JESUS ama eset ke n̄kpa. Emi idịghe ikpîkpu mbụkeset emi mînyeneke ufọn inọ nnyịn mfịn. Se apostle Paul eketịn̄de owụt ke Jesus ndiset ke n̄kpa enyene ufọn ọnọ nnyịn. Enye ọkọdọhọ ete: “Christ eset ke n̄kpa, nte akpa mbun̄wụm ke otu mbon oro ẹdede ke n̄kpa. Koro kpa nte n̄kpa otode owo, ediset mme akpan̄kpa oto owo n̄ko. Koro kpa nte otode ke Adam kpukpru owo ẹkpan̄a, kpasụk ntre ke Christ ẹyenam kpukpru owo ẹdu uwem.”—1 Corinth 15:20-22.

Jesus ekeset ke Nisan 16, isua 33 E.N. Usen emi ke mme Jew ẹkesida akpa mfri mbun̄wụm in̄wan̄ mmọ ẹsọk Jehovah Abasi ke temple esie ke Jerusalem. Paul okokot Jesus akpa mbun̄wụm ndiwụt ke Abasi ayanam mbon en̄wen ẹset n̄ko.

Se Paul akafiakde etịn̄ owụt ufọn emi ididiade ke Jesus ndiset ke n̄kpa. Enye ọkọdọhọ ete: “Kpa nte n̄kpa otode owo, ediset mme akpan̄kpa oto owo n̄ko.” Nnyịn isikpan̄a ke ntak idiọkn̄kpọ ye unana mfọnmma emi ikadade imana ito Adam. Edi uwa ufak Jesus anam nnyịn ikeme ndiset ke n̄kpa nnyụn̄ n̄wọrọ ke ufụn idiọkn̄kpọ ye n̄kpa. Paul esịn enye ediye ediye ke Rome 6:23 ete: “N̄kpọ eyenutom idiọkn̄kpọ edi n̄kpa, edi enọ oro Abasi ọnọde edi nsinsi uwem ke Christ Jesus Ọbọn̄ nnyịn.”

Enyene se Jesus ke idemesie eketịn̄de ndiwụt ke imọ ndiset ke n̄kpa eyenyene ufọn ọnọ nnyịn. Enye ọkọdọhọ ete: “Ẹnyene ndimenede Eyen owo ke enyọn̄, man kpukpru owo eke ẹnịmde enye ke akpanikọ ẹkpenyene nsinsi uwem. Koro Abasi ama enen̄ede ama ererimbot tutu enye ọnọ ikpọn̄-ikpọn̄ edibon Eyen esie, man owo ekededi eke ọbuọtde idem ye enye okûtak edi enyene nsinsi uwem.”—John 3:14-16.

Kere nte edidude uwem ke nsinsi, ubọhọ ufen, ukopke ubiak, unyụn̄ ufụhọke! (Ediyarade 21:3, 4) Ke akpanikọ, uwem eyenem etieti ini oro! Ataifiọk kiet ekesịn enye ntem: “Udi esiti nnyịn ke owo ekeme ndisọp mbe mfep, edi ediset ke n̄kpa anam itịm ifiọk ke n̄kpa ọmọn̄ ebebe efep.” Ih, Jesus ekeset ke n̄kpa man ikpodu uwem!