Ukpọhọde Inemesịt Ubon

Nditịm Mme Uyen Idem Mben̄e Ini Akwa Owo

“Ama esinem ndineme nneme ye nditọ mi. Mmọ ẹma ẹsinen̄ede ẹkpan̄ utọn̄ ke ini ntịn̄de ikọ, ẹnyụn̄ ẹsọsọp ẹnam se ndọhọde. Edi idahaemi, nnyịn isifafan̄a kpukpru n̄kpọ. Mmọ imaha mme n̄kpọ oro ẹnyenede ebuana ye utuakibuot nnyịn. Mmọ ẹsibụp ẹte, ‘Ufọn ndineme Bible?’ Ke ini nditọ mi ẹkedide n̄kpri, n̄kekereke ke utọ n̄kpọ emi eyetịbe ke ubon mi—okposụkedi emi n̄kesikụtde emi ke mme ubon en̄wen.”—Reggie. *

NDI emenyene uyen ke ubon fo? Ke edide ntre, ọwọrọ ke afo omokụt kiet ke otu n̄kọri nditọwọn̄ oro ẹsimade etieti. Edi ini emi n̄ko ekeme ndikama editịmede esịt. Ndi mme utọ n̄kpọ oro ẹtienede mi ẹwọrọ fi?

▪ Ke ini eyeneren fo ekedide ekpri, afo ye enye ẹkedi itai ye aban̄. Edi idahaemi enye akabarede uyen mi, enye ke an̄wana ndikịbe mbọhọ man aka esiemmọ, ndien etie fi nte ke enye iyomke aba un̄wam fo.

▪ Eyenan̄wan fo ama esitịn̄ kpukpru n̄kpọ ọnọ fi ke ini enye ekedide ekpri. Edi idahaemi enye akabarede uyen mi, enye edineme nneme ye mme ufan esie, inyụn̄ inemeke ye afo.

Edieke n̄kpọ emi ọwọrọde fi, kûsọsọp ubiere ke eyen fo edi eyen nsọn̄ibuot oro mîdikpụhọkede. Edi nso itịbe idahaemi? Man ibọrọ mbụme emi, ẹyak ineme nte ini uyen edide ata akpan n̄kpọ nte eyen fo ọkọride.

Ini Uyen Edi Ata Akpan Ini

Ẹsiwak nditi akpa ini oro ekpri eyen akanamde n̄kpọ—ini oro enye ọkọtọn̄ọde isan̄, eketịn̄de ikọ, ye usen oro enye ọkọtọn̄ọde n̄wed, ke ndisiak ibat ibat. Mme ete ye eka ẹsinem esịt ndikụt eyen mmọ ẹsịmde mme akpan ini emi ke uwem. Emi esiwụt ke eyen mmọ ke ọkọri.

Ini uyen edi akpan ini n̄ko, okposụkedi emi enye ekemede ndinam esịt etịmede ndusụk ete ye eka. An̄wan̄a ntak emi mmọ ẹsikopde editịmede esịt ntre. Kere ise, ewe ete m̀mê eka akpama ndikụt nte eyen esie oro ekesisụkde ibuot ọtọn̄ọde nsọn̄ibuot? Kpa ye oro, ini uyen edi akpan ini ke uwem. Ntak emi idọhọde ntre?

Bible ọdọhọ ke ini oyodu oro “owo edikpọn̄de ete esie ye eka esie.” (Genesis 2:24) Ke ini eyen fo edide uyen, akpan n̄kpọ oro enyenede ndinam edi nditịm enye idem mben̄e ini oro enye edikopde inemesịt ye mfụhọ. Enye eyekeme nditịn̄ ini oro nte apostle Paul eketịn̄de ete: “Ke ini n̄kedide eyenọwọn̄, n̄kesitịn̄ ikọ nte eyenọwọn̄, n̄kere n̄kpọ nte eyenọwọn̄, n̄kọk ibuot nte eyenọwọn̄; edi ke emi mma n̄kokpon n̄wọrọ owo, mmọduọn̄ọ mme ido uyen.”—1 Corinth 13:11.

Se eyen fo anamde edi oro ke mme isua uyen esie—oro edi, ọduọn̄ọ mme edu eyenọwọn̄  onyụn̄ ekpep ndida ke idem nnyụn̄ n̄kọri nsịm idaha oro enye ekemede ndikpọn̄ ufọk. Ke nditịm ntịn̄, n̄wed ndụn̄ọde kiet ọdọhọ ke uyen edi “ini emi eyen etịmde idem ndikpọn̄ ete ye eka esie.”

Ke akpanikọ, ndidọhọ ke eyen fo n̄kpọn̄-n̄kpọn̄ emi ebiere ndida ke idem ekeme ndinam fi obụp ete:

▪ “Edieke eyen mi eren mîkemeke ndise mban̄a n̄kpri n̄kpọ ke ufọk, didie ndien ke enye edikeme ndise mban̄a idemesie ye ofụri ubon esie?”

▪ “Edieke eyen mi an̄wan mîkemeke ndinyọn̄ ndi ufọk ke ini, didie ndien ke enye edikeme ndinam utom?”

Edieke enyenede utọ ekikere emi, ti ete ke ndida ke idem idịghe utom usen kiet, ekeme ndida eyen fo ata ediwak isua ndinam oro. Idahaemi, afo ọmọfiọk ke “ndisịme ido eyịre ke esịt eyenọwọn̄.”—Mme N̄ke 22:15.

Nte ededi, edieke etịmde ọnọ eyen fo ndausụn̄, enye ekeme ndibe ini uyen akabade akwa owo oro ekemede ‘ndinọ ukeme ufiọk n̄kpọ esie ukpep ebe ke ndida enye nnam n̄kpọ man enye ọdiọn̄ọ se inende ye se idiọkde.’—Mme Hebrew 5:14.

Se Ikemede Ndinam Ẹkụt Unen

Man etịm uyen fo idem eben̄e ini akwa owo, oyom an̄wam enye man enye ekeme ndida “ukeme ukere n̄kpọ” esie nnam nti ubiere ke idemesie. (Rome 12:1, 2) Mme edumbet Bible oro ẹtienede mi ẹyen̄wam fi anam oro.

Philippi 4:5: “Ẹyak . . . ẹdiọn̄ọ ẹban̄a eti ibuot mbufo.” Eyen fo ọdọhọ fi ke imọ idinyọn̄ke idi ke ini oro ẹkenịmde. Afo afan̄a iwiwa. Enye asiama onyụn̄ ọdọhọ ete, “Afo ada mi nte ekpri eyenọwọn̄!” Mbemiso ọbọrọde enye ete, “Ih, afo anam n̄kpọ ntre nan̄a,” kere ban̄a se itienede emi: Mme uyen ẹsiben̄e ediwak n̄kpọ edi mme ete ye eka isinyịmeke kpukpru. Okûkam edi afo emesinyịme kpukpru eben̄e mmọ? Ọfọn ndikere mban̄a ntak emi eyen fo eben̄ede n̄kpọ oro.

NAM EMI ISE: Wet idaha kiet m̀mê iba oro ekemede ndinyịme eben̄e eyen fo. Dọhọ enye ke inyịme emi ndida ndomo enye nse. Edieke enye anamde ọfọn emekeme ndinyịme mme n̄kpọ efen efen nnọ enye. Edi edieke enye mînamke ọfọn, emekeme nditre ndinọ enye se mbufo ẹma ẹkenyenyịme.—Matthew 25:21.

Colossae 3:21: “Mbufo mme ete, ẹkûfiomo nditọ mbufo, mbak esịt ediduọ mmọ.” Ndusụk ete ye eka ẹsima ndibiere kpukpru n̄kpọ nnọ eyen mmọ. Man ẹnam ntre, mmọ isiyakke eyen mmọ ọwọrọ an̄wa. Ẹsimek mme nsan̄a ẹnọ enye ẹnyụn̄ ẹdịbe ẹyom ndikop se enye etịn̄de ye owo ke urụk ukopikọ. Edi n̄kpọ emi ekeme ndida mfịna ndi. Ndisịn enye ke ufọk kpukpru ini ekeme ndinam enye oyom ndifehe n̄wọrọ ke ufọk; ndisitịn̄ kpukpru ini ke mme ufan esie ifọnke anam enye etetịm ama mme ufan oro; ndisidịbe nnyom ndikop se enye etịn̄de idiyakke enye etịn̄ ikọ ke ini afo odude. Edieke oyomde nditie ukara ukara, enye idimaha ndikop se afo etịn̄de. Ntem, edieke eyen fo mîkpepke ndibiere n̄kpọ ke idemesie ke ini enye odụn̄de ye afo, enye edisan̄a didie ekeme ndinam emi ke ini enye ọkpọn̄de ufọk?

NAM EMI ISE: Ama afiak eneme nneme ye eyen fo aban̄a se enye oyomde, domo ndikọk ibuot ye eyen fo man enye okụt nte ubiere oro enye anamde ọfọnde m̀mê ọdiọkde. Ke uwụtn̄kpọ, utu ke ndidọhọ enye ke mme ufan esie ifọnke, dọhọ enye ete: “Nso ikpetịbe edieke ẹkpemụmde [siak enyịn̄ ufan esie] ke ntak emi abiatde ibet? Mme owo ẹkpeda fi didie?” N̄wam eyen fo okụt ke ubiere oro enye anamde ekeme ndinam enye ọdọdiọn̄ ọwọrọ eti etop m̀mê abiat enyịn̄ esie.—Mme N̄ke 11:17, 22; 20:11.

Ephesus 6:4: “Ẹkûfiomo nditọ mbufo, edi ẹka iso ẹkama mmọ ke ntụnọ ye ke usụn̄ ukere n̄kpọ Jehovah.” Ikọ oro “usụn̄ ukere n̄kpọ”  iwọrọke n̄kukụre nditetịn̄ se anade ẹnam. Edi ọwọrọ ndida mbukpek nnam eyen fo ọfiọk se ifọnde ye se idiọkde man an̄wam enye odu eti uwem. Emi enen̄ede ọfọn, akpan akpan ke ini eyen fo edide uyen. Ete kiet oro ekerede Andre ọdọhọ ete: “Nte eyen fo ọkọride, oyom okpụhọde nte esitịn̄de ikọ ye enye onyụn̄ ọkọk ibuot ye enye utu ke nditeteme enye se anade enye anam.”—2 Timothy 3:14.

NAM EMI ISE: Ke ini mfịna edemerede, dọhọ eyen fo etịn̄ se enye akpanamde. Dọhọ enye etịn̄ item oro enye ọkpọnọde fi edieke afo ekpedide eyen esie. Dọhọ enye akanam ndụn̄ọde onyụn̄ ọnọ ntak oro mme ekikere esie ẹnende m̀mê ntak emi mmọ mînenke. Fiak nneme mfịna emi mbemiso urua oro okụre.

Galatia 6:7: “Se ededi eke owo ọtọde, oro ke enye edinyụn̄ ọdọk.” Ẹkeme ndikpep eyenọwọn̄ n̄kpọ ebe ke ndinọ enye ufen—utọ nte ndidọhọ enye ọnyọn̄ ubet esie m̀mê nditre ndiyak enye anam n̄kpọ oro enye enen̄erede ama ndinam. Edi ama edi uyen, afo enyene ndidọhọ enye se ididide utịp n̄kpọ oro enye anamde.—Mme N̄ke 6:27.

NAM EMI ISE: Kûkpe isọn esie, kûnyụn̄ uka ukukpe andikpep esie ubọk ke ntak emi enye mîkebehe udomo. Yak enye ọbọ utịp n̄kpọ oro enye akanamde, ndien enye eyekpep n̄kpọ oro edinamde ufọn ọnọ enye ke ini iso.

Edieke edide ete m̀mê eka, anaedi esidọn̄ fi ndikụt nte eyen fo ebede ini uyen inikiet inikiet odụk akwa owo inyeneke mfịna. Nte ededi, isiwakke ndidi ntre. Edi ini uyen ọnọ fi eti ifet ‘nditeme eyenọwọn̄ nte ekemde ye usụn̄ esie.’ (Mme N̄ke 22:6) Mme edumbet Bible ẹkeme ndinam ubon fo enem.

[Ikọ Idakisọn̄]

BỤP IDEMFO ETE . . .

Ke ini eyen mi ọkpọn̄de ufọk, nte enye eyekeme ndinam mme n̄kpọ oro ẹtienede mi?

▪ ndikpep Ikọ Abasi kpukpru ini

▪ ndinam eti ubiere

▪ ndineme nneme ye mme owo nte ọfọnde

▪ ndise mban̄a idem esie ke ini udọn̄ọ

▪ ndida okụk esie nnam n̄kpọ ọniọn̄ ọniọn̄

▪ ndikama ufọk esiemmọ

▪ ndibiere ndinam n̄kpọ ke idemesie

[Ndise ke page 12]

Edieke eyen fo anamde n̄kpọ nte uyen emi ọdiọn̄ọde idem, nte emekeme ndidọhọ enye ese aban̄a mme n̄kpọ efen efen?