Michelle: Nnenne eyeneka. Afo do? Esịt enem mi ndifiak n̄kụt fi.

Sophia: Enem mi nde.

Michelle: Akpa ini emi ikosobode, ima ineme ke ufen emi ibọde esifịna Abasi. * Afo ama ọdọhọ ke imọ idiọn̄ọke m̀mê Abasi do akpan akpan tọn̄ọ moto ọkọtọ eka fo. Mbọk ndikam mfre, idem esie etie didie?

Sophia: Ndusụk ini, ukot oro esinen̄ede abiak enye, edi ibiakke mfịn.

Michelle: Enem mi ndidiọn̄ọ ke ibiakke enye mfịn. Isimemke utom ke ini utọ n̄kpọ emi ọwọrọde owo.

Sophia: Idịghe ekpri n̄kpọ eyeneka mi. Mmesikere m̀mê enye edibọ ufen emi ebịghi didie.

Michelle: Idụhe owo emi mîkpekereke ntre. Emeti mbụme emi n̄kobụpde fi mbemiso nnyọn̄de isan̄ oko? N̄kobụp m̀mê nsidi ntak emi Abasi ayakde mme owo ẹbọ ufen, kpa ye oro enye ekemede nditre ufen emi.

Sophia: Ntre ke edi.

Michelle: Yak mfiak nti fi ndusụk n̄kpọ oro ikenemede usen oro. Ima ikụre ndien nnyịn ise nte Bible ọbọrọde mbụme oro.

Sophia: Ọfọn.

Michelle: Ima ineme ke ata ikọt Abasi ke Bible ẹma ẹnyụn̄ ẹbụp se inamde Abasi ayak mme owo ẹbọ ufen. Edi akanam Abasi itọhọke ye mmọ, inyụn̄ idọhọke ke mmọ inyeneke mbuọtidem.

Sophia: Akananam n̄kopke ke ẹbụp utọ mbụme oro ke Bible mîdịghe okonyụn̄ okotde usen oro ọnọ mi.

Michelle: Ima inyụn̄ ineme ke Jehovah Abasi isinemke esịt ndikụt nnyịn ibọde ufen. Ke uwụtn̄kpọ, Bible ọdọhọ ke ofụri ufen emi ikọt Abasi ẹkebọde “ama abiak enye.” * Ndi inemke fi ndikop ke esibiak Abasi ke ini mme owo ẹbọde ufen?

Sophia: Enem.

Michelle: Ima idọhọ n̄ko ke akwa odudu emi Abasi enyenede owụt ke enye ekeme nditre ufen emi ibọde mi ini ekededi.

Sophia: Itie emi mîn̄wan̄ake mi edi oro. Nso inam Abasi ayak mme owo ẹbọ ufen ntem ke ini edide enye enyene odudu nditre kpukpru ufen emi?

Michelle: Yak ikụbọde ika n̄wed Genesis ikese nte Bible ọbọrọde mbụme fo emi. Mmekere ke ọmọdiọn̄ọ mbụk Adam ye Eve ye eto ifiọk eti ye idiọk.

 Sophia: Abasi mbọk, n̄kekpep ke ufọkabasi nnyịn toto ke ini eyenọwọn̄! Abasi ọkọdọhọ mmọ ẹkûdia mfri eto oro, edi mmọ ẹsọn̄ ibuot ẹdia.

Michelle: Afo emenen. Idahaemi, yak ise se ikanamde Adam ye Eve ẹsọn̄ ibuot ye Abasi. Oro ayanam ifiọk ntak emi ibọde ofụri ufen emi. Mbọk kụbọde ka Genesis ibuot 3 ufan̄ikọ 1 esịm 5, nyụn̄ kot ise.

Sophia: Itien̄wed oro ọdọhọ ete: “Ndien urụkikọt enyene mbufiọk akan kpukpru unam ikọt emi Jehovah Abasi akanamde. Ekem enye obụp n̄wan oro ete: ‘Nte enen̄ede edi akpanikọ ke Abasi ọkọdọhọ mbufo ẹkûdia kpukpru eto ke in̄wan̄ emi?’ Ntem n̄wan oro ọbọrọ urụkikọt oro ete: ‘Nnyịn imekeme ndidia mme mfri eto in̄wan̄ emi. Edi amaedi mfri eto emi odude ke ufọt in̄wan̄, Abasi ọkọdọhọ ete, “Mbufo ẹkûdia enye, ẹkûnyụn̄ ẹtụk enye, mbak ẹdikpan̄a.’” Ntem urụkikọt oro ọdọhọ n̄wan oro ete: ‘Mbufo idikpaha n̄kpa. Koro Abasi ọmọfiọk ete ke usen eke mbufo ẹdidiade, enyịn mbufo ẹyetara, mbufo ẹyenyụn̄ ẹtie nte Abasi, ẹfiọk eti ye idiọk.’”

Michelle: Sọsọn̄ọ etieti eyeneka mi. Yak ineme itien̄wed emi esisịt ise. Akpa, omokụt ke urụkikọt eketịn̄ kpukpru emi ye Eve. Itie en̄wen ke Bible owụt ke Satan akanam urụkikọt emi etịn̄ ikọ. * Satan ọkọdọhọ Eve ke mmọ idikpaha edieke mmọ ẹdiade eto ifiọk eti ye idiọk. Edi Abasi okọdọhọ mmọ didie?

Sophia: Abasi ọkọdọhọ ke mmọ ẹyekpa edieke mmọ ẹdiade eto oro.

Michelle: Nnennen. Edi Satan ọkọdọhọ ete: “Mbufo idikpaha.” Omokụt do ke ikọ Satan ọkọwọrọ ke Abasi edi osu nsu.

Sophia: Ọmọdiọn̄ọ akanam n̄kereke-kere n̄kpọ n̄ka n̄kan̄ oro!

Michelle: Utọ ikọ oro ikedịghe n̄kpọ emi ẹdade usen kiet ẹbiere. Ọmọdiọn̄ọ ntak?

Sophia: Ndiọn̄ọke-o.

Michelle: Ọfọn, yak nnọ fi uwụtn̄kpọ ise. Edieke n̄kpọdọhọde ke mmenyene odudu n̄kan fi, nso ke akpanam?

Sophia: N̄kpọdọhọ anam idomo ise.

Michelle: Nnennen. Isọn̄ke ndidiọn̄ọ owo emi enyenede odudu. Ntre ekeme ndidi ọkpọdọhọ yak ikemen ekpat simen ita ita ise man ifiọk owo emi enyenede odudu akan.

Sophia: Ntre ke edi.

Michelle: Edi edieke n̄kpọdọhọde ke afo emesisu nsu akaha, ke ami nsikam ntịn̄ akpanikọ, ndi ekpemem utom ndisọsọp ndiọn̄ọ m̀mê anie etịn̄ akpanikọ?

Sophia: Ihih.

Michelle: Emenen. Utọ ikọ emi ikpedịghe n̄kpọ emi ẹdade usen kiet ẹbiere. N̄kukụre usụn̄ ndibiere n̄kpọ emi ekpedi ndiyak ediwak ọfiọn̄ m̀mê isua ẹbe man kpukpru owo ẹkụt m̀mê anie esitịn̄ akpanikọ.

Sophia: Ọmọdiọn̄ọ akpanikọ-o.

Michelle: Yak ifiak ise Genesis oro ise. Ndi Satan ọkọdọhọ ke imenyene odudu ikan Abasi?

Sophia: Ihih.

Michelle: Edieke Satan ọkpọkọdọhọde ke imenyene odudu ikan Abasi, Abasi ikpakabiatke ini ndiwụt enye ye ofụri ererimbot ke imọ inyene odudu ikan. Edi enye ọkọdọhọ Eve ke Abasi osu nsu, ke imọ isikam itịn̄ akpanikọ.

Sophia: Ata usọn̄enyịn ke enye ọkọsọn̄ọ Abasi oro!

Michelle: Abasi ama ọdiọn̄ọ ke utọ ikọ oro idịghe n̄kpọ emi ẹdade usen kiet ẹbiere, ke ana ẹyak ediwak isua ẹbe man kpukpru owo ẹkụt m̀mê se Satan eketịn̄de edi akpanikọ.

Sophia: Edi ke Eve ama akakpa, ndi mme owo ikekwe ke Abasi eketịn̄ akpanikọ?

Michelle: Ẹma ẹkụt. Edi enyene n̄kpọ en̄wen  emi Satan ọkọdọhọde Eve. Fiak se ufan̄ikọ 5 ke ọmọn̄ okụt.

Sophia: Enye ọkọdọhọ ke Eve ama adia mfri eto oro, ke enyịn esie ayatara.

Michelle: N̄ko ke mmọ “ẹyenyụn̄ ẹtie nte Abasi, ẹfiọk eti ye idiọk.” Ikọ Satan ọkọwọrọ ke Abasi iyomke n̄kpọ ọfọn owo.

Sophia: Mbọk omokop!

Michelle: Ata idiọk ikọ ekedi oro.

Sophia: Itịmke in̄wan̄a mi.

Michelle: Ikọ Satan ọkọwọrọ ke Eve ye kpukpru nnyịn imekeme nditie nte Abasi, ndien ke ufọn Abasi idụhe. Jehovah ama ọfiọk ke mfọnn̄kan usụn̄ ndibiere n̄kpọ emi edi ndinọ Satan ini man enye owụt m̀mê imọ iketịn̄ akpanikọ. Ntre, Abasi ama ayak Satan akara ererimbot emi. Ntak edi oro ibọde ufen ntem sia Satan akara idahaemi, edi ukara esie ọmọn̄ okokụre. * Edi enyene n̄kpọ en̄wen emi Bible etịn̄de, emi edinemde fi etieti.

Sophia: Mbọk m̀mê nso ikpedi oro?

Michelle: Bible etịn̄ nte esitiede Abasi ke idem ke ini n̄kpọ anamde nnyịn. Akpa, Jehovah isikpọn̄ke nnyịn ke ini ukụt. Ke uwụtn̄kpọ, se se Edidem David ekewetde ke Psalm 31:7. David ama okụt ediwak ukụt, edi kop akam oro enye ọkọbọn̄de ọnọ Abasi mi. Mbọk kot itie oro ise.

Sophia: Itie oro ọdọhọ ete: “Ami nyadara nnyụn̄ ndat esịt ke ima-mfọnido fo, koro afo omokụt ukụt mi; afo ọmọfiọk nnanenyịn ukpọn̄ mi.”

Michelle: Kpa ye oro David okokụtde ukụt, enye ama ọdiọn̄ọ ke Jehovah okụt kpukpru se iwọrọde imọ, ndien emi ama ọsọn̄ọ enye idem. Ndi inemke fi ndifiọk nte ke Jehovah okụt ofụri ufen emi ibọde, ọkpọkọm mme owo nte nnyịn ikwe?

Sophia: Enem mi etieti.

Michelle: N̄kpọ en̄wen emi Bible ekpepde edi nte ke Abasi idiyakke nnyịn ibọ ufen ke nsinsi. Bible ọdọhọ ke Abasi ọmọn̄ ọsọsọp etre ukara Satan emi anamde ukụt esịm nnyịn. Ndien ke enye eyetre kpukpru idiọkn̄kpọ ye ukụt, utọ nte enye emi esịmde fi ye eka fo. Nyedi urua en̄wen man ndiwụt se inamde nnyịn inen̄ede inịm ke Abasi ọmọn̄ etre ofụri ufen emi ibọde mi. *

Sophia: Ọfọn, ekem afo afiak edi nan̄a.