KE NDONDO emi, enyene ibuotikọ kiet emi ediwak owo ẹkeyomde ndikot ke n̄wedmbụk n̄kpọntịbe Korea emi ẹkotde The Chosun Ilbo. Ibuotikọ oro ekedi: “Ndi ‘Edima Shim Cheong,’ Emi Mîkọfiọkke N̄kpọ Ndomokiet Iban̄a Jesus Akaka Hell?”

Ibuotikọ oro ama ayat ediwak owo esịt, koro mbụk mbon Korea kiet owụt ke Shim Cheong ekedi eti eyenan̄wan emi akadade ofụri uwem esie ese aban̄a ete esie emi ekedide nnan. Ata ediwak isua ẹbe idahaemi, edi mme owo ẹsụk ẹtotoro enye. Ke Korea, ẹda enye nte eti eyenan̄wan emi anade nditọ eken ẹkpebe.

Ndusụk owo ẹkere ke sia eyenan̄wan emi mîkanaha baptism nte Christian, ke enye ke ọbọ ufen ke hell. Edi, ediwak owo ẹyat esịt etieti ẹnyụn̄ ẹdọhọ ke emi ekpedi ibak. Ẹdọhọ ke eyenan̄wan emi ama akpakpa anyan ini mbemiso ẹdade ukwọrọikọ Christ ẹka obio mmọ.

N̄wedmbụk n̄kpọntịbe oro ama esịne ndụn̄ọde emi ẹkenamde ye ọkwọrọikọ ufọkabasi. Ẹma ẹbụp enye m̀mê mbon emi mîkọfiọkke n̄kpọ ndomokiet iban̄a Jesus ini mmọ ẹkedude uwem ẹka hell. Enye ama ọdọhọ ete: “Nnyịn idiọn̄ọke. Edi imekere ke Abasi ọdiọn̄ọ se enye edinamde ye [mmọ].”

Catechism Ufok Abasi Catholic ọdọhọ ete: “Owo enyene ndibọ baptism man ọbọhọ. Koro Christ ama ọdọhọ ete: ‘Ibọhọke owo ọtọn̄ọ ntak amana ke mmọn̄ ye edisana spirit, enye ikemeke ndidụk ke ubọn̄ Obio Abasi.’” Emi anam ndusụk owo ẹnịm ke ẹsitop owo emi akpade ke ini mînaha baptism ẹsịn ke hell mîdịghe ẹnọ enye ufen en̄wen.

Edi ediwak owo ẹdọhọ ke ndinam utọ n̄kpọ oro ekpedi ndisịme. Ata ediwak owo ẹkpan̄a emi mîkọfiọkke n̄kpọ ndomokiet iban̄a Bible. Ndi ọkpọfọn ẹtụhọde mmọ ke nsinsi? Bible ọdọhọ didie?

Bible owụt nte Abasi esede mbon oro mîkọfiọkke n̄kpọ ndomokiet iban̄a enye mbemiso ẹkpade. Utom 17:30 ọdọhọ ete: “Abasi ofụmi utọ ini unana ifiọk oro.” Bible ọdọhọ ke nso iditịbe inọ mbon emi mîkokopke n̄kpọ ndomokiet iban̄a Abasi mbemiso ẹkpade?

Ibọrọ odu ke se Jesus eketịn̄de ọnọ abiatibet emi ọkọkọn̄ọde ke eto ye enye. Abiatibet oro ama eben̄e Jesus ete: “Ti mi ke ini afo odụkde obio ubọn̄ fo.” Jesus ama ọdọhọ enye ete: “Ke akpanikọ ke ndọhọ fi mfịn emi, afo oyodu ye ami ke Paradise.”—Luke 23:39-43.

Ndi ikọ Jesus ọkọwọrọ ke ete oro edika heaven? Ihih, sia Bible ọdọhọ ke mbemiso owo aka heaven, ke ana enye “ọtọn̄ọ ntak amana” oto ke mmọn̄ ye spirit. (John 3:3-6) Abiatibet oro ikanamke emi. Ntre, ikọ Jesus ọkọwọrọ ke enye oyodu ke Paradise. Sia abiatibet emi ekedide Jew, eyedi enye ama ọfọfiọk aban̄a paradise emi okodude ke In̄wan̄ Eden. Paradise emi ke ẹtịn̄ ẹban̄a ke akpa n̄wed Bible. (Genesis 2:8) Ikọ Jesus ama anam enye odori enyịn ke ẹyenam imọ iset ke ini isọn̄ edifiakde idi Paradise.

Bible ọdọhọ ke “ndinen owo ye mme anam ukwan̄n̄kpọ ẹyeset ke n̄kpa.” (Utom 24:15) “Mme anam ukwan̄n̄kpọ” ẹdi mbon emi mîkanamke se Abasi amade sia mmọ ikọfiọkke n̄kpọ ndomokiet iban̄a enye mbemiso ẹkpade. Jesus ayanam abiatibet oro ye ata ediwak mbon en̄wen emi mîkonyụn̄ ifiọkke n̄kpọ ndomokiet iban̄a Abasi, ẹset. Ke Paradise ke ẹdikpep mmọ se Abasi amade, ndien mmọ ẹyenyene ifet ndiwụt ke imama Abasi ke ndinịm mme ewụhọ esie.

Ke ini ẹdinamde mme anam ukwan̄n̄kpọ ẹset, ndi ẹdida se mmọ ẹkenamde mbemiso ẹkpade ẹkpe ikpe ẹnọ mmọ? Ihih, sia Rome 6:7 ọdọhọ ke “ikpe idiọkn̄kpọ etebe owo emi ama akakpa.” Ọwọrọ mme anam ukwan̄n̄kpọ ẹkpe utịp idiọkn̄kpọ mmọ ke ini ẹkpade. Ntre, ẹdida se mmọ ẹdinamde ke mmọ ẹma ẹset ẹkpe ikpe ẹnọ mmọ, idịghe se mmọ ẹkenamde mbemiso mmọ ẹkpan̄a. Nso ufọn ke mmọ ẹdibọ?

Ke ini ẹdinamde mme anam ukwan̄n̄kpọ ẹset, mmọ ẹyenyene ifet ndikpep ibet Abasi emi ẹdikụtde ke ini ẹkụbọrede mme n̄wed oro ẹtịn̄de ẹban̄a ke Ediyarade. Ẹdida se mmọ ẹnamde ini oro, edide eti m̀mê idiọk, ikpe ikpe inọ mmọ. (Ediyarade 20:12, 13) Akpa ini edidi emi ata ediwak mmọ ẹdinyenede ifet ikpep iban̄a Abasi inyụn̄ inịm mbet esie man ẹdu uwem ke nsinsi.

Se Bible ekpepde emi an̄wam ediwak owo ẹfiak ẹnyene mbuọtidem ke Abasi. Owo kiet ke otu mmọ edi Yeong Sug. Enye okokpon ke Catholic. Ndusụk owo ke ubon mmọ ẹkedi mme oku. Enye ama etiene okodụn̄ ye mme nun, sia enye okoyom ndidi nun. Edi nte ini akakade, se enye okokụtde do ama anam odorode enye ndidi nun. N̄kpọ en̄wen edi ke enye ikamaha ukpepn̄kpọ emi ẹdọhọde ke ẹsitụhọde owo ke hell, sia enye ekekere ke ndinam ntre ikpenenke ikponyụn̄ iwụtke ima.

Ekem, owo kiet ke otu Mme Ntiense Jehovah ama owụt enye se Bible etịn̄de ke Ecclesiastes 9:5. Itien̄wed oro ọdọhọ ke ‘mme odu-uwem ẹfiọk ẹte ke mmimọ iyakpa; edi amaedi mme akpan̄kpa, mmọ ifiọkke baba n̄kpọ kiet, mmọ inyụn̄ inyeneke aba utịp.’ Ntiense oro ama an̄wam enye ọfiọk ke owo itụhọkede mme ete ete esie ke hell; ke n̄kpa etie nte idap, ndien ke ẹyenam mmọ ẹset.

Sia Yeong Sug ọkọdiọn̄ọde ke ata ediwak owo ifiọkke se imọ ifiọkde emi, enye ama anam ikọ Jesus emi odude ke Matthew 24:14, emi ọdọhọde ke “ẹyenyụn̄ ẹkwọrọ eti mbụk obio ubọn̄ emi ke ofụri isọn̄ nte ntiense ẹnọ kpukpru mme idụt; ndien adan̄aoro ke utịt edidi.” Yeong Sug esitiene ọkwọrọ eti mbụk ọnọ mme owo onyụn̄ anam mmọ ẹfiọk se enye ekpepde ke Bible aban̄a se Abasi edinamde.

Bible anam nnyịn ifiọk ke “Abasi inamke asari, edi ke kpukpru idụt enye enyenyịme owo eke abakde enye onyụn̄ anamde edinen ido.” (Utom 10:34, 35) Idụhe eke mîmaha Abasi emi ‘amade edinen ido ye unenikpe’ ntem.—Psalm 33:5.