Mbụme Oro Mme Andikot Ẹbụpde . . .

Ndi Isọn̄ Eyenyene Mme N̄kpọ Ekem Kpukpru Ini Ndinịm Owo Uwem?

▪ Ediye ekondo Isọn̄ nnyịn enen̄ede enyene ukeme ndinịm mme owo uwem. Edi nte mme owo ẹdiọn̄de-diọn̄ ẹwak, ọkọrọ ye nte ẹdiade n̄kpọ isọn̄ ke en̄weme ẹkeme ndinam fi ekere ete: ‘Okûdi se ikerede ekeme nditịbe? Ndi isọn̄ ayaka iso enyene mme n̄kpọ oro ẹkemde ndinịm mme owo uwem?’

Ima itie ikere mbụme emi, un̄wọn̄ọ emi Abasi ọkọn̄wọn̄ọde ọnọ ubonowo ke se ikande isua 4,000 emi ẹkebede ekeme ndidọn̄ nnyịn esịt: “Adan̄a ofụri ini eke isọn̄ ododu, utọ, ye ukpen̄e, ye tuep ye eyo, ye ndaeyo ye ukwọ, ye uwemeyo ye okoneyo iditreke.” (Genesis 8:22) Ke ntem, kpa nte ifiọkde ke utịn ayasiaha kpukpru usen, ntre ke ikeme ndinen̄ede nnịm ke tutu amama isọn̄ iditreke ndinyene mme n̄kpọ oro ẹdinịmde mme owo uwem.

Ke ndụn̄ọde oro ẹkenamde ke 2004, oro ẹkotde “Nte Isọn̄ Ekeme Ndibọk Nnyịn?” Alex Kirby, owo emi esiwetde n̄kpọ aban̄a n̄kann̄kụk, ọkọdọhọ ete: “Isọn̄ esin̄wụm udia oro ekemde ndiyụhọ kpukpru owo. Edi udia emi esiwak ndidu ke idiọk itie, m̀mê ọsọn̄ urua akaha, mîdịghe owo ikemeke ndinịm ebịghi. Ke ntem, idịghe ifiọk ntaifiọk mîyakke kpukpru owo ẹnyene udia, edi nte ẹkarade ukara mîyakke.” Edieke ẹkpetịmde ẹse ẹban̄a isọn̄ ẹnyụn̄ ẹdia inyene isọn̄ ke usọ, owo ikpokopke ndịk ke mme n̄kpọ ẹyekụre. Ke uwụtn̄kpọ, ke eyo Israel eset, Abasi ama ọnọ mmọ ndausụn̄ nte ẹkpekamade isọn̄ ke eti usụn̄. Leviticus 25:4 ọdọhọ ke Abasi ọkọdọhọ nditọ Israel ete: “Yak isọn̄ adia sabbath nduọk-odudu . . . ke ọyọhọ isua itiaba: ke otu in̄wan̄ fo, kûnyụn̄ udiọn̄ in̄wan̄ vine fo.” Okposụkedi emi mîkanaha mmọ ẹtọ in̄wan̄ mmọ ke kpukpru ọyọhọ isua itiaba, Abasi ama ọn̄wọn̄ọ ke iyọnọ mmọ ekese nti n̄kpọ ndien ke mmọ ikenyeneke ndikpa ekikere ke unana eyesịm mmimọ.—Leviticus 26:3-5.

Okposụkedi emi ẹsịnde ekese ukeme mfịn ẹdiọn̄ se ẹkebiatde ke isọn̄, ediwak owo ẹdọhọ ke ukeme emi iwọrọke n̄kpọ, mîdịghe ke ini ebe akaha. N̄kukụre nsinsi usọbọ odu ke Ediyarade 11:18. Bible ọdọhọ ke ọtọ oro ke Jehovah ‘oyosobo mmọ oro ẹsobode isọn̄.’ Jehovah eyetre nte ẹbiatde isọn̄ ye se idude ke enye onyụn̄ okụt ete ke isọn̄ on̄wụm se ikemde kpukpru mme andidụn̄ ke esịt. Ẹyesobo kpukpru mbon oro ẹsọn̄de ibuot ẹbiat uduak Abasi ẹnyụn̄ ẹdiade inyene isọn̄ ke en̄weme. Amaedi mbon oro ẹsụhọrede idem ẹda ye ukara Jehovah, ikọ Psalm 72:16 emi oyosu mmọ ke idem: “Uwak ibokpot ẹyedu ke isọn̄ ke nsom ikpọ obot.”

Akaka ima ye ọniọn̄ Jehovah anam enye ọn̄wọn̄ọ ke ubonowo ẹyedụn̄ ẹnyụn̄ ẹse ẹban̄a ebietidụn̄ mmọ—oro edi, Paradise isọn̄. (Genesis 1:28) Okopitem ubonowo emi ẹdude ke idak ukara esie ẹyekpep ndidia inyene isọn̄ ọniọn̄ ọniọn̄, idiaha ke en̄weme. Esịt adat nnyịn didie ntem ndinyene utọ Andinọ oro, emi edinọde kpukpru mme andidu uwem se mmọ ẹmade, ẹyụhọ!—Psalm 145:16.

[Se ẹwetde ke ikpọ abisi ke page 22]

“Idịghe ifiọk ntaifiọk mîyakke kpukpru owo ẹnyene udia, edi nte ẹkarade ukara mîyakke”