Bible Okpụhọde Mme Owo

NSO n̄kpọ ke owo emi okodụkde n̄ka mme abiatibet, emi okonyụn̄ enyenede mbumehe un̄wọn̄ ikọn̄ekpo, akanam man etre ndiọi edu emi? Nso ikanam owo n̄kaikwọ ata n̄kpọsọn̄ n̄kukwak afat anyan idet esie onyụn̄ etre ndima ikwọ oro enye ekesinen̄erede ama? Nso ikanam owo oro mîkamaha ndisụk ibuot nnọ ido ukpono ye ukara akabade edi ọkwọrọ ikọ? Kop se mmọ ẹtịn̄de.

“Mma n̄kan mbumehe.”—PETER KAUSANGA

ISUA EMANA: 32

IDỤT EMI NTODE: NAMIBIA

UTỌ OWO EMI N̄KEDIDE: OWO N̄KA UBIATIBET EMI EKENYENEDE MBUMEHE UN̄WỌN̄ IKỌN̄EKPO

NTE N̄KESIDUDE UWEM: Ẹkebọk mi ke Kehemu, kiet ke otu n̄kpri obio inan̄ ke akwa obio Rundu. Mme owo do ẹsinyam ibokpot, ifia, ye ukan̄ ẹda ẹdu uwem.

Eka mi ama akpa ke ini n̄kedide isua iba kpọt, ntre eka eka mi ekemen mi akama. Nnyịn ikodu mmemmem uwem. N̄kedịghe eyenọwọn̄ nsọn̄ibuot, edi ediyom ndikpebe mme uke mi ekesịn mi ke fehesan̄. Mma ndụk n̄ka ubiatibet ke ufọkn̄wed. Oro ama anam nsitiene n̄n̄wana en̄wan ke efak, mfiomo mme owo, nyịp n̄kpọ, nsidịbe nda daimọn mbe ndụk idụt en̄wen, n̄n̄wọn̄ ekikak mmịn nnyụn̄ nda n̄kpọsọn̄ ibọk. Ẹma ẹmụm mi ikaba ẹnyụn̄ ẹkọbi ke ntak emi n̄kobụn̄de ufọk owo ndụk nyịp n̄kpọ ye ke ntak udia n̄wo.

Mma ntre n̄wed ke ini n̄kodude ke n̄wed inan̄ ke sekọndri, nnyụn̄ n̄kpọn̄ obio nnyịn ye n̄ka ubiatibet oro n̄ka usụn̄ oyom. N̄koyom ndifafiak ntọn̄ọ uwem. Edi n̄kosụk nnyenyene mbumehe un̄wọn̄ ikọn̄ekpo. Ndusụk ini, mma nsisan̄a ediwak kilomita man n̄kedep ikọn̄ekpo.

NTE BIBLE OKOKPỤHỌREDE UWEM MI: Ke ntọn̄ọ ntọn̄ọ 1999, mma nsobo ye Mme Ntiense Jehovah oro ẹkenọde mme owo n̄wed ke efak. Mmọ ẹkenam n̄kpọ ye ami ukpono ukpono ye uku uku, ndien oro ama enem mi ọsọn̄. Se n̄kokotde ke n̄wed oro n̄kọbọde ama anam nnịm ke mmokụt ido ukpono akpanikọ. Mma ntọn̄ọ ndisịn ifịk n̄kpep Bible, ndien ikebịghike mma ndifiọk ke n̄kenyene ndikpụhọde nte n̄kodude uwem edieke nyomde ndinem Jehovah Abasi esịt.

Mma nnịm usen oro nditrede ndin̄wọn̄ ikọn̄ekpo, emi ndinyụn̄ mbiatde n̄kpọ ekededi oro n̄kesidade n̄n̄wọn̄ ikọn̄ekpo mfep. Mma  nsian mme ufan mi n̄ko nte ẹkûnọ mi sika, ẹkûnyụn̄ ẹn̄wọn̄ ke ebiet emi ami ndude. Kpa ye oro, ikedịghe nte n̄kekerede. Mma mfiak n̄n̄wọn̄ sika ye ikọn̄ekpo ikaba. Edi emi ikanamke idem emem mi. Mma nsiti edumbet oro odude ke Mme N̄ke 24:16, emi ọdọhọde ete: “Eti owo [ọduọ] utịm ikatiaba, ndien adaha ke enyọn̄.” Ke akpatre, mma ntre mbumehe un̄wọn̄ ikọn̄ekpo.

Nte n̄kekpepde n̄kpọ mban̄a Jehovah, ntre ke ọkọdọdiọn̄ ọdọn̄ mi ndidi ata ufan esie. Itie Bible kiet oro n̄kenen̄erede mma ekedi Psalm 27:10, emi ọdọhọde ete: “Koro ete mi ye eka mi ẹkekpọn̄de mi, ndien Jehovah emen mi akama.” Nte n̄kenen̄erede n̄kpep Bible, mma ndikụt ke itien̄wed oro edi akpanikọ. Mma ndida Jehovah nte ata edima Ete mi oro ekerede aban̄a.

Mma nsidụk mbono esop Mme Ntiense Jehovah kpukpru ini. Mma n̄kụt ke mmọ ẹnen̄ede ẹdi nti ufan emi ẹmade kiet eken. Akanam n̄kwe orụk ima oro.

UFỌN ORO MBỌDE: Jehovah ye ekemmọ Mme Ntiense ẹn̄wam mi n̄kama idem ọfọn, nsịne n̄kpọ nte odotde, nnyene eti edu uwem, nnyụn̄ ntịn̄ nti ikọ. Mma mfiak nti nte uwem mi eketiede, etie nte uwem mi okpụhọrede nte emi ikọn̄wọ itụt akabarede ediye ọfọn̄ekpo. Mme iman mi ẹkop inemesịt ẹban̄a nte n̄kpụhọrede, ndien emi anam mmọ ẹkpono mi. Mmọdọ n̄wan idahaemi, ndien ke ndomo ukeme ndidi edima ebe ye ete.

“Uwem mi enen̄ede enyene ufọn.”—MARCOS PAULO DE SOUSA

ISUA EMANA: 29

IDỤT EMI NTODE: BRAZIL

UTỌ OWO EMI N̄KEDIDE: OWO N̄KAIKWỌ ATA N̄KPỌSỌN̄ N̄KUKWAK

NTE N̄KESIDUDE UWEM: Ubon nnyịn ẹkedụn̄ ke Jaguariuna ke São Paulo. Ete ye eka mi ẹkedi ifịk ifịk mbon Catholic, ndien ke ini n̄kedide eyenọwọn̄, mma nsin̄wam oku ke ini edinam ido ukpono. Emi akanam nditọ ufọkn̄wed praimari nnyịn ẹsikot mi Fada. Edi ke ini n̄kedide isua 15, mma ndima ikwọ ata n̄kpọsọn̄ n̄kukwak rọk. Mma ntọn̄ọ ndidụk ndụk ye mbon ikwọ rọk. Mma nnịm anyan idet. Ndien ke 1996, ete mi ama edep akpa n̄kpoduoho ikwọ mi ọnọ mi.

Ke 1998, mma ndụk n̄kaikwọ ata n̄kpọsọn̄ n̄kukwak rọk oro ẹsiwụtde ido iyatesịt. Ikwọ oro ikesibrede ẹkeban̄a Satan ye ndek ndek ikọ. Enye ekesịn udọn̄ ọnọ afai. Ikwọ emi ekebiere nte n̄kerede n̄kpọ ye nte ndude uwem. Mma ndọdiọn̄ n̄kere idiọk kpọt nnyụn̄ ntie ekọn̄ ekọn̄.

NTE BIBLE OKOKPỤHỌREDE UWEM MI: N̄kosobo ye Mme Ntiense Jehovah ke akpa ini ke 1999. Mmọ ẹma ẹdọhọ mi n̄kpep Bible ye mmimọ, mma nnyịme, okposụkedi emi mmen̄kenen̄ekede nnyene udọn̄. Edi se n̄kekpepde ke Bible ama anam n̄kpụhọde nte n̄kesede uwem.

Ẹkediọn̄ọ mi nte “ufan anyan idet oro,” “owo ikwọ rọk,” ye “amia ekọmọ.” Edi mma ndifiọk  ke ndidi owo n̄kaikwọ emi anam mi n̄kere mban̄a idemmi kpọt nnyụn̄ ndomo idem ye mbon en̄wen, ndien n̄kamaha aba etop oro n̄kọwọrọde. Enyịn ama edin̄wan̄a mi, ami nnyụn̄ n̄kụt ke nta ikwọ oro n̄katuakde ibuot nnọ ikodụhe uwem oro enyenede se ọwọrọde. Ama an̄wan̄a mi sụn̄sụn̄ ke edieke nyomde ndinem Jehovah Abasi esịt, ke ana n̄kpọn̄ ikwọ n̄kpọsọn̄ n̄kukwak ye oburobụt uwem ye ukpono ndem oro ẹsan̄ade ye ikwọ emi.

Mma mma ikwọ oro ye anyan idet mi. Mma nsikere m̀mê mmekeme ndikpọn̄ n̄kpọ emi. N̄konyụn̄ ndi owo ikponesịt ndien mma mfiọk ke ana n̄kpep ndisụhọde esịt. Edi ukpepn̄kpọ Bible ama an̄wam mi ntọn̄ọ ndima Jehovah. Ke ini n̄kekpepde ke Abasi edi ima onyụn̄ enyene ime ye mbọm, emi ama anam mi nsan̄a n̄kpere enye. Mma mbọn̄ akam nnọ Jehovah nte an̄wam mi n̄kpụhọde, ndien enye ama eyere akam mi. Mmokụt nte Mme Hebrew 4:12 edide akpanikọ. Itien̄wed oro ọdọhọ ete: “Ikọ Abasi enyene uwem onyụn̄ enyene odudu.”

Ke ini n̄kọtọn̄ọde ndibuana ye Mme Ntiense Jehovah, mma n̄kụt ke mmọ ẹkpụhọde. Ata akpa ini emi n̄kokụtde nte ẹmade owo ata ima ekedi oro. Mma nnen̄ede n̄kụt ima emi ke akamba mbono oro Mme Ntiense ẹkenịmde. Ama enen̄ede enem mi ndikụt nte ifịk ifịk mbon unyịmesịt ẹkenamde utom man mbon en̄wen ẹkop inem mbono oro.

UFỌN ORO MBỌDE: Jehovah an̄wam mi n̄keme ndisụhọde esịt idahaemi. Mmenịm ke n̄kereke aba mban̄a idemmi kpọt, ke nnyụn̄ ntan̄ke aba idem.

Ama odu ini oro akani usụn̄ uwem mi ekesidọn̄de mi—edi idọn̄ke mi aba. Idahaemi, uwem mi enen̄ede enyene se ọwọrọde. Mmokop inemesịt ndikpep ndima mbon en̄wen, nnyụn̄ n̄kere mban̄a ufọn mmọ.

“Mmokop idatesịt ndikere mban̄a mbon en̄wen.”—GEOFFREY NOBLE

ISUA EMANA: 59

IDỤT EMI NTODE: UNITED STATES

UTỌ OWO EMI N̄KEDIDE: N̄KAMAHA NDISỤK IBUOT NNỌ IDO UKPONO YE UKARA

NTE N̄KESIDUDE UWEM: Ẹkebọk mi ke Ipswich ke Massachusetts, obio mme anamutom mbakara, emi odude ke mbeninyan̄. Ke mma n̄kokpon n̄wọrọ owo, n̄kemek ndidụn̄ ke nsannsan ikpehe obio Vermont. Nte ido mbon Edem Edere America edide, ami ye ndantie mi ikodu ata mmemmem uwem. Nnyịn ikenyeneke ikan̄ ilektrik, ntre ima isidụk akai ikatan̄ ifia ida ibara ikan̄ inam ufọk nnyịn ofiop inyụn̄ ida item udia. Itie ukaikọt nnyịn ikesịneke ke esịtufọk, mmọn̄ esan̄ukwak ikesinyụn̄ iwakke ndiwọrọ. Nnyịn ikamaha ndidu  uwem nte mbio obio eken. Ini kiet, mma nda nte mmen̄kesarike idet ke ọfiọn̄ itiokiet ntan̄ ase.

Ini oro ke United States akan̄wana ekọn̄ ke Vietnam. Emi ama otụk nte n̄kesede ukara. Mma n̄kụt mbubịk ukara ye eke ido ukpono. N̄kekere ke mme n̄ka oro ikemeke ndikọk mfịna ubonowo ye nte ke owo kiet kiet ekpenyene ndibiere se ifọnde m̀mê se idiọkde. Ntre, n̄kekereke ke ọdiọk ndiyịp se ededi oro n̄koyomde.

NTE BIBLE OKOKPỤHỌREDE UWEM MI: Ami ye ndantie mi ima itọn̄ọ ndisikot Bible, edi se ikokotde ikan̄wan̄ake nnyịn. Mma nsida n̄kpọsọn̄ ibọk, edi ke n̄kodomo nditre. Ama ọdọn̄ ndantie mi ndidọ ebe nnyụn̄ mman nditọ. Owo kiet ke otu Mme Ntiense Jehovah ama edi ufọk nnyịn usen kiet ke ini emi, onyụn̄ ọtọn̄ọ ndikpep Bible ye nnyịn.

Ikebịghike mma n̄keme nditre ndiọi edu emi; edi ama enen̄ede ọsọn̄ mi ndikpụhọde nte n̄kesede ukara. Ama emehe mi ndifan̄a kpukpru n̄kpọ. N̄kanam se mmama toto ke uyen, ntre ama enen̄ede ọsọn̄ mi ndinyịme owo eteme mi se n̄kpanamde.

Mma nnịm ke Andibot do, edi n̄kadaha enye nte ata Owo. Edi nte n̄kekpepde Bible, mma ndifiọk mme edu Jehovah Abasi. Mma ndikụt ke enye etịn̄ in̄wan̄-in̄wan̄ se enye oyomde mi nnam. Se enye oyomde oto nnyịn itiehe usem usem. Mma n̄kpep n̄ko ke enye enen̄ede aduak ndinam isọn̄ akabade edi Paradise. (2 Peter 3:13) Akpanikọ emi akanam nyom ndikpụhọde man ndot ndinam n̄kpọ esie.

Mma nnen̄ede mma nte Mme Ntiense Jehovah mîtieneke in̄wana ekọn̄. N̄kọfiọkke ido ukpono en̄wen oro odude ke ofụri ererimbot, emi ẹkenịmde edumbet Bible oro.

Mma mfiọk ke edieke nyomde ndinam n̄kpọ Jehovah, ke ana n̄kama idem ọfọn. Ke akpa, ikenemke mi ndisịne n̄kpọ nte Mme Ntiense. Ami ye mme ufan mi ikenyeneke siọt, ọfọn̄ukot, m̀mê ikpaukot emi ẹkemede ndisịne n̄ka n̄kpọ. N̄kenyeneke urụkitọn̄! Edi mma mfat idet nnyụn̄ mmana mbiet eyenowo. Kpa ye oro, mmeti akpa ini emi n̄ketienede nsan̄a n̄kwọrọ ikọ to ke enyịnusụn̄ sịm enyịnusụn̄. Ke ini n̄kokụtde idem mi ke akrasi, mma n̄kere nte, ‘Nso ke nnam emi?’ Ke akpatre, mma ndima nte n̄kakamade idem.

UFỌN ORO MBỌDE: Mma ndọ ndantie mi, ndien nnyịn ke ikop inem ndọ nnyịn. Nnyịn mbiba imekpep nditọ nnyịn mbita ẹma Jehovah ẹnyụn̄ ẹnam n̄kpọ esie. Enem n̄ko ndin̄wam mbon en̄wen ẹkpep ukem akpanikọ Bible oro akan̄wamde mi n̄kpụhọrede.

Mma nsibụre mbụre ke se mbon en̄wen ẹkerede ibeheke mi. Idahaemi mmokop idatesịt ndikere mban̄a mbon en̄wen, mbon en̄wen ẹnyụn̄ ẹkere ẹban̄a mi.

[Se ẹwetde ke ikpọ abisi ke page 26]

“Mma nsisan̄a ediwak kilomita man n̄kedep ikọn̄ekpo”

[Se ẹwetde ke ikpọ abisi ke page 28]

“Se n̄kekpepde ke Bible ama anam n̄kpụhọde nte n̄kesede uwem”

[Se ẹwetde ke ikpọ abisi ke page 29]

“Ikenemke mi ndisịne n̄kpọ nte Mme Ntiense”