SAN̄A KPERE ABASI
“Ẹka Iso Ẹben̄e, Ndien Ẹyenọ Mbufo”
“Ọbọn̄, kpep nnyịn ndibọn̄ akam.” (Luke 11:1) Mbet kiet eketịn̄ ikọ emi ye Jesus. Jesus ama ọnọ uwụtn̄kpọ iba emi ẹkemede ndikpep nnyịn nte ẹkpebọn̄de akam man Abasi okop. Se Jesus eketịn̄de eyenem fi edieke edide emesikere m̀mê Abasi esikam okop akam fo.—Kot Luke 11:5-13.
Akpa uwụtn̄kpọ akaban̄a owo emi ọbọn̄de akam. (Luke 11:5-8) Enye ekenyene esenowo okoneyo usen oro ndien enye inyeneke udia inọ esenowo emi. N̄kpọ emi afịna enye etieti tutu enye adaha okoneyo oro aka ufọk ufan esie ọkọdọhọ enye ọbuọt imọ uyo ifan̄. Ufan esie emi ikamaha ndidaha nda sia enye ye ubon esie ẹma ẹdede. Enye n̄ko ikonyụn̄ imaha ndinyọn̄, edi aka iso ọkọn̄ usụn̄ tutu ufan esie adaha ada ọnọ enye se enye oyomde. *
Nso ke uwụtn̄kpọ emi ekpep nnyịn aban̄a akam? Jesus ọdọhọ nnyịn ikûkpa mba ndibọn̄ akam, edi yak ika iso iben̄e, ika iso iyom, inyụn̄ ika iso ikọn̄. (Luke 11:9, 10) Ntak-a? Ndi ikọ Jesus ọwọrọ ke Abasi isimaha ndisọp nyere akam nnyịn? Ihih. Edi ọwọrọ ke Abasi itiehe nte ufan nnyịn oro mîmaha ndisọp nnam n̄kpọ nnọ nnyịn, edi ke akam ọdọdọn̄ Abasi ndibọrọ akam oro ibọn̄de inọ enye ke mbuọtidem. Edieke iyịrede iben̄e Abasi n̄kpọ, oro owụt ke imenen̄ede iyom se iben̄ede, ke imonyụn̄ inịm ke Abasi ekeme ndinọ nnyịn edieke eben̄e nnyịn ekemde ye uduak esie.—Mark 11:24; 1 John 5:14.
Ọyọhọ uwụtn̄kpọ iba aban̄a Jehovah emi edide “Andikop akam.” (Psalm 65:2) Jesus okobụp ete: “Ewe ete odu ke otu mbufo eke edinọde eyen esie urụkikọt utu ke iyak ke ini eyen esie eben̄ede enye iyak? M̀mê edinọde eyen ikpeyen ke ini eyen eben̄ede enye nsenunen?” Idụhe ete emi akpanamde utọ n̄kpọ oro. Ekem Jesus anam uwụtn̄kpọ emi an̄wana ntem: Edieke mme ete emi mîfọnke ima ẹsinọde nditọ mmọ nti enọ, “adan̄a didie akan oro ke Ete mbufo ke heaven edinọ [nditọ esie] oro ẹben̄ede enye edisana spirit!” *—Luke 11:11-13; Matthew 7:11.
Akam ọdọdọn̄ Abasi ndibọrọ akam oro ibọn̄de inọ enye ke mbuọtidem
Nso ke uwụtn̄kpọ emi ekpep nnyịn aban̄a Jehovah, “Andikop akam”? Jesus oyom nnyịn idiọn̄ọ ke Jehovah edi edima Ete emi eben̄ede idem ndinam se nditọ esie ẹyomde. Ntem, ikọt Jehovah ẹkeme ndibọn̄ akam nnọ enye mben̄e se mmọ ẹyoyom. Sia mmọ ẹdiọn̄ọde ke enye enen̄ede ama mmimọ, mmọ ẹsinyịme nte enye ọbọrọde akam mmọ, kpa ye oro mîdibọrọke ndusụk ini nte mmọ ẹkedoride enyịn. *
Itie Bible emi okpokotde ke April
^ ikp. eki. 4 Jesus akada se ikesitịbede ini oro ọnọ uwụtn̄kpọ. Mme Jew ẹkesida ukama esenowo nte ata akpan n̄kpọ. Ubon ẹkesisan̄ uyo emi mmọ ẹditade usen oro, ntre, owo ama esika ọkọbuọt owo uyo edieke esie okụrede. N̄ko-n̄ko, ubon oro mînyeneke n̄kpọ ẹkesina ntre ke ubet kiet.
^ ikp. eki. 6 Ke ini Jesus oyomde ndimen n̄kpọ kiet ndomo ye en̄wen, enye ama esiwak ndidọhọ “adan̄a didie akan oro.” Ata ekpep n̄kpọ mban̄a Bible ọdọhọ ete: “Ikọ esie emi okonyụn̄ etie nte ndidọhọ ke ‘edieke n̄kpọ kiet ọfọnde, ọwọrọ ke enye eken akam ọfọn akan oro.’”
^ ikp. eki. 7 Edieke oyomde ndifiọk nte ọkpọbọn̄de akam man Abasi okop, mbọk kot ibuot 17 ke n̄wed Nso ke Bible Enen̄ede Ekpep? emi Mme Ntiense Jehovah ẹsiode.
