Yak ineme iban̄a akparawa kiet emi akanyan̄ade eyeneka eka esie. Eyeneka eka esie ekedi apostle Paul. Nnyịn idiọn̄ọke enyịn̄ akparawa oro, edi imọdiọn̄ọ ke se enye akanamde ama owụt ke enye ama enyene uko. Ndi akpama ndidiọn̄ọ se enye akanamde?—

Ẹma ẹsịn Paul ke ufọk-n̄kpọkọbi ke Jerusalem. Ẹkesịn enye do ke ntak emi enye ọkọkwọrọde ikọ aban̄a Jesus. Mme idiọkowo ẹma ẹsua Paul ẹnyụn̄ ẹdụk odu m̀mê ediomi ndiwot enye. Mmọ ẹma ẹdọhọ ẹte: ‘Ẹyak idọhọ etubom ekọn̄ ọnọ mbonekọn̄ esie ẹmen Paul ẹdi esop. Nnyịn iyedịbe ke usụn̄, ndien ke ini Paul edide ndisan̄a mbe nnyịn iyowot enye!’

Eyen eyeneka Paul ama okop aban̄a odu emi. Nso ke enye akanam? Enye ama aka ufọk-n̄kpọkọbi eketịn̄ ọnọ Paul. Paul ama ọdọhọ enye ọsọsọp aka eketịn̄ ọnọ etubom ekọn̄. Ndi emekere ke ama emem utom eyen eyeneka Paul ndika n̄ketịn̄ ikọ emi nnọ etubom ekọn̄ oro?— Ihih ikememke, sia ete oro ekedi ata akwa owo. Edi eyen eyeneka Paul ama enyene uko onyụn̄ aka eketịn̄ ikọ emi ọnọ enye.

Etubom ekọn̄ ama ọfiọk se enye edinamde. Enye ama ọdọhọ n̄kpọ nte mbonekọn̄ 500 ete ẹkpeme Paul! Ekem enye ọdọhọ mmọ ẹmen Paul ẹkeyak ke Caesarea okoneyo oro. Ndi Paul ama ekesịm ke ifụre ye ke emem?— Ih, ama ekesịm. Mme idiọkowo oro ikekemeke ndinam enye n̄kpọ ndomokiet! Mmọ ikekemeke ndinam ibak oro mmọ ẹkeduakde.

Nso ke mbụk emi ekpep fi?— Afo emekeme ndinyene uko ukem nte eyen eyeneka Paul oro. Ana inyene uko ke ini itịn̄de n̄kpọ iban̄a Jehovah inọ mbon en̄wen. Ndi afo eyenyene uko onyụn̄ aka iso etịn̄ ikọ aban̄a Jehovah?— Edieke anamde emi, emekeme ndinyan̄a owo.