Janet ọdọhọ ete: “Esisịt ini ke ete mi ama akakpa, ebe mi ama ọdọhọ ke enyene n̄wan en̄wen emi imọ imade. Ikebịghike, enye ama atan̄ ọfọn̄ esie ọwọrọ ọkpọn̄ mi ye nditọ iba, itịn̄ke inọ mi.” Janet ama okụt utom, edi okụk emi ẹkekpede enye ikokponke ikem ndida n̄kpe okụk ufọk mmọ. Edi idịghe okụk kpọt ekedi mfịna esie. Enye ọdọhọ ete: “Ke ini n̄ketiede n̄kere ofụri se anade nnam man nse mban̄a nditọ mi, enyịn ama anan mi. Esịt ama esimia mi ufen nte mmen̄kekemeke ndise mban̄a nditọ mi nte mbon en̄wen ẹsede ẹban̄a nditọ mmọ. Ndien idem idahaemi, mmesikere nte mbon en̄wen ẹsede mi ye nditọ mi. Mmesikere m̀mê mmọ ẹkam ẹkere ke ido mi akanam ebe mi ọkpọn̄ mi.”

Akam an̄wam Janet aka iso edi ufan Abasi okûnyụn̄ unen̄ede utịmede esịt. Enye ọdọhọ ete: “Okoneyo esisọn̄ mi akan sia kpukpru ebiet ẹsidobo nte udi, ndien ntaha ntaha ekikere esidụk mi ibuot. Ndibọn̄ akam nnyụn̄ n̄kot Bible esinam n̄keme ndide idap. Kiet ke otu itien̄wed emi mmade n̄kan edi Philippi 4:6, 7. Enye ọdọhọ ete: ‘Ẹkûtịmede esịt ke baba n̄kpọ kiet, edi ke kpukpru n̄kpọ ẹda akam ye n̄kpeubọk ọkọrọ ye ekọm ẹben̄e Abasi se mbufo ẹyomde; ndien emem Abasi emi akande kpukpru ekikere eyekpeme mbufo esịt ye ekikere.’ Mmesida ini mbọn̄ akam ediwak okoneyo ndien Jehovah esinam esịt ana mi sụn̄.”

Se Jesus eketịn̄de aban̄a akam ke ukwọrọikọ esie ke obot ekeme ndinam ikan kpukpru orụk editịmede esịt. Enye ọkọdọhọ ete: “Ete mbufo ọfiọk mme n̄kpọ emi mbufo ẹyomde idem mbemiso mbufo ẹben̄ede enye.” (Matthew 6:8) Edi ana iben̄e enye. Akam edi akpan usụn̄ emi ikemede ‘ndisan̄a n̄kpere Abasi.’ Emi ayanam ‘Abasi asan̄a ekpere’ nnyịn n̄ko.—James 4:8.

Edi ufọn akam ikụreke ke oro. Jehovah emi edide “Andikop akam” esinyụn̄ an̄wam kpukpru mbon oro ẹsemede ẹkot enye ye mbuọtidem. (Psalm  65:2) Ntak edi oro Jesus ọkọdọhọde mme mbet esie “ẹbọn̄ akam kpukpru ini, ẹkûnyụn̄ ẹkpa mba.” (Luke 18:1) Ana nnyịn isidọhọ Abasi ada nnyịn usụn̄ onyụn̄ an̄wam nnyịn, inyụn̄ inịm ke enye ọyọbọrọ akam nnyịn. Inaha iyịk m̀mê enye ayama ndikop akam nnyịn mîdịghe m̀mê enye akam ekeme ndinam se iben̄ede. Edieke isibọn̄de akam kpukpru ini ntem, ọwọrọ nnyịn imenen̄ede ibuọt idem ke Abasi.—1 Thessalonica 5:17.

Nso ke ndinyene mbuọtidem ọwọrọ? Kiet ke otu n̄kpọ emi anade owo anam man enyene mbuọtidem edi ndidiọn̄ọ Abasi. (John 17:3) Ndien akpa n̄kpọ emi anade inam man idiọn̄ọ Abasi edi ndikpep Ikọ esie, oro edi, Bible. Bible ọdọhọ ke Abasi okụt nnyịn owo kiet kiet onyụn̄ oyom ndin̄wam nnyịn. Edi ndibuọt idem ye Abasi ikụreke ke owo ndidiọn̄ọ n̄kpọ mban̄a Abasi. N̄kpọ en̄wen emi anade inam man inyene mbuọtidem edi ndidi ufan Abasi nnyụn̄ n̄kpono enye. Imọfiọk ke ufan idịghe n̄kpọ usen kiet. Ntre, nte ikpepde n̄kpọ iban̄a Abasi, inamde se inemde enye esịt, inyụn̄ ikụtde nte enye an̄wamde nnyịn, iyọdọdiọn̄ inyene mbuọtidem inyụn̄ inen̄ede idi ufan esie. (2 Corinth 10:15; John 8:29) Utọ mbuọtidem emi akanam Janet okûnen̄ede etịmede esịt.

Janet ọdọhọ ete: “Se inamde ndọdiọn̄ nnyene mbuọtidem edi ndikụt nte Jehovah an̄wamde nnyịn kpukpru usen. Ediwak ini, ima isisobo mfịna emi etiede nte nnyịn idikemeke ndiyọ. Ima isibọn̄ akam etieti ndien Jehovah ama esin̄wam nnyịn ke usụn̄ emi mmen̄kekereke. Ke ini n̄kọmde enye, mmesiti ediwak n̄kpọ emi enye anamde ọnọ nnyịn. Enye esin̄wam nnyịn ke ata nnennen ini. Enye anam nnyene mme ufan emi ẹdide ata mme Christian. Mmọ ẹsin̄wam mi kpukpru ini ẹnyụn̄ ẹnịm nti uwụtn̄kpọ ẹnọ nditọ mi.” *

“Mmọdiọn̄ọ ntak emi Jehovah ọdọhọde ke Malachi 2:16 ete ke imọ isasua usiondọ. Idụhe se isibiakde owo nte n̄wan m̀mê ebe esie ndiwọrọ ndọ ke unana ntak. Ediwak isua ẹbe idahaemi tọn̄ọ ebe mi ọkọkpọn̄ mi, edi ndusụk ini nsisụk n̄kokop ndobo, esinyụn̄ etie nte n̄wọrọke n̄kpọ. Utọ ini ntem ke nsiyom n̄kpọ nnam nnọ mme owo, ndien emi esin̄wam mi n̄ko.” Ndidian idem ye mme owo nte Bible etemede anam Janet okûnen̄ede etịmede esịt. *—Mme N̄ke 18:1.

Janet ọdọhọ ete: “Ndifiọk ke Abasi edi ‘Ete nditọakpa ye ebiereikpe mme ebeakpa’ esinam nnen̄ede n̄kop ndọn̄esịt. Tutu amama enye idikpọn̄ke nnyịn nte ebe mi ọkọkpọn̄de nnyịn.” (Psalm 68:5) Janet ọdiọn̄ọ ke Abasi “ikemeke ndida idiọkn̄kpọ” ndomo owo. Utu ke oro, enye esinọ kpukpru owo ọniọn̄ “ke ntatubọk” onyụn̄ ọnọ nnyịn “odudu eke ebede ukeme owo” man ikûnen̄ede itịmede esịt.—James 1:5, 13; 2 Corinth 4:7.

Edi nso ke ikpanam edieke n̄kpọndịk anamde esịt etịmede nnyịn?