Ndi Emekeme Ndifiọk Abasi ke Enyịn̄?

Edi n̄kpọ ukpono edieke ẹdọhọde fi edikọm onyụn̄ enyene nneme ye ọwọrọiso owo, okot enye enyịn̄. Ẹsiwak ndikọm n̄kpisọn̄ ke utọ udorienyịn̄ nte “Etinyịn,” “Etubom,” m̀mê “Amasi.” Ke ntre, edieke ọwọrọiso owo ọdọhọde fi ete, “Mbọk, kot mi enyịn̄,” eyịghe idụhe ke afo edibat oro nte akwa ukpono.

ATA Abasi asian nnyịn ke Ikọ esie, kpa Bible, ete: “Ami ndi Jehovah; enyịn̄ mi edi oro.” (Isaiah 42:8) Okposụkedi emi enye n̄ko enyenede ediwak udorienyịn̄, utọ nte “Andibot,” “Ata Ọkpọsọn̄,” ye “Akakan Ọbọn̄ Andikara,” enye esikpono mme anam-akpanikọ asan̄autom esie kpukpru ini ke ndidọhọ mmọ ẹkot imọ ọkpọkpọ enyịn̄.

Ke uwụtn̄kpọ, ini kiet prọfet Moses ama eseme okot Abasi ete: “O Jehovah.” (Exodus 32:11) Ke ini ẹkeyakde temple Jerusalem ẹnọ, Edidem Solomon ọkọtọn̄ọ akam esie ntem: “O Jehovah.” (1 Ndidem 8:22, 23) Ndien ke ini prọfet Isaiah ekekpede Abasi ubọk ke ibuot nditọ Israel, enye ọkọdọhọ ete: “Afo, O Jehovah, edi ete nnyịn.” (Isaiah 63:16) Ana inwan̄-in̄wan̄ ke Ete nnyịn eke heaven oyom nnyịn ikot imọ ke enyịn̄.

Ke adan̄aemi edide akpan n̄kpọ ndikot Jehovah ke enyịn̄, ndinen̄ede mfiọk enye tutu ifiọk enye ke enyịn̄ esịne n̄kpọ akan oro. Jehovah ọn̄wọn̄ọ ọnọ mbon oro ẹmade enye ẹnyụn̄ ẹbuọtde idem ye enye, ete: “Nyemenede enye nnịm ke enyọn̄, koro enye ọfiọkde enyịn̄ mi.” (Psalm 91:14) Ana in̄wan̄-in̄wan̄ ke ndifiọk enyịn̄ Abasi enen̄ede esịne n̄kpọ, sia emi edi akpan ntak kiet emi anamde enye ekpeme nnyịn. Do, nso ke oyom man afo ọfiọk Jehovah tutu ọfiọk enye ke enyịn̄?