Mbụme Oro Mme Andikot Ẹbụpde

Ndi Mme Ọfiọkn̄kpọ Owo Ita Ẹma Ẹnen̄ede Ẹka Ẹkese Jesus ke Ini Enye Ekedide Nsek?

Mbụk Christmas oro ẹsibụkde ke ofụri ererimbot esiban̄a ndidem m̀mê mme ọfiọkn̄kpọ owo ita emi ẹdade ọsọn̄urua enọ ẹsọk Jesus ke ini ekedide nsek. Ndi mbụk emi edi akpanikọ? Ndi se ẹtịn̄de ama enen̄ede etịbe? Ẹyak ise.

Gospel Matthew ye Luke ẹbụk emana Jesus. Mme Gospel emi ẹwụt ke mme usụhọde ekpemerọn̄ kpọt, emi ẹkedude ẹkpere, ẹkeka ẹkese Jesus ke ini enye akamanade. Mme inua-okot ndidem m̀mê mme ọfiọkn̄kpọ owo oro ẹkedi mme asiak ntantaọfiọn̄, ikedịghe ndidem; Bible inyụn̄ isiakke ibat mmọ. Mme asiak ntantaọfiọn̄ oro ikakaha ikese Jesus ke usịnudia ufene, edi ẹkeka ẹkese enye ke ini enye mîkedịghe aba nsekeyen onyụn̄ odụn̄ ke ufọk. Mmọ ndika n̄kese Jesus ama akam anam ẹyom ndiwot enye!

Nen̄ede se mbụk emana Jesus, emi Luke ewetde, ndien oyokụt ke enye ọdọhọ ete: “Mme ekpemerọn̄ . . . [ẹketie] ke an̄wa ẹkpeme otuerọn̄ mmọ ke okoneyo. Ndien kpa idaha oro angel Jehovah edida ekpere mmọ, . . . ọdọhọ mmọ ete: ‘. . . Mbufo ẹyekụt nsekeyen emi ẹwan̄de ke ubak ọfọn̄ nte anade ke usịnudia ufene.’ . . . Ndien mmọ ẹwara ẹka ẹnyụn̄ ẹkekụt Mary ọkọrọ ye Joseph, ye nsekeyen nte anade ke usịnudia ufene.”—Luke 2:8-16.

Joseph, Mary, ye mme ekpemerọn̄ oro kpọt ẹkedu ke ini Jesus akamanade. Mbụk Luke isiakke owo en̄wen idian do.

Idahaemi, kot mbụk oro odude ke Matthew 2:1-11, nte Bible King James esịnde: “Ekem ke ini Jesus amanade ke Bethlehem obio Judea ke eyo Edidem Herod, sese, mme ọfiọkn̄kpọ owo ẹto ke edem usiahautịn ẹdi Jerusalem . . . Ndien ke ini mmọ ẹdide ẹdisịm ufọk oro, mmọ ẹkụt ekpri eyen oro ye Mary eka esie.”

N̄kọ omokụt ke mbụk oro ọdọhọ “mme ọfiọkn̄kpọ owo,” idọhọke “mme ọfiọkn̄kpọ owo ita,” ye nte ke mmọ ẹkebem iso ẹka Jerusalem, ikaha Bethlehem emi Jesus akamanade. Ke ini mmọ ẹkedide ẹdisịm Bethlehem, Jesus ekedi “ekpri eyen”—ikedịghe aba nsekeyen—enye ikonyụn̄ isịneke ke usịnudia ufene, edi okodu ke ufọk.

N̄ko-n̄ko, ke adan̄aemi Bible King James okotde isenowo emi “mme ọfiọkn̄kpọ owo,” mme edikabade Bible en̄wen ẹkot mmọ “mme asiak ntantaọfiọn̄.” N̄wed oro A Handbook on the Gospel of Matthew ọdọhọ ke ikọ oro “mme ọfiọkn̄kpọ owo” akabarede “ikọ Greek emi ke ata akpa ẹkekotde mme oku Persia emi ẹkedide nta mme asiak ntantaọfiọn̄.” Ndien The Expanded Vine’s Expository Dictionary of New Testament Words ọdọhọ ke ikọ oro ọwọrọ “ifọt, abiaidiọn̄, owo mfọni, ata asaksak ifọt.”

Okposụkedi emi ifọt ye edisiak ntantaọfiọn̄ osụk edide ọsọ n̄kpọ mfịn, Bible akpan mme n̄kpọ emi. (Isaiah 47:13-15) Mme edinam emi ẹdi ubụpekpo, ndien Jehovah Abasi enen̄ede asua mmọ. (Deuteronomy 18:10-12) Ntak edi oro angel Abasi mîkasianke mme asiak ntantaọfiọn̄ oro ke Jesus amana. Edi Abasi ama asian mmọ ke ndap ete ẹkûfiak ẹka ọtọ idiọk Edidem Herod, sia enye okoyomde ndiwot Jesus. Ntre, “mmọ ẹsan̄a usụn̄ efen ẹnyọn̄ọ idụt mmọ.”—Matthew 2:11-16.

Ndi ọkpọfọn ata mme Christian ẹtiene ẹsuan nsunsu mbụk emana Jesus? Ke akpanikọ, ikpọfọnke!