Ọyọhọ Otu 126 Ẹkụre Ukpep ke Gilead

Nte Ẹkemede Ndidi Isụn̄utom Oro Enyenede Uforo

OTUOWO oro ẹkopde nduaidem ẹma ẹsop idem ọtọkiet man ẹdụk akpan edinam ke Itie Unọ Ukpep Enyọn̄-Ukpeme ke Patterson ke New York. Saturday, March 14, 2009, ekedi usen edinam ukụre ukpep ọyọhọ otu 126 eke Ufọkn̄wed Enyọn̄-Ukpeme Ukpep Bible Eke Gilead. Ẹkeyom ndinọ mme andikụre ukpep do ẹka idụt 22 ẹkekwọrọ eti mbụk Obio Ubọn̄ Abasi.—Matthew 24:14.

Ndondo oro ke nditọ ufọkn̄wed oro ẹkekụre ifịk ifịk ukpep Bible ọfiọn̄ ition oro edinamde mmọ ẹdi mme isụn̄utom Christian oro ẹnyenede uforo. Edinam ukụre ukpep ama ọnọ mmọ akpatre ifet ndisop idem nte otu man ẹbọ nti item oro ẹdin̄wamde mmọ ẹnyene uforo.

Anthony Morris, emi edide owo Otu Ukara Mme Ntiense Jehovah, emi okonyụn̄ edide etieibuot okpokoro edinam oro, ama eti otuowo ke ẹketọn̄ọ ndinọ mme isụn̄utom ukpep ke Gilead ke 1943. Toto ke ini oro, mme isụn̄utom ẹnyene ata akamba udeme ke utom ukwọrọikọ ofụri ererimbot ẹnyụn̄ ẹnyene nti utịp.

Etịn̄ikọ ama ọdọhọ ke okposụkedi emi mme ewetn̄wed ye mme Pharisee ẹkesede mme apostle Jesus ke usụhọde nte “mbon emi mîkekpepke n̄wed, ẹnyụn̄ ẹdide ndisịme ke ifiọk n̄wed,” ke mme andibiọn̄ọ emi ẹma ẹdifiọk ke mme apostle ẹkenyene uko ke ntak emi mmọ ẹkedude ye Jesus. (Utom 4:13, Edisana Ŋwed Abasi Ibom) Ukpep oro nditọ ufọkn̄wed oro ẹkebọde anam mmọ ẹnyene uko.

Robert Ciranko, emi esin̄wamde Kọmiti Uwetn̄wed Otu Ukara, ama eneme ibuotikọ emi, “Kûse Owo Iso.” Enye ama ọdọhọ ke idibịghike ke nditọ ufọkn̄wed emi ẹyesobo ye mme owo oro ẹtode ebiet en̄wen, emi ido edinam mmọ onyụn̄ edide isio isio. Edi edieke nditọ ufọkn̄wed emi ẹkpebede Jehovah, mmọ idinyeneke mfịna ndikwọrọ ikọ nnọ mmọ. Edieke ẹkabarede Utom 10:34 ke ata ata usụn̄, enye ọdọhọ ete, “Abasi isehe owo iso,” emi ọwọrọ ke Abasi iten̄eke owo enyịn. “Abasi inamke asari.” (Utom 10:35) Brọda Ciranko ọkọdọhọ ete, “Edieke mbufo ẹkpebede Abasi ẹnyụn̄ ẹsede kpukpru owo oro mbufo ẹdisobode ke efakutom mbufo nte mbon oro Abasi edikotde ida, mbufo ẹyenyene uforo nte mme isụn̄utom Esie.”

“Ẹmenyene Se Idinamde Mbufo Ẹnyene Uforo”

Samuel Herd, emi edide owo Otu Ukara, ọkọtọn̄ọ utịn̄ikọ esie ntem, “Ediwak owo ẹda camel nte ikọn̄wọ, edi enye enen̄ede ọfọn ke ini owo odude ke desat.” Kpasụk ntre, mbufa isụn̄utom emi ẹnyene se ẹyomde man ẹnyene uforo ke efakutom oro ẹnọde mmọ ẹka. N̄kpọ ition ẹdin̄wam mmọ.

1. Ima oro mmọ ẹmade Jehovah. (Matthew 22:37, 38) Nditọ ufọkn̄wed emi ẹma ẹwowụt ke mmimọ imebiere ndinam n̄kpọ Jehovah.

2. Ifiọk Abasi oro mmọ ẹma ẹkenyenyene. Camel esidọn̄ udia ke ikpọn̄ ekụn̄ esie. Edi oro idinamke enye etre ndidia udia, nnyụn̄ nda udia oro enye enịmde ọnọ usen nnanenyịn do ndu uwem. Kpasụk ntre n̄ko, mme isụn̄utom ikpoyụhọke ye se mmọ ẹkekpepde ke Ufọkn̄wed Gilead kpọt, edi ẹkpenyene ndika iso nda Ikọ Abasi mbọk idemmọ.

3. Ima oro mmọ ẹmade mme owo. (Matthew 22:39) Nditọ ufọkn̄wed emi ẹtua mme owo mbọm.

4. Edu unyịmesịt. (Psalm 110:3) Idem ama emem isụn̄utom, Jehovah ayanam ukeme esie awak.—Isaiah 40:29.

5. Odudu ini uyen. Kpa nte camel esimende owo ebe desat, ekeme ndiyom isụn̄utom  “emen” ekemmọ Christian emi enyenede mfịna ke utom Jehovah. Emi oyom ẹnen̄ede ẹkop odudu, edi mme isụn̄utom emi ẹnyene odudu ini uyen.

Mme N̄kpọ En̄wen Oro Ẹkenamde

Michael Burnett, emi edide andikpep ke Gilead, ọkọdọhọ ke almond ama esịne ke otu nti mfri oro Jacob ọkọnọde ẹsọk andikara Egypt. (Genesis 43:11) Ekpri etuek almond esinọ owo ekese n̄kpọ ke idem. Nditọ ufọkn̄wed ẹma ẹdia ekese ndamban̄a almond ke ini ufọkn̄wed emi. Ndusụk ke otu n̄kpọ oro mmọ ẹdidade ika isan̄ ẹdi ufọn ediyụhọ ye se Jehovah ọnọde ye ndikpep ndima obufa ebietidụn̄ mmọ.

Mark Noumair, emi edide n̄ko andikpep ke Gilead, ọkọdọhọ ke Ikọ Abasi etie nte “ọyọhọ ekpat ọniọn̄.” (Job 28:18, NW) Ana itat ekpat emi isio se isịnede do ida inam n̄kpọ. Edieke utom isụn̄utom mîtiehe nte nditọ ufọkn̄wed emi ẹkekerede, ekeme ndiyom mmọ ẹti apostle Paul. Mme mbet Jesus ẹma ẹnọ enye akanam utom ke obio emana esie ke isua usụkkiet. Paul ikekereke ke sia idide ‘owo eke ẹmekde’ ke ikpakanam utom ke ebiet en̄wen, utu ke oro, enye ama esịn ifịk anam utom ke ebiet ekededi oro enye okodude. (Utom 9:15, 28-30) Ekeme ndisọn̄ ndinyịme se Jehovah emekde. Owo en̄wen oro ekenyịmede se Jehovah ekemekde edi Jonathan. Sia Jonathan ọkọfiọkde ke Jehovah ekemek David nte edidem, enye ama ebere ye enye.

Ke ini ẹkenọde utịn̄ikọ oro ibuotikọ ekedide, “Ikọt Abasi Ẹtịn̄ Ikọ ye Uko,” nditọ ufọkn̄wed ẹma ẹnam mme ifiọkutom an̄wautom oro mmọ ẹkenyenede ke ini ufọkn̄wed ẹwụt. Ediwak mmọ ẹma ẹtọn̄ọ ndikpep mme owo Bible. Ẹma ẹnam ndụn̄ọde ye isụn̄utom ita oro ẹnamde utom ẹbịghi ke utịn̄ikọ oro, “Esop Jehovah Etịm Nnyịn Idem.” Owo mmọ kiet kiet ama etịn̄ ukpep oro imọ ikọbọde man idiana kiet ye esop Abasi.

“Di Isụn̄utom Emi Okopde Inemesịt”

Ekem, Gerrit Losch, emi edide owo Otu Ukara n̄ko, ama ọnọ akpan utịn̄ikọ emi ibuotikọ ekedide, “Di Isụn̄utom Emi Okopde Inemesịt.” Enye ọkọdọhọ ke ediwak n̄kpọ oro mme owo ẹdade nte “mbre” isinamke ẹkop ata inemesịt. (Mme N̄ke 14:13; Ecclesiastes 2:10, 11) Isimemke utom ndinam uduak Abasi kpukpru ini, edi ndinam ntre anam owo enyene inemesịt oro ebịghide. Ukpep ke Gilead ikedịghe ifia ubọk kiet, edi emi ama anam mmọ ẹnen̄ede ẹkop inemesịt.

Ediwak n̄kpọ ẹnam ata mme Christian ẹkop inemesịt. Mmọ ẹtuak ibuot ẹnọ Abasi inemesịt. (Psalm 33:12; 1 Timothy 1:11) Mmọ ẹdu ke idaha oro ebietde paradise, ndien Bible ọn̄wọn̄ọ ke ibịghike ke isọn̄ edidi ata Paradise. Mmọ ẹfiọk uduak uwem—emi edide ndinam n̄kpọ Jehovah nnyụn̄ ntoro enye. Akan oro, Jehovah ye Jesus ẹma mmọ.

Brọda Losch ọkọdọhọ ete, “Mbufo ẹdidi isụn̄utom oro ẹkopde inemesịt edieke ẹfiọkde ndiyụhọ ye se ẹnyenede.” N̄kpọ en̄wen oro ekemede ndinam mbufo ẹkop inemesịt edi edieke mbufo ẹmade mbon en̄wen, mmọ ẹnyụn̄ ẹma mbufo. Ntre, ẹfen ndudue mbon en̄wen utu ke ndineme mban̄a mmọ. Ẹnam nti n̄kpọ ẹnọ mbon en̄wen, ẹn̄wam mbon mmemidem, ẹneme nti ifiọkutom ye mbon en̄wen. (Psalm 41:1, 2; Utom 20:35) Ndisịn idem n̄kwọrọ ikọ esinam owo okop inemesịt.—Luke 11:28.

Brọda Losch akada utịn̄ikọ esie ekeberi ntem,  “Ẹwọrọ ẹka nte isụn̄utom oro ẹkopde inemesịt, emi ẹnyenede esisịt okụk edi ẹtịn̄de enyịn ke nditoro Abasi inemesịt nnyịn, kpa Jehovah, ye ke ndinam ediwak owo ẹtiene ẹkop inemesịt.”

Ke Brọda Anthony Morris ama okokot mme etop ekọm oro ẹtode ediwak idụt, enye ama ọnọ nditọ ufọkn̄wed oro n̄weditoro. Ekem, eyen ufọkn̄wed kiet oro akadade ke ibuot ọyọhọ otu 126 emi ama okot leta oro mmọ ẹkewetde ẹnọ Otu Ukara. Se mmọ ẹkewetde ke leta emi ama owụt ke mmọ ẹkop inemesịt ndidụk Ufọkn̄wed Gilead.

Etieibuot okpokoro ama ada ekeberi ke ndidọhọ ke “ikek ye esịp” emi ẹkpahade idem owo ẹdian ọtọkiet ẹbiet usụn̄ ye ndutịm oro “ofụn emi anamde akpanikọ onyụn̄ enyenede ọniọn̄” adade ọbọk onyụn̄ ọnọ ikọt Jehovah ndausụn̄. (Colossae 2:18, 19; Matthew 24:45) Edieke mme andikụre ukpep emi ke Gilead ẹberede ọyọhọ ọyọhọ ye mbon oro Abasi emekde ete ẹda ke ibuot imọ, mmọ ẹyenam utom ukwọrọikọ mmọ ẹma.—2 Timothy 4:5.

[Ekebe ke page 30]

IDAHA OTU

Ibat idụt oro ẹtode: 6

Ibat idụt oro ẹnọde ẹka: 22

Ibat nditọ ufọkn̄wed: 56

Ebe ye n̄wan: 28

Isua emana ke ẹbaharede ukem ukem: 32.8

Isua oro ẹdude ke akpanikọ ke ẹbaharede ukem ukem: 17.9

Isua oro ẹdude ke utom uyọhọ ini ke ẹbaharede ukem ukem: 13.5

EBIET ORO ẸNỌDE MMỌ ẸKA

Ẹkenọ mme andikụre ukpep emi ẹka Benin, Bolivia, Bulgaria, Burkina Faso, Cameroon, Costa Rica, Ghana, Guatemala, Honduras, Kenya, Liberia, Madagascar, Mozambique, Nicaragua, Panama, Paraguay, Peru, Romania, Sierra Leone, South Africa, Togo, ye Uganda.

[Ndise ke page 31]

Ọyọhọ Otu 126 Oro Ẹkụrede Ukpep ke Ufọkn̄wed Enyọn̄-Ukpeme Ukpep Bible Eke Gilead

Ẹtọn̄ọ ke udịm iso ẹnọ nọmba ẹka edem, ẹnyụn̄ ẹtọn̄ọ ke ufien ẹwet enyịn̄ ẹka nnasia ke udịm kiet kiet.

(1) Kirchhoff, K.; Nichols, C.; Guzmán, Y.; Coil, H.; Becker, O.; Simone, A. (2) Manzanares, A.; Bouvier, E.; Peddle, J.; Mason, H.; Braz, J. (3) Lee, J.; Forte, A.; Boucher, T.; Marsh, A.; Leighton, S.; Glover, M. (4) Kambach, H.; Jones, T.; Ferreira, A.; Morales, J.; Chicas, S.; Davis, B.; Dormanen, E. (5) Dormanen, B.; Nichols, J.; Pacho, T.; Titmas, L.; Bouvier, E.; Kirchhoff, A. (6) Leighton, G.; Pacho, A.; Van Campen, B.; Manzanares, A.; Rivard, A.; Lee, Y.; Titmas, L. (7) Boucher, M.; Coil, K.; Marsh, C.; Guzmán, J.; Jones, W.; Kambach, J. (8) Glover, A.; Ferreira, G.; Mason, E.; Forte, D.; Davis, N.; Chicas, O.; Rivard, Y. (9) Braz, D.; Van Campen, D.; Morales, A.; De Simone, M.; Becker, M.; Peddle, D.