Kpep N̄kpọ To Ikọ Abasi

Ntak Emi Abasi Enyenede Esop?

Ibuotikọ emi obụp mme mbụme emi ẹkemede ndidi emesibụp n̄ko, onyụn̄ owụt ebiet emi okpokụtde ibọrọ ke Bible fo. Mme Ntiense Jehovah ẹyema ndinam ibọrọ mbụme emi enen̄ede an̄wan̄a fi.

1. Ntak emi Abasi akanamde Israel edi esop?

Abasi akanam nditọ Abraham ẹdi idụt m̀mê esop kiet, ọnọ mmọ ibet, onyụn̄ okot mmọ idụt Israel. Enye ama ayak Ikọ esie, kpa Edisana N̄wed Abasi, esịn mmọ ke ubọk. Ntre, mmọ ikpọn̄-ikpọn̄ ẹkediọn̄ọ ẹnyụn̄ ẹkpono ata Abasi. (Psalm 147:19, 20) Ndutịm emi ama ada ufọn ọsọk kpukpru mme idụt isọn̄.—Kot Genesis 22:18.

Abasi akanam emi ye idụt Israel man mmọ ẹdi ntiense imọ. Ke ini mmọ ẹkekopde uyo Abasi ẹnyụn̄ ẹnịm ibet esie, mmọ ẹma ẹsidia ufọn. (Deuteronomy 4:6) Edieke ikpepde n̄kpọ iban̄a nditọ Israel, nnyịn iyenen̄ede idiọn̄ọ ata Abasi.—Kot Isaiah 43:10, 12.

2. Ntak emi ata mme Christian ẹnamde utom nte esop?

Nsọn̄ibuot Israel ama anam Abasi ọkpọn̄ mmọ, akabade anam n̄kpọ ye esop Christian. (Matthew 21:43; 23:37, 38) Mbemiso emi, idụt Israel ekedi mme ntiense ẹnọ Abasi. Kpasụk ntre, ata mme Christian mfịn ẹnyụn̄ ẹdi mme ntiense ẹnọ Jehovah.—Kot Utom 15:14, 17.

Jesus ekekpep mme mbet esie ete ẹdiana kiet nte esop ẹtie ntiense ẹnọ Jehovah ẹnyụn̄ ẹnam mme owo ke kpukpru idụt ẹdi mbet imọ. (Matthew 10:7, 11; 24:14; 28:19, 20) Utom emi ọmọn̄ okokụre. Akpa edi emi Jehovah anamde ata ediwak owo ke nsio nsio idụt ẹdiana kiet ẹtuak ibuot ẹnọ imọ. (Ediyarade 7:9, 10) Jesus ọkọdọhọ ata mme Christian ẹnam utom nte esop man mmọ ẹkeme ndisịn udọn̄ nnọ kiet eken nnyụn̄ n̄n̄wam kiet eken. Mmọ ẹsikpep ukem n̄kpọ ke mme mbono esop mmọ ke ofụri ererimbot.—Kot Mme Hebrew 10:24, 25.

  3. Ini ewe ke esop Mme Ntiense Jehovah ọkọtọn̄ọ ke eyo nnyịn?

Esop Mme Ntiense Jehovah ọkọtọn̄ọ ke iduọk isua 1870. Ekpri otu nditọ ukpepn̄kpọ Bible ẹma ẹdụn̄ọde Bible ẹkụt akpanikọ oro mme ọkwọrọikọ mîkesikpepke. Mmọ ẹma ẹkụt ke Jesus ọkọdọhọ mme Christian ẹkwọrọ ikọ. Ntre mmọ ẹma ẹtọn̄ọ ndikwọrọ etop Obio Ubọn̄ Abasi ke ofụri ererimbot. Mmọ ẹketọn̄ọ ndikere Mme Ntiense Jehovah ke 1931.—Kot Utom 1:8; 2:1, 4; 5:42.

4. Ẹtịm didie esop Mme Ntiense Jehovah mfịn?

Esop mme Christian emi ẹkedude ke nsio nsio idụt ke eyo mme apostle ẹkesitiene ndausụn̄ mbiowo ifan̄ oro ẹkediọn̄ọde nte otu ukara; otu ukara emi ẹkesinyụn̄ ẹtiene ndausụn̄ Jesus emi edide Ibuot esop Christian. (Utom 16:4, 5) Kpasụk ntre ke edi mfịn, Mme Ntiense Jehovah ẹda Jesus nte Adausụn̄ mmọ. (Matthew 23:9, 10) Mmọ n̄ko ẹtiene ndausụn̄ Otu Ukara, kpa mbiowo ifan̄ oro ẹnen̄erede ẹfiọk Bible, emi ẹsinyụn̄ ẹkpepde esop Mme Ntiense Jehovah emi ebede 100,000 ke ofụri ererimbot Ikọ Abasi. Mbiowo m̀mê mme esenyịn ẹdu n̄ko ke mme esop emi kiet kiet. Irenowo emi ẹkpeme otuerọn̄ Abasi ke ima.—Kot 1 Peter 5:2, 3.

Ẹtịm esop Mme Ntiense Jehovah ntem man mmọ ẹkwọrọ eti mbụk Obio Ubọn̄ Abasi ẹnyụn̄ ẹnam mme owo ẹdi mbet Christ. Mme Ntiense Jehovah ẹkabade mme n̄wed Bible mmọ ke se ibede usem 500, ẹmịn̄ ẹnọ mme owo man eti mbụk emi esịm kpukpru owo. Mmọ n̄ko ẹsikwọrọ ikọ ke ufọk ke ufọk nte mme apostle ẹkesikwọrọde. (Utom 20:20) Mmọ ẹsika ẹkekpep Bible ye owo ekededi emi amade akpanikọ. Ndisịn idem nnam se inemde Abasi esịt nnyụn̄ n̄n̄wam mme owo ọnọ mmọ inemesịt.—Kot Psalm 33:12; Utom 20:35.

[Se ẹwetde ẹban̄a ndise ke page 27]

Edieke oyomde ndifiọk n̄kpọ en̄wen, mbọk kot ibuot 19 ke n̄wed Nso ke Bible Enen̄ede Ekpep?, emi Mme Ntiense Jehovah ẹsiode.