Bible Okpụhọde Mme Owo

ETE kiet emi otode Scotland ekedi edikụt ke nso inen̄ede ifọn ikan akamba mbubehe oro imọ ikanamde? Nso ikanam ete kiet ke Brazil etre oburobụt ido onyụn̄ etre ndin̄wọn̄ cocaine? Ete kiet ke Slovenia emi ekedide ọn̄wọn̄-n̄kpọ-owo akasan̄a didie etre ndin̄wọn̄ n̄kpọ? Yak mmọ ẹda inua mmọ ẹtịn̄.

“Eketie nte nnyeneke mfịna ke uwem.”​—JOHN RICKETTS

N̄KAMANA KE 1958

NTO SCOTLAND

MMA NNYENE ATA ETI MBUBEHE

NTE UWEM MI EKETIEDE: Mma n̄kop inem uwem etieti. Ete mi ekedi akwa owoekọn̄ Britain, ntre nnyịn ikesidụn̄ke ke ebiet kiet ibịghi. Ima idụn̄ ke Scotland, inyụn̄ idụn̄ ke England, Germany, Kenya, Malaysia, Ireland ye Cyprus. Edi ke ini n̄kedide isua itiaita, mma ntọn̄ọ ufọkn̄wed emi ẹdụn̄de-dụn̄ ke Scotland. Ekem mma n̄kụre Ufọkn̄wed Ntaifiọk Cambridge.

Ke ini n̄kedide isua 20, mma ntọn̄ọ ndinam utom ke itie usio aran ke ofụri isua itiaita. N̄kọtọn̄ọ utom emi ke South America, ekem n̄kanam ke Africa, ndien ke akpatre ke Edem Usoputịn Australia. Ke mma n̄kesịm Australia, mma ntọn̄ọ akamba mbubehe efen. Edi nte ini akade, mma nnyam mbubehe emi.

Okụk emi n̄kanyamde mbubehe oro ama ekem se ndade nse mban̄a idemmi, ntre mma ntre utom ke ini n̄kedide isua 40. Mma nnyene ini idahaemi ndisika isan̄. Mma n̄wat ke ọkpọkkpọk n̄kanade ofụri Australia ikaba; nnyụn̄ nnam isan̄ n̄kanade ofụri ererimbot. Eketie nte nnyeneke mfịna ke uwem.

NTE BIBLE OKOKPỤHỌREDE UWEM MI: Mbemiso n̄ketrede utom, mma n̄kere se n̄kpanamde nnọ Abasi ke utọ uwem oro n̄kodude. Ntre mma mfiak ntọn̄ọ ndika Ufọkabasi Anglican emi n̄kesikade toto ke uyen. Edi ediwak se mmọ ẹkekpepde ikotoho Bible. Ekem mma ntọn̄ọ Ufọkabasi Mormon, edi mma ntre sia ekese ukpepn̄kpọ mmọ mîkonyụn̄ itoho Bible.

Usen kiet, Mme Ntiense Jehovah ẹma ẹdi ufọk mi. Mma nsọsọp n̄kụt ke kpukpru se mmọ ẹkpepde ẹto Bible. Mmọ ẹma ẹkot 1 Timothy 2:3, 4 ẹnọ mi. Itien̄wed emi ọdọhọ ke Abasi oyom ‘kpukpru orụk owo ẹnyene edinyan̄a ẹnyụn̄ ẹsịm nnennen ifiọk akpanikọ.’ Ama enen̄ede enem mi nte Mme Ntiense ẹkedọhọde ke ana owo enyene nnennen ifiọk Bible.

Mma n̄kpep Bible ye mmọ ndien emi ama anam nnyene nnennen ifiọk oro. Ke uwụtn̄kpọ, mma ndifiọk ke Abasi ye Jesus idịghe ubak Abasi-Ita-ke-Kiet oro ẹdọhọde ke edi ndịben̄kpọ,  edi ke mmọ ẹdi ata nsio nsio owo iba. (John 14:28; 1 Corinth 11:3) Esịt ama enem mi etieti ndifiọk emi. Edi esịt ama enen̄ede ọdiọk mi ndikabiat ofụri ini oro n̄kpep nsu emi ẹdọhọde ke edi ndịben̄kpọ.

Ikebịghike, mma ntọn̄ọ ndidụk mbono esop Mme Ntiense Jehovah. Ndikụt nte kpukpru owo do ẹtiede ufan ufan ẹnyụn̄ ẹdomode ndidu eti uwem ama enem mi etieti. Eketie nte mmọ ẹdi mme angel. Ata ima oro mmọ ẹkenyenede ama anam nnen̄ede nnịm ke mmokụt ido ukpono akpanikọ ndien.—John 13:35.

UFỌN ORO MBỌDE: Ke mma n̄kana baptism, mma nsobo ye ediye an̄wan kiet emi ekerede Diane. Mme Ntiense Jehovah ẹma ekpep enye akpanikọ toto ke ata ekpri. Mma mma enye sia enye ama enyene ediwak nti edu. Nte ini akade, ima inam ndọ. Mmenen̄ede n̄kụt ke Jehovah ọkọnọ mi n̄wan emi sia enye ọfọn etieti ye ami.

Ami ye n̄wan mi ima inen̄ede iyom ndika n̄kọkwọrọ ikọ ke ebiet emi ẹnen̄erede ẹyom mme ọkwọrọ eti mbụk. Ke isua 2010, nnyịn ima iwọrọ ika Belize ke Central America. Nnyịn ke isụk ikwọrọ ikọ mi inọ mbon oro ẹmade Abasi ẹnyụn̄ ẹyomde ndikpep Bible.

Ndinyene nnennen ifiọk Abasi ye Ikọ esie, kpa Bible anam esịt ana mi sụn̄. Sia ndide ọkwọrọikọ ofụri ini, mmenen̄ede n̄kop inemesịt ndikpep ediwak owo Bible. Idụhe se ifọnde inyụn̄ inemde nte edikụt nte akpanikọ Bible okpụhọrede mme owo nte okonyụn̄ okpụhọrede mi. Idahaemi ndien ke ndiọn̄ọ se n̄kpanamde nnọ Abasi ke utọ uwem oro ndude.

“Mmọ ẹma ẹfọn ye ami etieti.”​—MAURÍCIO ARAÚJO

N̄KAMANA KE 1967

NTO BRAZIL

N̄KODU ATA OBUROBỤT UWEM

NTE UWEM MI EKETIEDE: N̄kokpon ke Avaré, ekpri obio kiet ke São Paulo. Mme owo itịmke inyene n̄kpọ ke obio emi.

Ete mi akakpa ke ini eka mi akasan̄ade ye idịbi mi. Ke ini n̄kedide eyenọwọn̄, mma nsimen ọfọn̄ eka mi nsịne enye ama ọwọrọ. N̄kesinam n̄kpọ nte n̄wan, ntre mme owo ẹma ẹtọn̄ọ ndikere ke mmesinyene ebuana ye ekemmọ erenowo. Nte ini akakade, mma ntọn̄ọ ndinyene ebuana ye irenowo, n̄kpri ye ikpọ.

Edi ke mma n̄kekpere isua 20, n̄kesinam emi ye owo ekededi oro n̄kụtde (irenowo ye iban) ke ebiet ekededi—mme itie un̄wọn̄ n̄kpọ ye mme ufọk unek, idem ke mme ufọkabasi. Ke ini usọrọ carnival nnyịn, mma nsisịne ọfọn̄ nte n̄wan nnek unek, nnyụn̄ n̄wọrọ etop etieti.

N̄kodụk ndụk ye mme akpara, mme ọn̄wọn̄ cocaine, ye irenowo emi ẹsinyenede ebuana ye ekemmọ irenowo. Ndusụk mmọ ẹma ẹnam ntiene n̄n̄wọn̄ cocaine, ndien ikebịghike, cocaine ama emehe mi. Ndusụk ini ikesin̄wọn̄wọn̄ cocaine tutu eyo esiere. Ndusụk ini ntie ke idemmi n̄n̄wọn̄ tọn̄ọ usenubọk tutu  eyo okụt. Idem ama ọwọrọ mi tutu mme owo ẹtọn̄ọ ndidọhọ ke mmemen AIDS.

NTE BIBLE OKOKPỤHỌREDE UWEM MI: Idaha ntem ke n̄kosobo ye Mme Ntiense Jehovah. Mmọ ẹma ẹfọn ye ami etieti. Kiet ke otu itie Bible emi mmọ ẹkekotde ẹnọ mi edi Rome 10:13, emi ọdọhọde ete: “Ẹyenyan̄a kpukpru owo eke ẹsemede ẹkot enyịn̄ Jehovah.” Itie Bible emi ama anam mfiọk ufọn edikot enyịn̄ Jehovah. Ediwak ini, ke mma n̄kọn̄wọn̄ cocaine ofụri okoneyo, mma nsiberede window nse enyọn̄ nnyụn̄ mbọn̄ akam nnọ Jehovah ye mmọn̄eyet, n̄kpe enye ubọk nte an̄wam mi.

Mma mbiere ke ndin̄wọn̄ke aba cocaine ke ini n̄kụtde nte eka mi atuade eseme ke ini okụtde nte mbiatde uwem mi. Ikebịghike, mma nnyịme Mme Ntiense Jehovah ẹdikpep mi Bible. Mmọ ẹma ẹdọhọ mi ke edieke n̄kpepde Bible, ke emi ayan̄wam mi ntre cocaine, ntre ke okonyụn̄ edi.

Nte n̄kosụk n̄kpepde Bible, mma ndikụt ke akpana n̄kpụhọde. Se ikenen̄erede isọn̄ mi ekedi nditre ndinyene ebuana ye irenowo, sia n̄kọtọn̄ọ oburobụt uwem emi toto ke ini eyenọwọn̄. N̄kpọ kiet emi akan̄wamde mi n̄kpụhọde ekedi nditre ndiọi nsan̄a, nnyụn̄ ntre ndisika mme itie un̄wọn̄ n̄kpọ ye mme ufọk unek.

Okposụkedi emi mîkememke utom ndinam mme ukpụhọde emi, esịt ama enem mi ndifiọk ke Jehovah ama mi onyụn̄ ọfiọk ke imemke inọ mi. (1 John 3:19, 20) Mma ntre kpukpru ndiọi uwem emi nnyụn̄ nna baptism nte kiet ke otu Mme Ntiense Jehovah ke 2002.

UFỌN ORO MBỌDE: Ukpụhọde emi ama enen̄ede akpa eka mi idem ntre enye ama ọtọn̄ọ ndikpep Bible n̄ko. Edi kpa ye oro enye ọdọn̄ọde akpauben̄, enye ke amama Jehovah ye se Bible ekpepde.

Mmada ofụri isua itiaita idahaemi n̄kwọrọ ikọ ofụri ini, nnyụn̄ n̄kpep mme owo Bible. Ke nditịn̄ akpanikọ, ke n̄n̄wan̄wana ye ndiọi udọn̄. Edi esịt enem mi ndifiọk ke Jehovah oyokop inemesịt edieke nsọn̄ọde nda ntre ndiọi uwem oro.

Ndisan̄a n̄kpere Jehovah nnyụn̄ ndu uwem emi enemde enye esịt anam mfiak ndi owo. Mmokop inemesịt ndien.

Ẹkekot mi “obube mmịn.”—LUKA ŠUC

N̄KAMANA KE 1975

NTO SLOVENIA

N̄KEDI ỌN̄WỌN̄-N̄KPỌ-OWO

NTE UWEM MI EKETIEDE: N̄kamana ke Ljubljana, ibuot obio Slovenia. Mfịna nnyịn ọkọtọn̄ọ ke ini ndide isua inan̄. Ini oro ke ete mi okowot idem. Sia ete mi ama akakpa, eka mi ekenyene ndinam utom ọkpọsọn̄ man ami ye akpan eka emi inyene se idiade.

Mma n̄ka n̄kodụn̄ ye eka eka mi ini ndide isua 15. Ama enem mi ndidụn̄ ye enye sia ediwak mme ufan  mi ẹma ẹdụn̄ ẹkpere enye. N̄kpọ en̄wen emi akanamde enem mi ndidụn̄ ye enye edi ke enye ama esiyak nnam se mmade. Ke ini n̄kedide isua 16, mma ntọn̄ọ ndidụk ndụk ye mbon emi ẹsin̄wọn̄de mmịn nte ẹmama ke mme utịturua. N̄kafatke idet, mma ntọn̄ọ ndisịne n̄kpọ nte owo ntịme, nnyụn̄ ntọn̄ọ ndin̄wọn̄ sika ye ikọn̄ekpo.

Okposụkedi n̄kesin̄wọn̄de ikọn̄ekpo nnyụn̄ nda n̄kpọsọn̄ ibọk eken ke idiọk usụn̄, mmịn ekesinem mi akan. Ikebịghike mma nsin̄wọn̄ mbe akrasi mmịn ifan̄, ntọn̄ọ ndin̄wọn̄ ke ekpeme ke ekpeme. Mma ndiọn̄ọ ndidịp nte mmịn anamde mi eketre. Ediwak ini utebe mmịn oro ke inua mi kpọt ke ẹkesida ẹdiọn̄ọ ke mmọn̄wọn̄ n̄kpọ. Kpa ye oro, owo ndomokiet ikọdiọn̄ọke ke mmọn̄wọn̄ ediwak ekpeme wine m̀mê beer—nnyụn̄ mbuak iken̄ka n̄n̄wọn̄!

Ediwak ini ami n̄kesin̄wam mme ufan mi ẹkeme ndisan̄a nnyọn̄ ke ima ikasuana unek, kpa ye oro edide ami n̄kesin̄wọn̄ n̄kpọ n̄kan mmọ. Usen kiet, mma n̄kop kiet ke otu mmọ ọdọhọde ke ami ndi obube mmịn—enye eketịn̄ emi ndiwụt ke mmesin̄wọn̄ mmịn n̄kan mbon eken n̄kaha. Ikọ oro ama enen̄ede abiak mi!

Mma ntọn̄ọ ndikere se ndade uwem mi nnam. Mma nnen̄ede n̄kere ke n̄wọrọke n̄kpọ ndomokiet. Eketie nte ke inyeneke se nnamde emi ọkọwọrọde usụn̄.

NTE BIBLE OKOKPỤHỌREDE UWEM MI: Ini emi ke n̄kokụt ke ufan mi kiet ama enen̄ede okpụhọde; enye iketiehe aba isa isa edi eketie emem emem. Sia n̄koyomde ndifiọk se inamde enye okpụhọde ntem, mma n̄kot enye edi itie un̄wọn̄ n̄kpọ. Nte ikenemede nneme, enye ama ọdọhọ ke imọ imọtọn̄ọ ndikpep Bible ye Mme Ntiense Jehovah. Enye ama etịn̄ ndusụk n̄kpọ oro enye ekpepde ọnọ mi, ndien kpukpru emi ẹketie mi esen esen sia mmen̄kesikaha ufọkabasi ndomokiet. Mma ntọn̄ọ ndidụk mbono esop ye Mme Ntiense nnyụn̄ n̄kpep Bible ye mmọ.

Ndikpep Bible ama anam mi ndiọn̄ọ ediwak nti n̄kpọ emi mmen̄kọdiọn̄ọke. Ke uwụtn̄kpọ, mma n̄kpep ke Bible okot ini nnyịn emi “mme akpatre usen.” (2 Timothy 3:1-5) Mma n̄kpep n̄ko ke Abasi ọmọn̄ ososobo mme idiọkowo efep ke isọn̄ emi, onyụn̄ anam nti owo ẹdu uwem ke nsinsi ke Paradise. (Psalm 37:29) Ama enen̄ede ọdọn̄ mi ndikpụhọde man ntiene nsịne ke otu nti owo emi ẹdidade isọn̄ emi inyene.

Mma ntọn̄ọ nditịn̄ se n̄kpepde ke Bible nnọ mme ufan mi. Ediwak mmọ ẹkesasak mi ndien emi ama anam n̄kụt ke mmọ idịghe nti ufan. Mma ndikụt ke idiọk ndụk akanam mi ndi ọn̄wọn̄-n̄kpọ-owo. Mme ufan mi ẹkesitetie ẹbet utịturua man mmọ ẹtọn̄ọ ntak ẹkpa mmịn.

Mma ntre ndụk ye mmọ nnyụn̄ ntọn̄ọ ndidụk ndụk ye Mme Ntiense Jehovah. Ndidụk nsan̄a ye utọ mbon emi ẹnen̄erede ẹma Abasi ntem ẹnyụn̄ ẹdomode ndida mme edumbet esie ndu uwem ama enen̄ede an̄wam mi. Nte ini akade, mma n̄keme nditre mmịn.

UFỌN ORO MBỌDE: Mmọkọm Jehovah nte mîdịghe mmịn ọnọ mi inemesịt aba. Ndiọn̄ọke se ikpọwọrọde mi idahaemi edieke n̄kposụk n̄n̄wọn̄de n̄kpọ tutu esịm emi. Mmetịm n̄kụt ke uwem mi ọfọn etieti idahaemi.

Mmokop inemesịt etieti ndinam utom ke n̄kọk itieutom Mme Ntiense Jehovah ke Slovenia ke isua itiaba emi ẹbede. Ndifiọk Jehovah nnyụn̄ nnam n̄kpọ esie anam uwem mi enen̄ede ọfọn.