Spirit”

Edieke ‘edimana nto ke mmọn̄’ enyenede ebuana ye edina baptism mmọn̄, nso ke ‘edimana nto ke spirit’ ọwọrọ? Mbemiso nneme Nicodemus ye Jesus, John Andinịm Owo Baptism ama ọtọt ke idịghe mmọn̄ ikpọn̄ edinyene ebuana ye baptism edi ke spirit eyenyene n̄ko. Enye ọkọdọhọ ete: “Ami n̄kenịm mbufo baptism ke mmọn̄, edi enye [Jesus] eyenịm mbufo baptism ke edisana spirit.” (Mark 1:7, 8) Mark emi eketienede ewet Gospel etịn̄ akpa ini emi ẹkenịmde owo orụk baptism oro. Enye ewet ete: “Ke mme usen oro, Jesus oto Nazareth eke Galilee edi ndien John enịm enye baptism ke Jordan. Ndien kpa idaha oro enye ọwọrọde ke mmọn̄ ọdọk enye okụt nte enyọn̄ abaharede ye nte spirit osụhọrede, nte ibiom, edidoro enye ke idem.” (Mark 1:9, 10) Ke ini ẹkebụkde Jesus ke Jordan, ẹkenịm enye baptism  ke mmọn̄. Ke ebe oro enye ọkọbọde edisana spirit, ẹkenịm enye baptism ke edisana spirit.

Ke n̄kpọ nte isua ita ẹma ẹkebe tọn̄ọ Jesus akana baptism, enye ama ọn̄wọn̄ọ ọnọ mme mbet esie ete: “Ẹdinịm mbufo baptism ke edisana spirit ke usen ifan̄ ẹbede.” (Utom 1:5) Ini efe ke oro eketịbe?

Ke usen Pentecost ke isua 33 E.N., n̄kpọ nte mbet Jesus 120 ẹkesop idem ke ufọk kiet do ke Jerusalem. “Kpa idaha oro uyom oto ke heaven ọwọrọ emi ebietde uyom ata ọkpọsọn̄ ofụm, ndien enye ọyọhọ ofụri ufọk emi mmọ ẹketiede. Ndien mmọ ẹkụt mme edeme eke ẹbietde edemeikan̄ . . . , ndien kpukpru mmọ ẹyọhọ ye edisana spirit.” (Utom 2:1-4) Kpasụk usen oro, ẹma ẹdọhọ mbon en̄wen ke Jerusalem ẹte ẹna baptism mmọn̄. Apostle Peter ama asian otuowo kiet ete: “Ẹkabade esịt, kpukpru mbufo ẹnyụn̄ ẹna baptism ke enyịn̄ Jesus Christ man ẹfen mme idiọkn̄kpọ mbufo, ndien mbufo ẹyebọ edisana spirit emi edide enọ mfọn.” Nso iketịbe? “Mbon emi ẹkenyịmede ikọ esie ke ofụri esịt ẹna baptism, ndien ke usen oro n̄kpọ nte ukpọn̄ tọsịn ita ẹdiana ye mmọ.”—Utom 2:38, 41.

Edinam Ikpehe Iba

Nso ke baptism mbiba emi ẹyararede ẹban̄a edimana obufa? Mmọ ẹwụt ke edimana obufa edi ikpehe iba. N̄kọ emeti ke Jesus ekebem iso ana baptism ke mmọn̄. Ekem enye ọbọ edisana spirit. Kpasụk ntre, akpa mme mbet ẹkebem iso ẹna baptism ke mmọn̄ (John Andinịm Owo Baptism ekenịm ndusụk mmọ), ndien ekem mmọ ẹbọ edisana spirit. (John 1:26-36) Ukem oro n̄ko, mbufa mbet 3,000 oro ẹkebem iso ẹna baptism ke mmọn̄, ndien ekem ẹbọ edisana spirit.

Ke ini itide mme baptism oro ke Pentecost isua 33 E.N., nnyịn ikpekere ke ẹdimana obufa didie mfịn? Ke ukem usụn̄ oro mme apostle ye akpa mme mbet Jesus ẹkemanade obufa. Akpa kan̄a, owo enyene nditua n̄kpọfiọk mban̄a mme idiọkn̄kpọ esie, ọwọn̄ọrede ọkpọn̄ ndiọi edinam esie, ayak idem esie ọnọ Jehovah ebe ke ndituak ibuot nnọ enye nnyụn̄ nnam n̄kpọ esie, onyụn̄ ayararede uyakidem esie an̄wan̄wa ke ndina baptism mmọn̄. Ekem, enye ọyọbọ edisana spirit edieke Abasi emekde enye nditiene n̄kara ke Obio Ubọn̄ Esie. Enyene-idem anam akpa ikpehe, oro edi, (baptism mmọn̄) ke edinam ikpehe iba emi; Abasi anam udiana ikpehe, oro edi, (baptism ke spirit). Ke ini owo anade baptism mbiba emi, enye amamana obufa.

Edi ntak emi Jesus ọkọdọhọde “amana oto ke mmọn̄ ye spirit” ke ini enye ekenemede nneme ye Nicodemus? Man owụt ke mbon oro ẹnade baptism ke mmọn̄ ye spirit ẹyenam ikpọ ukpụhọde. Ibuotikọ oro etienede edineme ikpehe enye oro ke edimana obufa.

[Ndise ke page 9]

John ekenịm nditọ Israel oro ẹkekabarede esịt baptism ke mmọn̄