Nnyịn idi esop emi ẹdianade kiet ke ofụri ererimbot ẹkpono Abasi, edi nnyịn isan̄ake n̄kpọ ye mme ufọkabasi eken. Okposụkedi emi ibuot itieutom nnyịn odude ke United States, ata ediwak Mme Ntiense Jehovah ẹdu ke nsio nsio idụt. Nnyịn imawak ibe miliọn itiaita ke ofụri ererimbot, ndien idụt emi ikwọrọde ikọ ebe 230. Nnyịn isikpep mme owo Bible sia Jesus ọkọdọhọ ete: “[Ẹyekwọrọ] eti mbụk obio ubọn̄ emi ke ofụri isọn̄ nte ntiense ẹnọ kpukpru mme idụt.”—Matthew 24:14.

Inamke n̄kpọ m̀mê idụn̄ ke m̀mọ̀n̄, nnyịn imesinịm ibet ukara. Edi nnyịn isisịnke idem ke mbubehe ukara sia Jesus ọkọdọhọ ke mme Christian ‘idịghe ubak ererimbot.’ Ntem nnyịn isinemeke pọlitiks inyụn̄ isịnke idem ke mme n̄kpọ ntre. Nnyịn isinyụn̄ itieneke in̄wana ekọn̄. (John 15:19; 17:16) Ke uwụtn̄kpọ, ke ini ọyọhọ ekọn̄ ererimbot iba, ẹma ẹkọbi Mme Ntiense Jehovah, ẹtụhọde mmọ, ẹnyụn̄ ẹwot ndusụk mmọ sia mmọ mîketieneke in̄wana ekọn̄. Bishop kiet ke Germany ekewet ete: “Mmọ kpọt ẹkeme ndidọhọ ke mmimọ ikan̄wanake ekọn̄ ikonyụn̄ inamke utom ekọn̄ ke ntak Ikọ Abasi ke ini ukara Hitler.”

Edi nnyịn idian̄akede itie ke idem nnyịn. Anaedi emesikụt nnyịn itienede inam utom, ika urua, ye ufọkn̄wed. Onyụn̄ edi nte Jesus eketịn̄de ke akam oro enye ọkọbọn̄de ọnọ Abasi aban̄a mme mbet esie, ete: “Mben̄eke nte osio mmọ ke ererimbot.”—John 17:15.