UKPEPN̄KPỌ 53
Da Se Jehovah Amade Nem Idem Esịt
Jehovah edi “Abasi inemesịt.” (1 Timothy 1:11) Enye oyom nnyịn n̄ko ikop inemesịt, onyụn̄ oyom uwem enenem nnyịn. Esinem enye nnyịn ima isio ini iduọk odudu inyụn̄ inem idem nnyịn esịt. Ke ukpepn̄kpọ emi, iyeneme se ikpanamde ke utọ mme ini oro man esịt enem nnyịn onyụn̄ enem Jehovah.
1. Nso ye nso ke ana iti ima iyom ndimek se ididade inem idem esịt?
Nso ye nso ke afo esinam ke ini ọduọkde odudu? Ndusụk owo ẹsima ndidu ikpọn̄ ke ufọk—ẹtie ẹkot n̄wed, ẹbre ikwọ, ẹse fim, mîdịghe ẹdụk Intanet. Ndusụk owo ẹsima ndidu ye mme ufan mmọ—ẹsan̄a ntre ẹse mme n̄kpọ, ẹka ewọk, mîdighe ẹyom mbre ẹbre. Se ededi emi isinamde ke ini nduọkodudu man esịt enem nnyịn, ana edi “se Ọbọn̄ enyịmede.” (Ephesus 5:10) Ọfọn inen̄ede idiọn̄ọ emi, sia ata ediwak se mme owo ẹsidade ẹnem idem esịt esisịne se Jehovah asuade, utọ nte afai, use, m̀mê n̄kpọ mme demon. (Kot Psalm 11:5.) Nso idin̄wam nnyịn isida eti n̄kpọ inem idem esịt?
Ikpadian idem ye mbon emi ẹmade Jehovah, mmọ ẹkeme ndin̄wam nnyịn isida se Jehovah amade inem idem esịt. Ima ikpekpep ke “owo eke asan̄ade ye mbon ọniọn̄ eyenyene ọniọn̄.” Edi ikpodụk ndụk ye mbon emi mîmaha ndinam se Jehovah ọdọhọde, ‘ọyọdiọk ye nnyịn.’—Mme N̄ke 13:20.
2. Ntak ọfọnde ikpeme man nnyịn idibiat ini nnyịn ikaha ida inem idem esịt?
Ekpededi se ibierede ndida nnem idem esịt idiọkke ke enyịn Jehovah, ọfọn ikpeme udomo ini emi idade inam oro. Nnyịn mîkpemeke imekeme ndisida ini emi ikpadade inam akpan n̄kpọ, ida inem idem esịt. Ti ke Bible ọdọhọ nnyịn ete: “Ẹdedep ifet ẹnọ idem mbufo.”—Kot Ephesus 5:15, 16.
SỊN IDEM KPEP
Se se idin̄wamde fi ọdiọn̄ọ se ifọnde ada enem idem esịt.
3. Kûsuda se mîfọnke unem idem esịt
Ntak ọfọnde ikpeme se idade inem idem esịt? Se VIDIO emi, ekem ẹbọrọ mbụme emi ẹnyụn̄ ẹneme ẹban̄a mmọ.
-
Didie ke ndusụk n̄kpọ emi mme owo ẹsidade enem idem esịt mfịn ebiet en̄wan oro ẹkesinamde mme owo ẹn̄wana ke Rome ke eset?
-
Ke vidio oro, nso ke Danny ekedidiọn̄ọ aban̄a se owo akpadade enem idem esịt?
Kot Rome 12:9, ekem ẹbọrọ mbụme emi ẹnyụn̄ ẹneme ẹban̄a enye:
-
Didie ke itie Bible oro ekeme ndin̄wam nnyịn imek se ikpadade inem idem esịt?
Nso ye nso isịne ke otu n̄kpọ emi Jehovah asuade? Kot Mme N̄ke 6:16, 17 ye Galatia 5:19-21. Ama okot itie kiet ama, ẹtuak ẹda kan̄a ẹbọrọ mbụme emi ẹnyụn̄ ẹneme ẹban̄a enye:
-
Ke otu mme n̄kpọ ẹbatde mi, ewe ye ewe isiwak ndisịne ke se mme owo ẹsidade ẹnem idem esịt?
Se idin̄wamde fi esida se ifọnde enem idem esịt
Sibụp idemfo ete:
-
Nso ke edi? Ndi n̄kpọ emi esịne n̄kpọ ndomokiet emi Jehovah asuade?
-
Ini ewe ke ndinam? Ndi ini oro edi ini emi n̄kpadade nnam ata akpan n̄kpọ?
-
Ndinam ye mmanie? Ndi n̄kpọ emi ayanam ntọn̄ọ ndụk ndụk ye mbon emi mîmaha Jehovah?
Esifọn ikpeme idem man ididụk mfịna. Ukem ntre, ọfọn ikpeme idem ye n̄kpọ ekededi emi ikerede ke ikpọfọnke ida inem idem esịt
4. Sida ini fo nam nnennen n̄kpọ
Se VIDIO emi, ekem ẹbọrọ mbụme emi ẹnyụn̄ ẹneme ẹban̄a enye.
-
Brọda oro ke vidio oro ikesehe n̄kpọ ndomokiet emi Jehovah asuade, edi didie ke ofụri ini oro enye akabiatde ese mme n̄kpọ oro ekedifịna enye?
Kot Philippi 1:10, ekem ẹbọrọ mbụme emi ẹnyụn̄ ẹneme ẹban̄a enye:
-
Didie ke itie Bible oro ekeme ndin̄wam nnyịn idiọn̄ọ udomo ini emi ikpadade inem idem esịt?
5. Da nti n̄kpọ nem idemfo esịt
Kpa ye emi Jehovah mîmaha ndusụk n̄kpọ emi mme owo ẹsidade ẹnem idem esịt, ediwak nti n̄kpọ do, emi Jehovah amade, emi afo ekemede ndida nnem idem esịt. Kot Ecclesiastes 8:15 ye Philippi 4:8, ekem ẹbọrọ mbụme emi ẹnyụn̄ ẹneme ẹban̄a enye:
-
Ewe eti n̄kpọ ke afo esima ndida nnem idem esịt?
Emekeme ndida nti n̄kpọ nnem idemfo esịt ke ini nduọkodudu
NDUSỤK OWO ẸSIDỌHỌ ẸTE: “Idiọkke ndise vidio emi esịnede afai, use, m̀mê n̄kpọ mme demon, amakam edi nnyịn isitieneke inam mme n̄kpọ oro.”
-
Nso ke ọkpọbọrọ utọ owo oro?
SE IKPEPDE
Jehovah oyom nnyịn isida nti n̄kpọ inem idem nnyịn esịt.
Se M̀mê Emeti
-
Nso ke Christian mîkpadaha inem idem esịt?
-
Ntak ọfọnde ikpeme udomo ini emi isidade inem idem esịt?
-
Nso inam fi ebiere ndida n̄kpọ emi Jehovah amade nnem idem esịt?
KPEP N̄KPỌ EN̄WEN
Se m̀mê anie enyene ndibiere se afo adade enem idem esịt.
“Ndi Enyene Ndusụk Fim, N̄wed, M̀mê Ikwọ Emi Ẹdọhọde Mbon Mbufo Ẹkûdep?” (Odu ke jw.org)
Se se ikemede ndin̄wam fi ọdiọn̄ọ nti n̄kpọ emi akpadade enem idem esịt.
“Ndi Unọ Idem Nduọkodudu Fo Ẹfọn?” (Enyọn̄-Ukpeme, October 15, 2011)
Ke mbụk emi “Mma N̄kam Ntre Asari,” se se ikanamde ete kiet okpụhọde se enye esidade enem idem esịt.
Se se mma kiet ekebierede ndinam ke n̄kpọ aban̄ade mbụk mme demon emi enye ekesidade enem idem esịt.
Ekeme Ndidi Ayama Mmọ Emi N̄ko
MBỤME EMI ẸSIWAKDE NDIBỤP
Didie ke Mme Ntiense Jehovah Ẹsikpep Mme Owo Bible?
Emekeme ndikama Bible ekededi ke ini ekpepde n̄kpọ ye Mme Ntiense Jehovah. Akpama, emekeme ndikot ofụri mbon ubon fo, m̀mê ufan fo ekededi editiene ekpep.
