Mbụme Oro Mme Andikot Ẹbụpde

Ndi Devil Edi Ata Owo?

Ih, Bible ekpep ke Satan kpa Devil enen̄ede edi ata owo. Edi mbon oro mînịmke Bible ke akpanikọ ẹsisak ke ini ẹdọhọde ke Devil edi ata owo. Mmọ ẹsidọhọ ke Satan edi idiọkn̄kpọ oro esịnede owo ke idem.

Ndi akpa nnyịn idem ndikop ke mme owo ifiọkke owo emi Satan edide? Baba-o! Da ke uwụtn̄kpọ: Abiatibet ekeme ndidịp mme n̄kpọ oro ẹkpedade ẹfiọk enye, onyụn̄ aka iso ọdọk ubi esie, owo ifiọkke. Kpasụk ntre, Satan edi abiatibet emi okopde inem ndidịbe nsịn nsọk nnọ mbiara ido uwem. Jesus ama etịn̄ in̄wan̄-in̄wan̄ ke Satan anam n̄kpọ etie ntem ye ubonowo. Jesus okokot Satan “andikara ererimbot emi.”—John 12:31.

Devil okoto m̀mọ̀n̄? Ẹkebot enye nte mfọnmma angel ke heaven, edi enye ama ọsọn̄ ibuot onyụn̄ anam idemesie Devil ke ini enye ekenen̄erede oyom mme owo ẹtuak ibuot ẹnọ imọ utu ke Abasi. Bible etịn̄ ke Devil ama ayarade udọn̄ esie ke ini enye ekenyenede nneme ye Jesus mi ke isọn̄. Satan ama odomo ndinam Jesus ‘ọduọ ke isọn̄ atuak ibuot’ ọnọ imọ.—Matthew 4:8, 9.

Kpasụk ntre, n̄wed Job ọdọhọ ke Satan ama ayarade se idude enye ke esịt ke ini enye ekenyenede nneme ye Abasi. Enye ke esịn ofụri ukeme man anam mme owo ẹkan̄ Abasi.—Job 1:13-19; 2:7, 8.

Kere ise: Satan akpakasan̄a didie enyene nneme ye Jehovah Abasi ye Jesus Christ edieke enye ekpedide idiọkn̄kpọ oro esịnede owo ke idem? Baba idiọkn̄kpọ kiet isịneke Abasi ye Eyen esie ke idem! Ntem, Satan edi ata owo—kpa owo eke spirit oro mîten̄eke Jehovah m̀mê Jesus.

Nte mme owo ẹdiọkde enen̄ede anam ifiọk ke Devil mmọdo. Mme idụt ererimbot emi ẹyak akpakịp udia ẹtak ke ini nditọ mmọ ẹkpade biọn̄. Mme idụt ke ẹbon mme okopodudu n̄kpọekọn̄ emi ẹkemede ndida nsobo kiet eken. Mmọ ẹsabade isọn̄. Edi ata ediwak owo ifiọkke enye emi anamde mme owo ẹdọk utọ ubi emi. Ntak-a?

Bible ọdọhọ ke Satan ‘esịri enyịn ikike mbon oro mînịmke ke akpanikọ.’ (2 Corinth 4:4) Satan ada esop esie oro enyịn mîkwe abian̄a ubonowo. Enye edi “andikara mme demon.” (Matthew 12:24) Ukem nte etubom n̄ka mme abiatibet ekemede ndidịp n̄kem mbak kpukpru mbon n̄ka esie ẹdifiọk enye, Satan ada ubi ubi esop esie emi ndiọi angel ẹnamde akara ediwak owo; ndien mmọ ifiọkke ke enye enyene ubọk ke se mmimọ inamde.

Nnyịn iwụt esịtekọm didie ntem ke emi Bible ayararede Devil ye esop esie! Emi anam ikeme ndibiọn̄ọ Devil. Bible eteme nnyịn ete: “Ẹsụk idem . . . ẹnọ Abasi; edi ẹbiọn̄ọ Devil, ndien enye eyefehe ọkpọn̄ mbufo.”—James 4:7.