Ndi Owo Ndidi Ubuene Ọwọrọ ke Abasi Imaha Enye?

ABASI ọkọdọhọ Israel eset ete: “Owo ubuene okûdu ke otu fo.” Emi edi koro Ibet oro enye ọkọnọde mmọ ama esịne ewụhọ emi ọkọdọhọde ẹse ẹban̄a mme ubuene ẹnyụn̄ ẹyak ebuọt atak. (Deuteronomy 15:1-4, 7-10) Mmọdo, ikpakanaha mme ubuene ẹdu ke Israel koro Jehovah ama ọn̄wọn̄ọ ke iyọdiọn̄ mmọ. Edi akana nditọ Israel ẹnịm Ibet man ẹdiọn̄ mmọ; edi mmọ ikenịmke.

Edi emi iwọrọke ke Abasi ikamaha mbon oro ẹkedide ubuene, inyụn̄ iwọrọke ke Abasi akanam mbon oro ẹkenyenede n̄kpọ ẹforo. Ediwak ke otu mme anam-akpanikọ asan̄autom Abasi ẹkedi ubuene. Prọfet Amos ekedi ubuene ekpemerọn̄ onyụn̄ esinam utom emi ẹkpede-kpe ke ini ke ini. (Amos 1:1; 7:14) Ke ini akan̄ okodude ke Israel ke eyo prọfet Elijah, enye ekesidia udia ubuene ebeakpa, emi ẹkenamde esisịt ndomuyo ye aran esie ẹtọt ke utịbe utịbe usụn̄ ke ini akan̄ oro. Jehovah ọkọnọ Elijah ye ubuene ebeakpa oro se ikananade mmọ, edi ikanamke mmọ ẹforo.—1 Ndidem 17:8-16.

N̄kpọntịbe unana idotenyịn ekeme ndinam owo ebuene. Mbabuat unọmọ ye udọn̄ọ ẹkeme nditre owo utom ke ibio ini m̀mê ofụri ofụri. Ndien n̄kpa ekeme ndinam nditọ ẹtaba ete ye eka onyụn̄ anam n̄wan ataba ebe. Idem mme utọ idiọk idaha oro iwọrọke ke Abasi imaha owo. Mbụk oro aban̄ade Naomi ye Ruth owụt ke Jehovah esikere aban̄a onyụn̄ ama mme ubuene. Okposụkedi emi n̄kpa ebe Naomi ye Ruth akanamde mmọ ẹdi ọkpọikpọi ubuene, Jehovah Abasi ama ọdiọn̄ onyụn̄ anam ẹnọ mmọ se ikananade mmọ.—Ruth 1:1-6; 2:2-12; 4:13-17.

Ana in̄wan̄-in̄wan̄ ke owo ndidi ubuene iwọrọke ke Abasi imaha enye. Mbon oro ẹsọn̄ọde ẹda ye Jehovah Abasi ẹkeme ndinyene mbuọtidem ke ikọ Edidem David emi: “N̄kedi eyenọwọn̄, ndien ndi ebiowo n̄ko; [akanam] n̄kwe nte ẹkpọn̄de eti owo, nte ubon esie ẹnyụn̄ ẹsan̄ade inọk.”—Psalm 37:25.

[Ndise ke page 8]

Abasi ama ọdiọn̄, ama, onyụn̄ ese aban̄a Naomi ye Ruth okposụkedi emi mmọ ẹkedide ọkpọikpọi ubuene