“Ami Ndifreke Fi”
San̄a Kpere Abasi
“Ami Ndifreke Fi”
NDI Jehovah enen̄ede ama ikọt esie? Edieke amade, ama adan̄a didie? Jehovah Abasi kpọt ekeme ndibọrọ mbụme emi. Jehovah etịn̄ nte imọ imade owo ke Bible. Yak ise se idude ke Isaiah 49:15.
Jehovah ama anam prọfet Isaiah ọnọ akakan uwụtn̄kpọ ndida n̄wụt adan̄a nte imọ imade ikọt imọ. Enye ọtọn̄ọ ke ndibụp mbụme emi anamde owo ekere n̄kpọ mi ete: “Nte n̄wan ekeme ndifre eyen esie emi awapde eba inyụn̄ ituaha eyen idịbi esie mbọm?” Owo ekeme ndidi okokop mbụme emi, enye ọdọhọ ke idụhe ekaeyen emi ekpefrede nsekeyen esie sia nsekeyen esiyoyom ẹnam kpukpru n̄kpọ ẹnọ imọ, okoneyo ye uwemeyo. Edi enyene se ikanamde Jehovah obụp mbụme emi.
Ntak emi eka esikpemede nsekeyen esie onyụn̄ ọnọ kpukpru se enye oyomde? Ndi esidi mbak eyen emi editua? Baba. Ima ekaeyen esinam eka okop “eyen idịbi esie” oro “mbọm.” (Exodus 33:19) Iwakke ima emi okponde nte ima emi eka enyenede ọnọ nsekeyen esie emi oyomde ẹnanam kpukpru n̄kpọ ẹnọ.
Edi idịghe kpukpru eka ẹsinyene utọ ima emi ẹnọ nseknditọ mmọ. N̄kọ nnyịn idu ke ererimbot oro mme owo mînyeneke “ndammana ima.” (2 Timothy 3:1-5) Jehovah ọdọhọ ke mme eka “ẹkam ẹkeme ndifre” nseknditọ mmọ. Ndusụk ini, imesikop ke mme ekaeyen ẹfehe ẹkpọn̄ eyen mîdịghe ẹtotop ẹduọk. Kop se n̄wed kiet emi esinamde ikọ Bible an̄wan̄a etịn̄de aban̄a ikọ Isaiah 49:15 emi: “Sia mme eka nditọ ẹnyụn̄ ẹdide mme anamidiọk, ndusụk ini mmọ ẹsima idemmọ kpọt utu ke nditọ. Emi owụt ke idem ekaeyen emi akpamade nsekeyen esie ekeme nditre ndima.”
Edi amaedi Jehovah, enye ọdọhọ ete: “Ami ndifreke fi.” Etie nte ntak emi Jehovah obụpde mbụme oro ikụtde ke Isaiah 49:15 ọtọn̄ọ ndin̄wan̄a nnyịn do ndien. Idịghe nte ke Jehovah emen idemesie odomo ye owo, edi akam owụt ke imọ itiehe nte owo. Oro edi, ke kpa ye emi ekaeyen ekemede ndifre nsekeyen emi enye amande, mbọm eyen emi mînyụn̄ inamke enye, ke imọ Jehovah ikemeke-keme ndifre ikọt imọ nnyụn̄ ntre nditua mmọ mbọm. Ntak edi oro n̄wed oro ikasiakde ke enyọn̄ emi ọdọhọde ke ikọ Isaiah 49:15 emi “edi kiet ke otu akakan, ke mîkam idịghe enye edi akakan, ikọ Akani Testament emi ẹwụtde nte Abasi amade ima.”
Ndi inemke fi ndifiọk ke Jehovah edi ‘Abasi mbọm’? (Luke 1:78) Nnyịn imesịn udọn̄ inọ fi ite ekpep nte ekemede ndisan̄a n̄kpere enye. Kop se Abasi ima ọdọhọde mme asan̄autom esie mi: “Ndidehedei n̄kpọn̄ fi, ndinyụn̄ nsịnke fi.”—Mme Hebrew 13:5.
Itie Bible emi okpokotde ke February:
