Ibuot 24

Ndi Ndinam Idan̄ Ayanam Inen̄ede Ima Idem Nnyịn?

Ọfiọn̄ iba kpọt edi emi tọn̄ọ Heather okosobo ye Mike, edi etie enye ke idem nte mmọ ẹkemana usen kiet. Mmọ ẹsinọ kiet eken etop ndien ndien, ẹsitịn̄ ikọ ẹbịghi ke telefon, owo kiet etitetịn̄ ikọ ikụre enye eken ọfọfiọk se enye editịn̄de. Edi idahaemi, nte mmọ ẹsịnede ke ubomisọn̄ ke eyo ama ọkọtọn̄ọ ndifụk owo idem, idịghe nneme kpọt ke Mike oyom.

Ke ufan̄ ọfiọn̄ iba emi ẹbede, Mike ye Heather ẹsimụm kiet eken ubọk ẹnyụn̄ ẹtịm kiet eken inua ke esisịt ini. Heather iyomke ndika anyan n̄kan oro. Edi enye iyomke Mike ọkpọn̄ imọ. Idụhe owo emi esinamde enye okop inem uwem nte Mike. Enye esiwak ndikere ete: ‘Ami ye Mike imama idem nnyịn nan̄a . . . ’

 EKEME ndidi ọmọfiọk se mmọ ẹtade ẹka oro. Edi anaedi ufiọkke se iditịbede inọ Mike ye Heather edieke mmọ ẹnamde idan̄—edi idịghe eti n̄kpọ editịbe. Kere ban̄a se itienede mi:

Edieke abiatde oto-obot ibet, utọ nte ibet oro akarade odudu emi odụride n̄kpọ aka isọn̄, udutreke-tre ndibọ ufen. Ukem oro ke edi ye ndibiat ibet ido uwem utọ nte enye oro ọdọhọde ete: “Ẹbet use.” (1 Thessalonica 4:3) Nso ndiọi utịp ke owo edibọ edieke enye abiatde ibet emi? Bible ọdọhọ ete: “Owo eke akade iso anam use anam idiọkn̄kpọ edue idem esie.” (1 Corinth 6:18) Didie ke oro edi akpanikọ? Se ise m̀mê emekeme ndiwet ndiọi utịp ita emi mbon oro ẹnamde idan̄ mbemiso ẹdọde ndọ ẹsinyenede ke page oro etienede.

1 ․․․․․

2 ․․․․․

3 ․․․․․

Fiak se se ewetde. Ndi ama ewet utọ n̄kpọ nte udọn̄ọ emi ẹmende ẹto idan̄, uyomo idịbi oro owo mîyomke, m̀mê editaba mfọn Abasi? Ke akpanikọ, mme n̄kpọ emi ẹdi ndiọi utịp oro ẹdisịmde owo ekededi emi abiatde ibet emi Abasi enịmde ete ẹbet use.

Edi emekeme ndikere ke akpana etiene anam. Omonyụn̄ ekeme ndikere ke n̄kpọ ndomokiet iditịbeke inọ fi. Idem n̄kpọ, n̄kọ kpukpru owo ke ẹnam idan̄. Nditọ ufọkn̄wed mbufo ke ẹnam inua ẹban̄a nte mmimọ isinamde idan̄, afo omonyụn̄ okụt ke etie nte inyeneke se inamde mmọ. Ukem nte Heather, ekeme ndidi afo ekere ke ndinam idan̄ ayanam mbufo ẹnen̄ede ẹma idem mbufo. Kamse, idụhe owo emi oyomde ẹsak enye sia akananam enye mînamke idan̄. Ndi ikpakam ifọnke nditiene nnam?

Kûsọsọp udọhọ ntre! Akpa kan̄a, idịghe kpukpru owo ẹnam. Edi akpanikọ ke emekeme ndikot n̄wed emi owụtde ke ata ediwak uyen ke ẹnam idan̄. Ke uwụtn̄kpọ, ndụn̄ọde oro ẹkenamde ke United States ama owụt ke owo iba ke otu owo ita ẹsinam idan̄ mbemiso ẹkụrede ufọkn̄wed sekọndri. Edi ndụn̄ọde oro n̄ko owụt ke owo kiet ke otu owo ita—ata ediwak owo—isinamke idan̄. Edi nso kaban̄a mbon oro ẹsinamde? Mme anam-ndụn̄ọde ẹdọhọ ke ediwak uyen emi ẹsinamde idan̄ ẹsisobo ndiọi utịp oro ẹtienede mi.

IDIỌK UTỊP 1 N̄KPỌFIỌK. Ata ediwak uyen emi ẹsinamde idan̄ mbemiso ẹdọde ndọ ẹsidọhọ ke ukperedem ke ekpedi ima ifiọk mmimọ ikpakanamke.

IDIỌK UTỊP 2 EYỊGHE. Ke eren ye n̄wan ẹma ẹkenam idan̄  ẹma, owo mmọ kiet kiet esitọn̄ọ ndikere, ‘Okûdi enyene owo en̄wen oro ufan emi esinamde idan̄?’

IDIỌK UTỊP 3 ABIAN̄A. Ke isọn̄ esịt mmọ, ediwak nditọiban ẹkpema ndinam ufan ye eren emi edikpemede-kpeme mmọ, idịghe enye oro edidade mmọ oyụhọ idiọk udọn̄ esie. Ke ẹma ẹkenam idan̄ ẹma, ediwak iren isinen̄ekede ima aba eyenan̄wan emi ekenyịmede ndinam idan̄ ye mmọ.

Ke adianade ye se inemede emi, ediwak n̄kparawa ẹdọhọ ke mmimọ ikemeke-keme ndidọ eyenan̄wan emi mmimọ ikadan̄de. Ntak-a? Koro mmọ ẹma eyenan̄wan emi omụmde idem akama.

Edieke afo edide eyenan̄wan, oro ekeme ndikpa fi idem m̀mê ndikam nyat fi esịt. Edi ti ete: Se isitịbede inọ mbon oro mîdọhọ ndọ edi ẹsinamde idan̄ esinen̄ede okpụhọde ye se ẹsiwụtde ke fim ye TV. Mme edinam TV, fim, ye mme n̄wed ẹsiwak nditotoro idan̄ emi n̄kparawa owo ẹnamde, ẹnam etie nte ke mmọ ẹdia uwem m̀mê nte ke akam edi ata ima. Edi kûyak ẹbian̄a fi! Mbon oro ẹdomode ndikpek fi ẹte anam idan̄ ke ini mûdọhọ ndọ ẹyom ufọn idemmọ. (1 Corinth 13:4, 5) Kere ise, ndi owo emi enen̄erede ama fi ayanam n̄kpọ emi edibiakde edinyụn̄ afịnade fi? (Mme N̄ke 5:3, 4) N̄ko, ndi owo emi enen̄erede ama fi okpodomo ndinam abiat itie ebuana fo ye Abasi?—Mme Hebrew 13:4.

Edieke edide akparawa emi  enyenede eyenan̄wan oro oyomde ndidọ, akpana se ẹnemede ke ibuotikọ emi anam fi etịm ekere nte mbufo mbiba ẹsinamde n̄kpọ. Bụp idemfo, ‘Ndi mmenen̄ede mma eyenan̄wan emi?’ Edieke ọbọrọde ih, didie ke ekeme ndiwụt ke amama enye? Ana enyene ukeme ndinam se Abasi etemede, enyene ọniọn̄ ndifep mme idaha oro ẹkemede ndinam mbufo ẹnam idiọkn̄kpọ, onyụn̄ enyene ima emi edinamde oyom ufọn esie. Edieke enyenede mme edu emi, anaedi editie eyenan̄wan emi oyomde ndidọ nte eketiede eti eyenan̄wan Shulam emi ọkọdọhọde ete: “Ama mi edi okịmmọ ami nnyụn̄ ndi esiemmọ.” (Ikwọ Solomon 2:16) Ke akpanikọ, eyenan̄wan emi eyenen̄ede ama fi.

 Inamke n̄kpọ m̀mê edi erenowo m̀mê n̄wan, edieke anamde idan̄ mbemiso ọdọde ndọ, ọwọrọ emesuene idemfo sia omotop ọsọn̄urua n̄kpọuto fo ọduọk. (Rome 1:24) Ntak edi oro esitiede ata ediwak owo ke idem nte ke mmimọ iwọrọke n̄kpọ aba, nte n̄kpọ eke mmọ ẹyakde owo eyịp ọsọn̄urua n̄kpọ ke idem mmọ. Kûdedei uyak oro etịbe ọnọ fi. Edieke owo ekpekde fi ete edinam idan̄ ye imọ onyụn̄ ọdọhọde ete, “Edieke amade mi ayanam se ndọhọde,” dọhọ enye uko uko ete, “Edieke amade mi, udûdọhọke nnam orụk n̄kpọ oro!”

Idem fo ọsọn̄ urua akan se akpayakde ọnọ owo ntre ntre. Wụt ke emekeme ndisọn̄ọ nda nnam ibet Abasi emi ọdọhọde ẹbet use. Nte ini akade, edieke ọdọde ndọ, emekeme ndinam idan̄ ye nsan̄a ndọ fo. Do eyenen̄ede enem fi, udutịmekede esịt, udutuaha n̄kpọfiọk, udunyụn̄ unyeneke mfịna emi mbon oro ẹsinamde idan̄ mbemiso ẹdọde ndọ ẹsinyenede.—Mme N̄ke 7:22, 23; 1 Corinth 7:3.

 KOT N̄KPỌ EFEN EFEN BAN̄A IBUOTIKỌ EMI KE IBUOT 4 YE 5 KE ỌYỌHỌ EBOHO 2

KE IBUOTIKỌ ORO ETIENEDE

Edifiọn̄ọ ndido idan̄ n̄kop uyụhọ ọdiọk adan̄a didie?

AKPAN ITIE N̄WED ABASI

“Ẹfehe ẹkpọn̄ use. . . . Owo eke akade iso anam use anam idiọkn̄kpọ edue idem esie.”—1 Corinth 6:18.

ITEM

Edumbet emi erenowo ekpetienede ke ini enye anamde n̄kpọ ye eyenan̄wan m̀mê emi eyenan̄wan ekpetienede ke ini enye anamde n̄kpọ ye erenowo edi emi: Edieke edide enyene se mûkpamaha ete ye eka fo ẹkụt nte anamde, ọwọrọ ikpanaha anam n̄kpọ oro.

NDI AMA ỌFIỌK . . . ?

Ke ẹma ẹkenam idan̄ ye eyenan̄wan, ediwak n̄kparawa ẹsikpọn̄ eyenan̄wan oro ẹkeyom owo en̄wen.

SE NDINAMDE

Mma ndu ye owo isio uduot, se mmendiyakke etịbe edi ․․․․․

Edieke owo isio uduot ọdọhọde ndisobo ye imọ ke ebiet emi mbon en̄wen mîdụhe, se ndibọrọde enye edi ․․․․․

Se ndibụpde ete ye eka mi mban̄a n̄kpọ emi edi ․․․․․

AFO EKERE DIDIE?

● Okposụkedi emi unana mfọnmma ekemede ndinam idan̄ ọdọn̄ owo mbemiso enye ọdọde ndọ, ntak emi mîfọnke anam?

● Nso ke edinam edieke owo ọdọhọde edinam idan̄ ye imọ?

[Se ẹwetde ke ikpọ abisi ke page 176]

“Sia edide Christian, afo emenyene nti edu emi ẹdinamde mbon en̄wen ẹma fi. Ntre, kpeme idem kpukpru ini kûnyụn̄ unyịme nditiene owo nnam idiọk. Da mme edu emi ke ọsọn̄urua. Kûtop mmọ uduọk!”—Joshua

[Ndise ke page 176, 177]

Ndinam idan̄ ke ini owo mîdọhọ ndọ etie nte ndida ediye ndise nnam n̄kpọ usọk ukot