Kere ban̄a uwụtn̄kpọ emi ise: Ini ekededi emi Christiana esede idem ke ukụtiso, osụk etie enye nte ke imokpon ubom ikaha. Enye esidọhọ ete: “Akpana mfiak ntek,” kpa ye emi ete ye eka esie ye mme ufan esie ẹsidọhọde ke enye ekpri idem etieti.

Christiana ama ekere ndinam se ededi oro enye ekemede, ekpededi nditre udia usen ifan̄, man osụk etek esisịt . . .

Nso ke afo akpanam edieke ekpedide Christiana?

Idiọkke ndikere mban̄a nte afo etiede. Bible etịn̄ aban̄a ndiye iban ye irenowo, utọ nte Sarah, Rachel, Abigail, Joseph, ye David. Bible ọdọhọ ke n̄wan kiet emi ekekerede Abishag ama “eye ata etieti.”—1 Ndidem 1:4.

Edi, ediwak uyen ẹsikere ẹban̄a nte mmọ ẹtiede ẹkan nte ẹkpekerede. Emi ekeme ndinam mmọ ẹnam se mîkpanamke. Ke uwụtn̄kpọ:

• Ke ini ẹkenamde ndụn̄ọde ye n̄kaiferi 100, 58 ke otu mmọ ẹkedọhọ ke imokpon ubom ikaha, ke ini edide n̄kaiferi 17 kpọt ẹkekpon ẹkaha.

• Ke ndụn̄ọde en̄wen oro ẹkenamde ye iban 100, iban 45 emi ẹkekpride idem etieti ẹkekere ke imokpon ubom ikaha!

• Ndusụk uyen ẹsinam se mîkpanamke man ẹtek, ndien oro esinam mmọ ẹdọn̄ọ idiọk udọn̄ọ emi ẹkotde anorexia. Owo emi ọdọn̄ọde utọ udọn̄ọ emi esikere ke imokpon ubom ikaha, ntem isimaha ndidia udia.

 Edieke afo okụtde ke emenyene udọn̄ọ emi, mbọk kûdop uyo. Tịn̄ se ifịnade fi nọ ete m̀mê eka fo m̀mê akwa owo en̄wen emi amade. Bible ọdọhọ ete: “Ata ufan amama ufan kpukpru ini, onyụn̄ edi eyeneka emi amanade ọnọ ini nnanenyịn.”—Mme N̄ke 17:17.

Edu esinam owo enen̄ede eye. Da Absalom eyen Edidem David ke uwụtn̄kpọ. Bible ọdọhọ ete:

‘Baba owo eke eyede nte Absalom ikodụhe. Enye ikenyeneke baba ndo kiet ọtọn̄ọde ke ikpat tutu esịm etịn̄ibuot esie.’—2 Samuel 14:25.

Kpa ye oro Absalom ekeyede etieti, enye ama atan̄ idem, akari n̄kari, onyụn̄ oyom ikpọ n̄kpọ. Bible itịn̄ke eti n̄kpọ ndomokiet iban̄a enye, edi ọdọhọ ke enye ikanamke akpanikọ, ama onyụn̄ asua Amnon eyenete esie tutu owot enye.

Ntak edi oro Bible ọnọde nnyịn item emi:

“Ẹmen obufa owo ẹsịne.”—Colossae 3:10.

“Ẹkûyak mbanaidem mbufo edi enyọn̄ enyọn̄ . . . edi ẹyak edi ndedịbe owo eke esịt.” —1 Peter 3:3, 4.

Kpa ye oro mîdiọkke ndinam se afo ekemede man eye, se ikam idide akpan n̄kpọ ikan edi edu fo. Ndinyene nti edu edinam fi enen̄ede eye ke enyịn mbon en̄wen, idịghe nte afo etiede! N̄kaiferi emi ekerede Phylicia ọdọhọ ete: ‘Owo oro eyede esisọp odụk owo enyịn. Edi mme owo ẹsiwak nditi nti ido fo ye utọ owo emi afo edide.’

Ndi emesisua nte afo etiede?

Ndi akanam emekere ke akpana ọfiọn̄ọ n̄kpọ man enen̄ede afia, ekịm m̀mê emen ibọk ubom, mîdịghe etie biọn̄ man enen̄ede ekpri?

Nso ke akpama ndikpụhọde ke idem fo? (Dụri udịm ke se akpamade ndikpụhọde.)

• UNIỌN̄

• UBOM

• NTE IDEM FO ETIEDE

• IDET

• ISO

• KỌLỌ IDEMFO

Edieke ọbọrọde ih ke akpa ye udiana mbụme oro, onyụn̄ odụride udịm ke n̄kpọ ita m̀mê akande oro ke ọyọhọ mbụme ita, ọfọn afiak ekere: Ekeme ndidi udiọkke mbon en̄wen ke enyịn nte afo akam ekerede. Edieke mûkpemeke, emekeme ndikere mban̄a nte etiede akan nte ekpekerede, onyụn̄ anam se mûkpanamke.—1 Samuel 16:7.