N̄kpọuto Emi Ẹdude ke N̄kponn̄kan N̄kpọdiọhọ Mmọn̄ Ufọt Ufọt America

OKPOSỤKEDI emi Nicaragua edide ekpri idụt, n̄kponn̄kan n̄kpọdiọhọ mmọn̄ Ufọt Ufọt America odu do—oro edi, N̄kpọdiọhọ Mmọn̄ Nicaragua. Etie nte N̄kpọdiọhọ Mmọn̄ Nicaragua emi edi n̄kukụre n̄kpọdiọhọ mmọn̄ oro mîdịghe unụn̄, emi orụk iyak inyan̄ibom nte anịm ye akpat ẹdude. Ntaifiọk ẹkere ke mmọn̄ emi ekedi Itụn̄ Inyan̄ibom Pacific, edi ke obot nsụn̄ikan̄ oro okotopde obomo ekesịri usụn̄ oro enye ekesiwetde okodụk inyan̄ibom oro. Ke ini unụn̄ mîkodụhe aba ke mmọn̄ emi, mme iyak oro ẹdude do ẹma ẹkpep nte ẹdude uwem do.

N̄kpọdiọhọ mmọn̄ emi ọniọn̄ kilomita 160, edi kilomita 70 ke ebiet emi an̄wan̄ade akan, ndien okon̄ akan inyan̄ ke mita 30. Se ibede isuo 400 ẹdu ke N̄kpọdiọhọ Mmọn̄ Nicaragua, ndien n̄kpọ nte isuo 300 ke otu emi ẹdu ẹkanade Ekpri Isuo Asese, emi ekperede obio Granada ke edere edere n̄kpọdiọhọ mmọn̄ emi. Ẹkot mmọ N̄kpri Isuo Granada.

N̄kponn̄kan isuo ke n̄kpọdiọhọ mmọn̄ emi edi Ometepe, emi odude ke ufọt ufọt N̄kpọdiọhọ Mmọn̄ Nicaragua. Enye ọniọn̄ kilomita 25 onyụn̄ an̄wan̄a kilomita 13, obot nsụn̄ikan̄ iba ẹnyụn̄ ẹdu do, ndien ekpri anyan anyan isọn̄ eyịri obot mbiba emi. Ẹkot obot enye emi okon̄de akan Concepción, ndien enye okon̄ mita 1,610 akan n̄kpọdiọhọ mmọn̄ oro. Enye esitop osion̄o nsụn̄ikan̄; enye onyụn̄ okpon akan ke edem edere isuo oro. Ẹkot obot nsụn̄ikan̄ enye eken, Madera, ndien enye okon̄ mita 1,394, isinyụn̄ itopke ibomo. Obot emi edi akai onyụn̄ enyene obube ikan̄ emi ntụhube ofụkde.

N̄kpọdiọhọ Mmọn̄ Nicaragua edi kiet ke otu ebiet emi mme owo ẹsikade ẹkese ke n̄kan̄ emi. Mmọ ẹsidi ẹdise ediye ebiet emi ye akpakịp n̄kpoduoho eset oro mme ọdọkisọn̄ nyom n̄kpọ eset ẹdọkde ẹsion̄o. Edi odu n̄kpọuto en̄wen ke N̄kpọdiọhọ Mmọn̄ Nicaragua emi oyomde ifiọk n̄ko.

Obio Emi Ọfiọrọde ke Mmọn̄

Mme eto ye unam ẹyọyọhọ N̄kpri Isuo Granada. Ata ndiye flawa ẹyọyọhọ ikpọ akai emi ẹdude ke ekese isuo obot nsụn̄ikan̄ emi. Utọ ndiye inuen inyan̄ nte ekịmbe, usari ifuọenan̄, ituen, ikpan̄inyan̄, ye enenịm inyan̄ ẹdụn̄ọ ke mben n̄kpọdiọhọ mmọn̄ emi. Ke mben akai, ofụm n̄kpọdiọhọ mmọn̄ emi esinyen̄e efọk emi ikpọ inuen ẹbọpde ke  enyọn̄ ikpọ eto nte n̄kpọ eke ẹdọhọde ke ẹmọn̄ ẹkịbe ẹduọn̄ọ.

Mme owo ẹdụn̄ọ ke ndusụk n̄kpri isuo emi. Mme ọkọiyak ẹdụn̄ọ mi, mme imọ owo ẹsinyụn̄ ẹdi nduọkodudu mi. Ufọkn̄wed ye udi ẹdu n̄ko ke mme isuo emi, ọkọrọ ye mme itie unyamudia ye mme itie un̄wọn̄ mmịn. Otu isuo emi ẹbiet obio emi ọfiọrọde ke mmọn̄.

Kpukpru usenubọk, ubom emi edide afia ye blu esisan̄a atan̄ nditọwọn̄ ke mme isuo emi aka ufọkn̄wed. Mme owo ẹsisan̄a ke ubom ẹnyam mfri ye ikọn̄ udia ke n̄kpri isuo emi. Irenowo ẹsiduọn̄ọ iyịre iban ẹnyụn̄ ẹyet ọfọn̄ ke n̄kpọdiọhọ mmọn̄ emi kpukpru usen.

Mme Ntiense Jehovah n̄ko ke ẹsịn ifịk ẹnam utom ke mme isuo emi. Mmọ ẹsisan̄a ke ubom ẹkekwọrọ eti mbụk Obio Ubọn̄ Abasi ẹnọ mbon isuo emi. (Matthew 24:14) Nte mme isuo emi ẹtiede ada mfịna kiet edi; oro edi: Ẹkeme ndisop idem ke m̀mọ̀n̄ n̄kpep Ikọ Abasi, kpa Bible? Man ẹnam item Bible oro ọdọhọde ‘ẹkûsịn ndisop idem ọtọkiet,’ Mme Ntiense do ẹma ẹtịbi ifiọk ẹdi—oro edi, ẹma ẹbọp akpa Ufọkmbono Obio Ubọn̄ ke Nicaragua oro ọfiọrọde ke mmọn̄!—Mme Hebrew 10:25.

Ufọkmbono Obio Ubọn̄ Oro Ọfiọrọde ke Mmọn̄

Ebe ye n̄wan oro ẹdide Mme Ntiense Jehovah, emi akpan ubọkọkọ mmọ edide ndikwọrọ ikọ, ẹma ẹwọrọ ẹka N̄kpri Isuo Granada ke November, 2005. Ke ọfiọn̄ ifan̄ ẹbede, ke ini mmọ ẹkekotde mbon edem oro ẹtiene ẹdidụk Editi n̄kpa Christ eke isua oro, mmọ ẹma ẹkop idatesịt ye n̄kpaidem ndikụt owo 76 ẹdụkde! Emi ama anam mmọ ẹnen̄ede ẹfiọk ke oyom ẹtọn̄ọ ẹnịm mme mbono esop Christian do kpukpru ini. Ebe ye n̄wan emi ẹma ẹsio ekikere en̄wen ẹdi sia mmọ mîkekemeke ndikụt ebiet oro odotde ndida nnịm mme mbono esop. Mmọ ẹma ẹbiere ndibọp Ufọkmbono Obio Ubọn̄ oro ọfiọrọde ke mmọn̄, emi ẹkemede ndidụri n̄ka nsio nsio isuo man efere mme owo do ndidụk.

Ebe ye n̄wan emi ẹma ẹtọn̄ọ utom, kpa ye oro akanam mmọ mîkọn̄ke ubom ekededi. Mmọ ye owo itiokiet en̄wen ẹma ẹnam utom emi akadade mmọ ọfiọn̄ kiet. Mmọ ẹkeda obukpọk ẹkọn̄ obufa ufọkmbono emi mîwakke n̄kukọhọ. Ẹkenyene ndisobo mme  ukwak emi ẹdimụmde aban̄ ofụm 12 oro ẹdinamde ufọk oro ọfiọrọ. Ẹkenyene ndida obukpọk nsịn isọn̄, ẹnyụn̄ ẹfụk ọfọn̄itai ke ọkọm. Mmọ ẹma ẹsibọn̄ akam kpukpru usen ẹban̄a n̄kpọ emi sia mmọ mîkọfiọkke m̀mê ufọk oro ọyọfiọrọ. Edi ufọk oro ama ọfiọrọ!

Ẹkenịm akpa An̄wan̄wa Mbono Esop ke obufa Ufọkmbono Obio Ubọn̄ emi ke June 10, 2006. Ke ndan̄nsiere, ẹma ẹdụri enye ẹka edem isuo eken man ẹkenịm ukem mbono esop oro ẹnọ mbon oro ẹdụn̄de do. Owo 48 ẹkedụk mbono esop mbiba emi, kpa ye oro ndusụk owo ẹkesan̄ade se ibede minit 30 ke akai man ẹkedụk. Kpukpru mmọ ẹma ẹnen̄ede ẹkop inemesịt ndinyene ebiet utuakibuot mmọ.

Ndisidụk mme mbono esop ke Ufọkmbono Obio Ubọn̄ emi ikpụhọkede ye nte n̄kpọ esitiede mi. Ke ini ẹnọde utịn̄ikọ, mme andidụk ẹsikop sụn̄sụn̄ uyom awawa mmọn̄ oro amiade itiat, m̀mê uyom oro ebọk esidade nsannsan anam ke ini ke ini. Mme andidụn̄ isuo emi ẹma ẹsọsọp ẹmehe ye ufọkmbono emi. Mmọ ẹsifụn̄ ubọk ke ini mmọ ẹkụtde nte ẹdụride enye ke ebiet kiet ẹka en̄wen. Se ibede owo 20 ẹsidụk mbono esop Christian ẹnyụn̄ ẹkpep Bible kpukpru urua ke Ufọkmbono Obio Ubọn̄ emi ọfiọrọde ke mmọn̄ mi. Nso n̄kpọuto ke emi edi ntem!

Ke Isuo Ometepe

Isuo Ometepe odu n̄kpọ nte kilomita 50 ke usụk usụk Granada. Nte isuo emi eyede ye nte isọn̄ esie ọfọnde n̄kpọ anam mme owo ẹma ndidụn̄ mi toto ko. Ke nditịm ntịn̄, mi ke ẹketọn̄ọ utọin̄wan̄ ke Nicaragua. Mfịn, n̄kpọ nte owo 42,000 ẹdụn̄ ke Ometepe, mmọ ẹsikọ iyak, ẹtọ ibokpot, mboro, kọfi, ye mme n̄kpọ eken. Ndiye unam ikọt ẹdu mi n̄ko. Ediwak inịm emi ẹsinamde uyom, ndiye ikpọ inuen emi ẹkotde magpie-jay, emi ẹsiwụtde blublu ye mfia ntan̄ mmọ nte ẹfede usọp usọp ke enyọn̄ eto ẹdu mi, ọkọrọ ye ebọk emi ẹnyenede mfia iso, emi ediwak owo ẹmade.

Mme anditan̄a eti mbụk Obio Ubọn̄ Abasi ẹmenen̄ede ẹkwọrọ ikọ ẹnọ mme andidụn̄ Ometepe. Owo 8 oro ẹkenade baptism ke 1966 ẹma ẹkọri ẹkabade Ntiense 183, emi ẹdude ke esop inan̄ ke Ometepe. Kpukpru esop ẹnyene Ufọkmbono Obio Ubọn̄ oro ẹbọpde ke ebiet oro odotde. Mfịn, Ntiense kiet kiet enyene ndikwọrọ ikọ nnọ owo 230 ke isuo emi, ke ẹbaharede ukem ukem.

Mme Ntiense Jehovah ke Ometepe ẹmesobo mfịna ke ediwak isua emi ẹbede. Ke uwụtn̄kpọ, mme andibiọn̄ọ ẹma ẹfọp Ufọkmbono Obio Ubọn̄ ke Merida ke 1980. Ẹma ẹbọp ufọkmbono en̄wen ke 1984. Ẹkesinịm mme mbono esop do tutu ke 2003, ke ini ẹkebọpde ediye obufa Ufọkmbono Obio Ubọn̄, emi ama enen̄ede adat owo 60 oro ẹdude ke esop oro esịt.

Ẹma ẹbọp Ufọkmbono Obio Ubọn̄ oro ekemede ndidụk ata ediwak owo ke Moyogalpa. Ẹma ẹsio ọkọm edemesa ufọkmbono emi, ẹnyụn̄ ẹbọp mbot utịn̄ikọ ke idak. Ẹtuak efe ẹnyụn̄ ẹbon n̄kpọitie ke iso mbot utịn̄ikọ oro tutu ke edem isọn̄ ufọkmbono oro. Mi ke Mme Ntiense ye mme ufan mmọ ke n̄kann̄kụk isuo oro ẹsisop idem ke ini ke ini ẹdụk ikpọ mboho. Ke mme mboho emi, ẹsinịm mbufa mbet Jesus Christ baptism ke N̄kpọdiọhọ Mmọn̄ Nicaragua.—Matthew 28:19.

Ndi Ẹyetịm N̄kpọuto Emi Ẹkama?

Esitie kpukpru ini nte ke owo ikpekemeke ndibiat N̄kpọdiọhọ Mmọn̄ Nicaragua, eyedi ke ntak emi enye enen̄erede okpon. Edi oyom ẹkpekpeme enye mfịn. Ndek oro ẹtode utọin̄wan̄, usiakifia, ye akai oro ẹwotde ẹsabade mmọn̄ esie.

Owo ifiọkke kan̄a m̀mê mbio obio oro ye ukara ẹyekeme nditre mfịna emi. Idem edieke mmọ mîkemeke, Andibot oyokụt ete ke ẹkpeme kpukpru n̄kpọuto isọn̄, emi esịnede ata edisana n̄kpọdiọhọ mmọn̄ esie, ndiye isuo, ye ata ndiye unam ikọt, ẹnọ okopitem ubonowo. Bible asian nnyịn ete: “Nti owo ẹyeda isọn̄ ẹnyene, ẹnyụn̄ ẹdụn̄ ke esịt ke nsinsi.”—Psalm 37:29.

[Ndise ke page 26]

Ufọkmbono Obio Ubọn̄ oro ọfiọrọde ke mmọn̄, oro ẹsidade ẹnịm mbono esop oro ẹkpepde Bible