NTE mme owo ẹkewakde ke isọn̄, ntre ke idiọkn̄kpọ ọkọtọt. Enoch emi ekedide prọfet Abasi akasan̄a ikpọn̄ atan̄a ke Abasi ọmọn̄ osobo ndiọi owo. Kpa ye oro, idiọkn̄kpọ okosụk akaka iso, idem ọsọn̄de ubọk akan nte ekedide. Ndusụk angel ẹma ẹsọn̄ ibuot ye Jehovah, ẹkpọn̄ ebietidụn̄ mmọ ke heaven, ẹmen idem eke owo ẹsịne, ẹnyụn̄ ẹda iban oro mmọ ẹmade mi ke isọn̄ ẹdọ. Mme angel oro ẹkedọde iban do ẹma ẹbon nditọ mbuaha uduot—ikpọ mbon mfiomo oro ẹkekotde Nephilim, emi ẹkenamde afai ẹnyụn̄ ẹduọkde iyịp etieti ke ererimbot. Esịt ama enen̄ede ayat Abasi ndikụt nte ẹbiatde isọn̄ ntre.

Ke Enoch ama akakpa, owo kiet ama odu emi mîketieneke inam idiọk. Enye ekekere Noah. Enye ye ubon esie ẹma ẹdomo ndinam se inende ke enyịn Abasi. Ke ini Abasi akaduakde ndisobo ndiọi owo ini oro, enye ama oyom ndinyan̄a Noah ye mme unam. Ntre, Abasi ama ọdọhọ Noah ọkọn̄ akamba ubom. Ubom oro ke ẹdida inyan̄a Noah ye ubon esie ye ata ediwak nsio nsio orụk unam ke ini ukwọ. Noah ama anam se Abasi ọkọdọhọde enye anam. Noah okonyụn̄ edi “ọkwọrọ edinen ido” ke ofụri isua 40 m̀mê 50 oro enye akadade ọkọn̄ ubom. (2 Peter 2:5) Enye ama odụri mme owo utọn̄ aban̄a Ukwọ oro edide, edi mmọ ikọdọn̄ke utọn̄ do. Ke ama ekekem ini, Noah ye ubon esie ye mme unam ẹma ẹdụk ubom oro ndien Abasi ọkọbi usụn̄. Edịm ama ọtọn̄ọ ndidep.

Edịm ama edep ọsọn̄ ukot okoneyo 40 ye uwemeyo 40 tutu mmọn̄ ofụk ofụri isọn̄. Ukwọ emi ama osobo kpukpru ndiọi owo. Ke ọfiọn̄ ifan̄ ẹma ẹkebe, mmọn̄ ama ọtọn̄ọ ndisụhọde ndien ubom oro edibak ke obot. Mmọ ẹma ẹsịne ofụri isua kiet ke ubom oro mbemiso ẹkewọrọde ẹdi. Noah ama awa uwa ekọm ọnọ Jehovah. Abasi ama enyịme uwa Noah onyụn̄ ọn̄wọn̄ọ ọnọ enye ye ubon esie ete ke Imọ iditọn̄ọke aba ntak ida ukwọ isobo kpukpru odu-uwem n̄kpọ ke isọn̄. Jehovah ama enịm akpara man eti mmọ un̄wọn̄ọ esie emi.

Ke Ukwọ oro ama ekebe, Abasi ama ọnọ mmọ mbufa ibet. Enye ama ọdọhọ mmọ ẹta unam, edi ẹkûdia iyịp. Enye ama onyụn̄ ọdọhọ ubon Noah ẹsuana ẹyọhọ ofụri isọn̄, edi ndusụk nditọ nditọ esie ẹma ẹsọn̄ ibuot. Andikara oro ekekerede Nimrod ama atan̄ mme owo obok ọtọkiet onyụn̄ ọdọhọ mmọ ẹbọp akamba tọwa ke Babel oro ẹkedide ẹdikot Babylon. Mmọ ikoyomke ndinịm ibet oro Abasi ọkọdọhọde mmọ ẹsuana ẹyọhọ isọn̄. Edi Abasi ama abiat uduak mmọ ke nditịmede usem onyụn̄ anam mmọ ẹsem nsio nsio usem. Mmọ ikekemeke aba ndinam utom oro sia mmọ mîkokopke se kiet eken etịn̄de, mmọ ẹma ẹnyụn̄ ẹsuana ẹkedụn̄ọ ke nsio nsio itie.

—Ẹda ẹto Genesis ibuot 6 esịm 11; Jude 14, 15